ኬንያ ከኢትዮጵያ ጋር ያላት ወዳጅነት የበለጠ እንደሚጠናከር ገለፀች

የኬንያ መንግስት በኢትዮጵያ እየተካሄደ ያለውን ዘርፈ ብዙ የሽግግር ሂደት እንሚደግፍ አስታወቀ፡፡

የኬንያ የውጭ ጉዳይ ሚኒስትር ዴኤታ አምባሳደር ማቻርያ ካማው በአገሪቱ ታዋቂ ከሆነው ሲቲዝን የቴሌቭዥን ጣቢያ ጋር ባደረጉት ቃለ-ምልልስ ኢትዮጵያ ሠፊ ታሪክ እና ድንቅ ባህል ያላት አገር እንደሆነች ጠቅሰዋል፡፡

አገሮች በተለያየ የታሪካቸው ሂደት በተመሳሳይ ሽግግር ውስጥ ያልፋሉ ያሉት ሚኒስተር ዴኤታው ኢትዮጵያም በተመሳሳይ ሂደት ላይ መሆኗን እና ለስኬቱ የኬንያ መንግስት ድጋፍ እንደማይለያት አረጋግጠዋል፡፡

በጋራ ድንበር አካባቢ ካሉ ህዝቦች ጋር የሚፈጠሩ አንዳንድ ችግሮች ከንግድ ጋር የተያያዙ እንደሆኑ ገልፀው በሁለቱ አገሮች መሀከል ያለው ግንኙነት ፍፁም ጤነኛ ነው ብለዋል፡፡

ከኢትዮጵያ ጋር ኬንያ ያላት ወዳጅነት የበለጠ እንደሚጠናከር የአገራቸው ፍላጐት መሆኑንም አምባሳደር ማቻሪያ ተናግረዋል፡፡

ምንጭ:- የኢፌዲሪ ኤምባሲ፣ ኬንያ