ከ12 ቢሊዮን ብር በላይ ወጪ የሚደረግበት የሮሃ ህክምና ማዕከል ግንባታ ተጀመረ

ከ12 ቢሊዮን ብር በላይ ወጪ የሚደረግበት የሮሃ ህክምና ማዕከል ግንባታ ተጀመረ

የአዲስአበባ ከተማ  አስተዳደር ከጤና ሚኒስቴር ጋር በመሆን ላለፉት ሰባት ወራት በትኩረት ሲሰራበት የነበረውን እና ከ12 ቢሊዮን ብር በላይ ወጪ የሚገነባውን የሮሃ ህክምና ማዕከል ግንባታ ጠቅላይ ሚኒስትር ዐብይ አሕመድ በዛሬው ዕለት  አስጀመሩ።

ከ1ሺ 100 አልጋዎች በላይ ያሉት እና 7 ሺ 500 የስራ እድል የሚፈጥረው ሮሀ የህክምና ማዕከል፤ መንፈስን የሚያድስ ውብ መናፈሻን ጨምሮ ዘርፈ ብዙ የህክምና አገልግሎት የሚሰጡ 5 ትላልቅ ሆስፒታሎች የሚኖሩት ሲሆን ፣ በአመት ከአንድ መቶ ሺህ በላይ ታካሚዎችን ያስተናግዳል ተብሏል።

ይህ ፕሮጀክት ከተማዋ ከዜጎቿና ከነዋሪዎቿ አልፋ የእንግዶቿን ጤና በብቃት መንከባከብ የምትችል መሆኗን ከማሳየት ባሻገር ፣ ሀገራችን ዜጎቿን ለማሳከም ወደ ውጭ የምትልከውን የውጭ ምንዛሬ ለመቀነስ ከፍተኛ አስተዋፅኦ እንደሚያደርግ ወ/ሮ አዳነች አቤቤ በማህበራዊ ትስስር ገፃቸው ገልፀዋል።

የህክምና ማሰልጠኛ ኮሌጁም ብቁ የህክምና ባለሙያዎችን በማፍራት ለሌሎች የህክምና መስጫ ተቋማት አጋዥ ጉልበት እንደሚሆንም ጠቅሰዋል።

አዲስ አበባችን የጤና ቱሪዝም ማዕከል የመሆን ህልሟን ታሳካ ዘንድ እንደ ሮሃ ያሉ ተጨማሪ የህክምና ማዕከላት እንዲኖሯት ተግተን መስራታችንን እንደምንቀጥል እያረጋገጥኩ ፣ በዚህ ስራ የተሳተፉትን ሁሉ በተለይም ለግንባታው በተመረጠው አካባቢ ይኖር የነበረው ማህበረሰብ ለልማት ተነሳሽነቱን በማስመስከር፤ የታሰበው ስራ በፍጥነት እንዲከናወን ከፍተኛ ትብብር በማድረጉ በከተማው አስተዳደር ስም ላመሰግን እወዳለሁ ብለዋል።