በሲዳማ ህዝበ ውሳኔ ድምጽ ለመስጠት ሁለት ሚሊዮን ገደማ መራጮች ተመዝግበዋል

ህዳር 10/2012 በሚካሄደው የሲዳማ ህዝበ ውሳኔ ድምጽ ለመስጠት ሁለት ሚሊዮን ገደማ መራጭ መመዝገባቸውን የኢትዮጵያ ብሄራዊ ምርጫ ቦርድ አስታወቀ፡፡

የቦርዱ የህዝብ ግንኙነት አማካሪ ሶሊያና ሽመልስ ለአዲስ ዘመን ጋዜጣ እንደተናገሩት፤ በተለይም በመጀመሪያዎቹ ቀናት ከፍተኛ የተመዝጋቢ ቁጥር የነበረ ሲሆን የምርጫ ጣቢያዎችም በተመዝጋቢዎች ተጨናንቀው ነበር፡፡

እስካሁን ምዝገባው ያለ አንዳች ችግር እየተካሄደ መሆኑን የገለጹት ሶሊያና፤ በአንዳንድ ወረዳዎች የካርድ እጥረት አጋጥሞ የነበረ ሲሆን ካርድ በአፋጣኝ እንዲደርስ በማድረግ ችግሩ መቀረፉን ተናግረዋል፡፡

በመርሃ ግብሩ መሰረት የመራጮች ምዝገባ እስከ ህዳር 6/2012 ዓ.ም የሚቀጥል ሲሆን የተመዝጋቢዎች ቁጥርም ከሁለት ነጥብ አንድ እስከ ሁለት ነጥብ ሁለት ሚሊዮን ይደርሳል ተብሎ እንደሚጠበቅ ተናግረዋል፡፡

አዲስ ዘመን ህዳር 3/2012