ሶስት ሚልየን ቶን ሲሚንቶ ከውጭ ለማስገባት ተወሰነ

የንግድና ኢንዱስትሪ ሚኒስቴር ሚኒስትር አቶ መላኩ አለበል እንደገለፁት የተፈጠረውን የሲሚንቶ ችግር ለመቅረፍ የፋብሪካዎችን የማምረት አቅም ለማሳደግ እየተሰራ መሆኑን ገልፀዋል፡፡

ለሲሚንቶ እጥረት መከሰት በዋናነት የመለዋወጫ ችግር፣ የኤሌክትሪክ መቆራረጥ፣ የግብዓት እጥረት ፣ የአመራርና የባለሙያ የክህሎት ክፍተት መኖር፣ የፀጥታ ችግር፣ የጥሬ እቃ አቅርቦት እና ሌሎች ችግሮች መኖራቸው ነው ያሉት አቶ መላኩ ችግሩን ለመቅረፍ ከባለድርሻ አካላት ጋር በትኩረት በመሰራቱ መሻሻል መታየቱን ተናግረዋል፡፡

በፋብሪካዎች ላይ እየተፈጠረ ያለውን የመለዋወጫ ችግር ለመቀረፍ 85 ሚሊዮን ዶላር ተመድቦ እየተሰራ መሆኑን የገለፁት ሚኒስትሩ ይህም የፋብሪካዎችን የማምረት አቅም ወደ 63 በመቶ ከፍ እንዳደረገው ተናግረዋል፡፡ አያይዘውም ወቅታዊውን ችግር ለመቅረፍ 3 ሚሊዮን ቶን ሲሚንቶ ከውጪ ለማስገባት መወሰኑን ገልፀዋል፡፡

በመጨረሻም በዘላቂነት የሲሚንቶን የገበያ ችግር ለመፍታት መመሪያ መዘጋጀቱንና ከሚቀጥለው ሰኞ ጀምሮ ተግባራዊ እንደሚደረግ ሚኒስትሩ ተናግረዋል፡፡(ንኢሚ)