በአዲስአበባ ከመሬት ጋር የተይያዙ አገልግሎቶች ላልተወሰነ ጊዜ ታገዱ

የአዲስ አበባ ከተማ አስተዳደር ከህገወጥ መሬት ወረራ ጋር በተያያዘ እየወጡ ያሉ መረጃዎች እስኪጣሩ እና አሰራሮች እስኪስተካከሉ ከመሬት ጋር ተያይዞ የሚሰጣቸውን አገልግሎቶች ላልተወሰነ ጊዜ አቆመ።

በከተማ አስተዳደሩ የምክትል ከንቲባ ፅህፈት ቤት እና የካቢኔ ጉዳዮች ምክትል ሃላፊ የሆኑት አቶ ደረጄ ካሳ ለካፒታል ጋዜጣ እንደገለፁት የመሬት ይዞታ ማረጋገጫ፣ የስም ማዞር፣ የኮንስትራክሽን ስራዎች እና የመሳሰሉትን የመሬት አስተዳደር የሚሰጣቸው አገልግሎቶች መረጃዎች ተጣርተው አሰራሮች እስኪስተካከሉ ድረስ ላልተወሰነ ጊዜ እንደቆሙ ገልፀዋል፡፡

ባሳለፍነው ሳምንት የኢትዮጵያ ዜጎች ለማህበራዊ ፍትህ (ኢዜማ) ፓርቲ አደረኩት ባለው ጥናት በከተማዋ ውስጥ ከፍተኛ የሆነ ህገወጥ የመሬት ወረራ መኖሩን እንደገለፀ የሚታወስ ነው፡፡ እንደ ጥናቱ ገለፃ በህገወጥ መሬት ወረራ እና ያላግባብ የኮንዶሚኒየም ቤቶች እደላ ላይ በስልጣን ላይ ካሉ አመራሮች ጀምሮ ተሳታፊ እንደሆኑ ሲገልፅ በተጨማሪም በብሄር ተለይቶ ድርጊቶች እንደሚፈፀሙ ያትታል፡፡

የቀድሞ ምክትል ከንቲባ ኢንጂነር ታከለ ኡማ በጉዳዩ ላይ አስተያየት ሲሰጡ በህገ ወጥ መንገድ የኮንዶሚኒየም እደላ ተብሎ የተጠቀሰው 20 ሺ ለሚሆኑ ለቤት ግንባታ ከእርሻ ቦታቸው ተፈናቃይ ለሆኑ አርሶ አደሮች የተሰጡ እንደሆኑ እና አነሱም በአጠቃላይ ተነሺ ከሆኑት 67 ሺ አርሶ አደሮች በባሰ ሁኔታ ይገኛሉ ተብለው የተመረጡ እንደሆኑና ይሄም ከአንድ አመት ተኩል በፊት የተከናወነ እንደሆነ ገልፀዋል፡፡

በቅርቡ የቀድሞው ምክትል ከንቲባ ኢንጂነር ታከለ በከተማዋ ውስጥ እየተለመደ የመጣውን ህገወጥ የመሬት ወረራን ለመቆጣጠር የመሬት ምዝገባና ኦዲት አንዲሁም ለአርሶ አደሮች የመሬት ይዞታ ማረጋገጫ እስከ ጥቅምት 2013 ድረስ እንዲሰጥ ለሁሉም ክፍለ ከተማ አስተዳደሮች ትእዛዝ ሰጥተው ነበር፡፡

(Capital )