የኮሮና ቫይረስ ዓለም አቀፍ ወረርሽኝ መሆኑን የዓለም ጤና ድርጅት ተናገረ

የዓለም ጤና ድርጅት ዋና ዳይሪክተር ዶክተር ቴድሮስ አድሀኖም በሰጡት መግለጫ የኮሮና ቫይረስ “ዓለም አቀፍ ወረርሽኝ” መሆኑን ተናግረዋል፡፡

አንድ በሽታ ዓለም አቀፍ ወረርሽኝ የሚባለው በዓለም ዙሪያ በተመሳሳይ ጊዜ በተለያዩ አገራት ውስጥ ሲሰራጭ ነው።

የዓለም ጤና ድርጅት ዳይሬክተሩ እንዳሉት ባለፉት ሁለት ሳምንታት ከቻይና ውጪ በበሽታው የሚያዙ ሰዎች ቁጥር በ13 እጥፍ ጨምሯል።

ዶክተር ቴድሮስ አድሃኖም ጨምረውም በሽታውን በተመለከተ እርምጃ ለመውሰድ የታየው ቸልተኝነት “በጣም እንዳሳሰባቸው” ተናግረዋል።

በቻይና ውሀን ግዛት የተቀሰቀሰው የኮሮና ቫይረስ ወረርሽኝ በርካታ የአለም አገራትን በማዳረስ ከ4 ሺህ 380 በላይ ሰዎችን ሲገድል በበሽታው መያዛቸው የተረጋገጠ ሰዎች ደግሞ ከ122 ሺህ በላይ መድረሱን ተዘግቧል።(ጤና ሚኒስቴር)