የአዲስ አበባ አስተዳደር ለጽዳት ባለሞያዎች ነጻ የትራንስፖርት አገልግሎት እንዲዘጋጅ ወሰነ

የአዲስ አበባ አስተዳደር ለጽዳት ባለሞያዎች ነጻ የትራንስፖርት አገልግሎት እንዲዘጋጅ ወሰነ

የአዲስ አበባ ከተማ አስተዳደር ም/ከንቲባ ወ/ሮ አዳነች አቤቤ የከተማዋን የጽዳት ሰራተኞች ለማመስገን እና ክብር ለመስጠት ልዩ የምስጋና እና የምሳ መርሃግብር መካሄዱን ገልፀዋል።

ም/ከንቲባዋ በማህበራዊ ትስስር ገጻቸው “የሌሊት ጭለማ ፣ ብርድ ፣ ዝናብ ፣ ፀሃይ እና መጥፎ ሽታ ሳይሉ ለከተማችን ጽዳት ቀን ከሌሊት የሚተጉትን የጽዳት ሰራተኞች ዛሬ የከተማ አስተዳደሩ ልዩ የምስጋና እና የምሳ መርሃግብር አዘጋጅተን ማዕድ አብረን በልተን ፤ “የምናመሰግናችሁ ስለሚገባችሁ ነው!” ብለናቸዋል”ብለዋል።

“እነኝህ የከተማችን ያልተዘመረላቸው ጀግኖችን ማመስገን እና ክብር መስጠት ለሁላችንም ክብር ነውም” ነው ያሉት ም/ከንቲባ አዳነች አቤቤ።

የከተማ አስተዳደሩም ስራቸውን በማክበር ለጽዳት ባለሞያዎች ነጻ የትራንስፖርት አገልግሎት እንዲዘጋጅ መወሰኑንም አስታውቀዋል ።  

የጽዳት ሰራተኞች 80% እናቶች በመሆናቸው ይህ የትራንስፖርት አገልግሎት ተጋላጭነታቸውን ይቀንሳል ብለዋል። 

“ልፋታቸውን የሚመጥን ክብር እና ድጋፍ መስጠት ከሁላችንም የሚጠበቅ ስለሆነ ተጠናክሮ እንደሚቀጥል ማሳሰብ እወዳለሁ” በማለት ም/ከንቲባዋ ጥሪ አቅርበዋል።

(አዲስ ሚዲያ ኔትወርክ)