እሳት የአራት የቤተሰብ አባላትን ሕይወት በላ

በኢሉአባቦር ዞን ዳሪሙ ወረዳ በአንድ ግለሰብ መኖሪያ ቤት ላይ በደረሰ የእሳት ቃጠሎ አራት የቤተሰብ አባላት ህይወት ማለፉን የወረዳው መንግስት ኮሙዩኒኬሽን ጉዳዮች ፅህፈት ቤት አስታወቀ

የእሳት ቃጠሎው ጋር በተያያዘ የተጠረጠሩ አምስት ሰዎች በቁጥጥር ስር መዋላቸውም ተገልጿል፡፡

የፅህፈት ቤቱ ሀላፊ አቶ ተመስገን ቀልቤሳ ለኢዜአ እንደገለፁት አደጋው የደረሰው ትናንት ሌሊት 9 ሰዓት አካባቢ ያልታወቁ ሰዎች የአንድን ግለሰብ መኖርያ ቤት ከውጭ በመቆለፍ በእሳት በማያያዛቸው ነው፡፡

በአደጋው በመኖርያ ቤቱ ውስጥ የነበሩ እናትና አባት ከሁለት የ3 እና የ10 ዓመት ልጆቻቸው ጋር በእሳት ተቃጥለው ህይወታቸው አልፏል፡፡

ከድርጊቱ ጋር ተያይዞ የተጠረጠሩ አምስት ግለሰቦች እስካሁን በቁጥጥር ስር መዋላቸውም ገልፀዋል፡፡

ፖሊስ ከህብረተሰቡ ጋር በመሆን የጉዳዩን መንስኤ በማጣራት ላይ እንደሆነም ተናግረዋል፡፡(ኢዜአ)