በሰሜን ዕዝ ሰራዊት ላይ የደረሰውን ጥቃት የሚያወግዝ ሰላማዊ ሰልፍ ከነገ ጀምሮ በኦሮሚያ ይደረጋል

በሰሜን ዕዝ ሰራዊት ላይ የደረሰውን ጥቃት የሚያወግዝ ሰላማዊ ሰልፍ ከነገ ጀምሮ በኦሮሚያ ይደረጋል

በመላው ኦሮሚያ ከህዳር ሶስት ጀምሮ ህገ ወጡ የህወሓት ጁንታ ከግብረ አበሩ ኦነግ ሸኔ ጋር በመቀናጀት በሰሜን ዕዝ ሰራዊት አባላት ላይ የፈጸመውን ጥቃት የሚያወግዝ እና ጥፋተኞች ለህግ እንዲቀርቡ የሚጠይቅ ሰላማዊ ሰልፍ ሊደረግ መሆኑ ተገለጸ፡፡

በኦሮሚያ ክልላዊ መንግስት በምክትል ፕሬዚዳንት ማዕረግ የማህበረሰብ ክላስተር አስተባባሪ አቶ አዲሱ በማህበራዊ ትስስር ገጻቸው ላይ÷ ወንጀለኛው የህወሓት ጁንታ በሰሜን ዕዝ ጀግኖች የመከላከያ ሰራዊት አባላት ላይ ጥቃት ፈጽሟል ብለዋል፡፡ 

ይህ አሳፋሪ ተግባር በዓለም ታሪክ ከተፈጸሙ እጅግ አሳፋሪ የጦር ወንጀል ታሪኮች ውስጥ ተመዝግቦ ይኖራልም ነው ያሉት፤ የኦሮሚያ ክልል ህዝብ ይህ የህወሓት እኩይ ድርጊት በእጅጉ እንዳስቆጣው በመጥቀስ፡፡

በመላው የኦሚሮያ ዞኖች፣ ከተሞች እና ወረዳዎችም ሰላማዊ ሰልፎችን ለማድረግ በርካታ ጥያቄዎች በመቅረብ ላይ እንደሚገኙም ገልጸዋል።

ሰላማዊ ሰልፎቹም ህገ ወጡ የህወሓት ጁንታ ከግብረ አበሩ ኦነግ ሸኔ ጋር በመቀናጀት በሰሜን ዕዝ ሰራዊት አባላት ላይ የፈጸመውን ጥቃት በማውገዝ ጥፋተኞች ለህግ እንዲቀርቡ መጠየቅ፣ ህዝቡ መንግስት ሕግን ለማስከበር እየወሰደ ያለውን ዕርምጃ በመደገፍ ለመከላከያ ሰራዊት እስከ ህይወት መስዋዕትነት ድረስ አስፈላጊውን ድጋፍ ለማድረግ ያለውን ዝግጁነት ለመግለጽ፣

እንዲሁም  የአጥፊው ጁንታ ጥፋት የጥቂት ስግብግቦች ሴራ እንጂ የሰላም ወዳዱን የየትኛውንም ህዝብ ፍላጎት የማይወክል መሆኑን እና በጁንታው በተፈጸመው ጥፋት ምክንያት የኢትዮጵያ አንድነት እንደማይፈርስ የህዝቦች ወንድማማችነት እንደማይናጋና የጁንታውን  ሀገር የማፍረስ ሴራ በቁርጠኝነት ለመታገል ያላቸውን አቋም ለመግለጽ ያለሙ ናቸው ተብሏል፡፡

የኦሮሚያ ክልላዊ መንግስት የጸጥታ አካላትም የህዝቡን የሰላማዊ ሰልፍ ጥያቄ  ለማስተናገድ በቂ ዝግጅት አድርገዋልም ብለዋል፡፡

በመሆኑም በኦሮሚያ ክልል ከነገ ህዳር 3 ቀን 2013 ዓ.ም ጀምሮ ታላላቅ ሰላማዊ ሰልፎች እንዲደረጉ መፈቀዱን ተናግረዋል፡፡

ሰላማዊ ሰልፈኞቹም ከጸጥታ ሀይሎች ጋር በመተባበር ሰልፎቹ በሰላም እንዲጠናቀቁ የሚጠበቅባቸውን አስተዋጽኦ እንዲያበረክቱ እና ራሳቸውንም ከኮቪድ 19 ስርጭት ለመከላከል አስፈላጊውን ጥንቃቄ በማድረግ እንዲንቀሳቀሱም ጥሪ አቅርበዋል፡፡(FBC)