የአማራ ምሁራን መማክርት ጉባኤ መንግሥት ኃላፊነቱን እንዲወጣ አሳሰበ

የአማራ ምሁራን መማክርት ጉባኤ በደምቢ ዶሎ ዩኒቨርሲቲ የአማራ ተወላጅ ተማሪዎች ላይ የተፈፀመውን እገታ በተመለከተ መንግሥት ኃላፊነቱን እንዲወጣ አሳሰበ

በሀገሪቱ ባሉት ዩኒቨርሲቲዎች የተከሰተውን አለመረጋጋት ተከትሎ በደምቢ ዶሎ ዩኒቨርሲቲ ትምህርታቸውን ሲከታተሉ በነበሩ የአማራ ተወላጅ ተማሪዎች ላይ የእገታ እና የአፈና ድርጊት እንደተፈፀመ የምሁራን መማክርት ጉባኤው ከተለያዩ የመረጃ ምንጮች መገንዘቡን አስታውቋል።

ጉዳዩን በተመለከተ የፌዴራሉም ሆነ የክልሉ መንግሥታት ምንም ዓይነት ግልጽ መረጃ ለሕዝብ አለማሳወቃቸው እንዳሳሰበውም ነው ጉባኤው የገለፀው።

በአማራ ተወላጆች ላይ በተደጋጋሚ የሚደርሱ በደሎችን በተመለከተ የፌዴራል መንግሥትም ሆነ የተለያዩ የሀገሪቱ መገናኛ ብዙኃን ተገቢውን ትኩረት ሲሰጡ እንደማይታይም የአማራ ምሁራን መማክርት ጉባኤ አስታውቋል።

በመሆኑም በየደረጃው የሚገኙ የመንግሥት አካላት የእገታ እና የአፈና ድርጊት የተፈፀመባቸውን የአማራ ተማሪዎች በተመለከተ አፋጣኝ መረጃ ለሕዝብ እንዲሰጡና በአጭር ጊዜ አጣርተው አስፈላጊውን መንግሥታዊ ኃላፊነት እንዲወጡ ማሳሰቡን የአማራ ብዙሃን መገናኛ ድርጅት ዘግቧል።(የአማራ መገናኛ ብዙሀን)