ወይዘሮ ነፃነት አስፋው እና የቀድሞ የአዲስአበባ ፖሊስ ኮምሽነር ከዚህ ዓለም በሞት ተለዩ

የሕዝብ ተወካዮች ምክር ቤት አባል በመሆን እና በተለያዩ የመንግስት የስራ ኃላፊነቶች ላይ ያገለገሉት ወይዘሮ ነፃነት አስፋው ከዚህ ዓለም በሞት ተለዩ።

ወይዘሮ ነፃነት አስፋው ባደረባቸው ህመም በህክምና ሲረዱ ቆይተው ዛሬ ከዚህ ዓለም በሞት ተለይተዋል።

ወይዘሮ ነፃነት ከዚህ ቀደም በኢፌዴሪ የህዝብ ተወካዮች ምክር ቤት የመንግስት ረዳት ተጠሪ፣ የኢፌዴሪ የማስታወቂያ ሚኒስትር ዲኤታ እና በሌሎች የስራ ሀላፊነቶች ላይ ሰርተዋል።

በምስራቅ አፍሪካ የልማት በይነ መንግስታት /ኢጋድ/ ውስጥም የሰላምና ፀጥታ ዘርፍ ዳይሬክተር በመሆን አገልግለዋል።

በተያያዘ ዜና የአዲስ አበባ ፖሊስ ኮሚሽን ኮሚሽነር የነበሩት ሻለቃ በፍቃዱ ቶሌራ ባደረባቸው ህመም ህክምናቸውን በሀገር ውስጥና በውጪ ሲከታተሉ ቆይተው የካቲት 29 ቀን 2012 ዓ/ም ከዚህ ዓለም በሞት ተለይተዋል፡፡

ኮሚሽነር በፍቃዱ ቶሌራ የአዲስ አበባ ፖሊስ ኮሚሽን ኮሚሽነር ሆነው ከማገልገላቸው በተጨማሪ በኮሚሽኑ ልዩ ልዩ የስራ ክፍሎች በስራ ኃላፊነት ሰርተዋል፡፡ኮሚሽነር በፍቃዱ ቶሌራ ከመጋቢት 9 ቀን 1997 ዓ/ም ጀምሮ ህዳር 28 ቀን 2002 ዓ/ም በክብር በጡረታ እስከ ተሰናበቱበት ወደ ኢትዮጵያ ፌዴራል ፖሊስ ኮሚሽን ተዛውረው አገልግለዋል፡፡

በፍቃዱ ቶሌራ ከፖሊሳዊ ተግባራቸው ጎን ለጎን በልዩ ልዩ መንግስታዊና የግል ከፍተኛ የትምህርት ተቋማት በመምህርነት ሰርተዋል። የኮሚሽነር በፍቃዱ ቶሌራ የቀብር ነ-ሥርዓት መጋቢት 2 ቀን 2012 ዓ/ም ከቀኑ 10፡00 ሰዓት በቅዱስ ጴጥሮስ ወ-ጳውሎስ የሚፈፀም ይሆናል፡፡(ምንጭ:-ፋና እና አ/አ ፖሊስ)