Connect with us

ሃይማኖታዊው እና ባህላዊው ‹የግጭት አፈታት› እና ‹የዕርቀ-ሰላም› መልካም የሆኑ እሴቶቻችን ሊጠናከሩ ይገባቸዋል!!

ሃይማኖታዊው እና ባህላዊው ‹የግጭት አፈታት› እና ‹የዕርቀ-ሰላም› መልካም የሆኑ እሴቶቻችን ሊጠናከሩ ይገባቸዋል!!
Photo: Social media

ነፃ ሃሳብ

ሃይማኖታዊው እና ባህላዊው ‹የግጭት አፈታት› እና ‹የዕርቀ-ሰላም› መልካም የሆኑ እሴቶቻችን ሊጠናከሩ ይገባቸዋል!!

ሃይማኖታዊው እና ባህላዊው ‹የግጭት አፈታት› እና ‹የዕርቀ-ሰላም› መልካም የሆኑ እሴቶቻችን ሊጠናከሩ ይገባቸዋል!!

በዲ/ን ተረፈ ወርቁ*

ከጥቂት ዓመታት በፊት የዓለም የዕርቅና ሰላም የተባለ አገር በቀል ግብረ-ሠናይ ድርጅት፤ ‹‹የሕግ ታራሚነት እና ዕርቅ ለሰላማዊ ሕይወት በኢትዮጵያ፣ ክፍተቶቹ እና መፍትሔዎቹ›› በሚል አጀንዳ አዘጋጅቶት በነበረው ዓመታዊ ስብሰባና ውይይት መድረክ ላይ ለመሳተፍ ዕድሉን አግኝቼ ነበር፡፡ በዚህ ስብሰባ ላይም በግጭት አፈታትና በዕርቀ-ሰላም (Conflict Resolution and Mediation) ጉዳይ ላይ ሰፊ ጥናትና ምርምር እያደረጉ ያሉ በአገር ቤትና በውጭ አገር የሚኖሩ ምሁራን፣ የሃይማኖት አባቶች፣ የአገር ሽማግሌዎች፣ የፍትሕና አካላትና ፖሊስ፣ ወጣቶች ተሳታፊዎች ነበሩ፡፡

በምሁራኑ ባቀረቧቸው የጥናት ወረቀቶችና የውይይት መነሻ አሳቦች ላይም ብዙዎችን በንቃት ያሣተፈ ውይይትና ምክክርም ተደርጎ ነበር፡፡ ታዲያ በዚህ በዚህ የውይይት መድረክ ላይ አቶ አሰፋ ከሲቶ፣ ለሦስት ዓመት ያህል የኢፌዲሪ ፍትሕ ሚ/ር ኾነው በሠሩበት ወቅት የሕግ ታራሚዎች ሕጉ ከሚጥልባቸው ቅጣት ባሻገር፣ ለዘመናት በኢትዮጵያ ሕዝቦች መካከል ጸንቶ የቆየው ባህላዊና ሃይማኖታዊ የሆነው የግጭት አፈታትና የዕርቀ-ሰላም እሴቶቻችን ያላቸውን ፋይዳ በማስመልከት- በአንድ ወቅት በቤሻንጉል ጉምዝ የሆነ ያስገረማቸውን አንድ ገጠመኛቸውን ለስብሰባው ተሳታፊዎች እንዲህ አውግተውን ነበር፡፡

ታሪኩ እንዲህ ነው፡፡ በቤሻንጉል ጉምዝ የሚኖሩ ሁለት ጎረቤታሞች በጊዜያዊ ግጭት በተፈጠረ ጠብ አንደኛው ጎረቤት አንድ ማታ ላይ ጨለማን ተገን አድርጎ ጠበኛው የሆነውን ጎረቤቱን አገረ ሰላም ነው ብሎ ወደ ቤቱ ሲገባ አድብቶ ይገድለዋል፡፡ ይህ ወንጀለኛም በፖሊስ ተይዞ ጉዳዩ ወደ ፍርድ ቤት እንዲያመራ ይሆናል፡፡ ገዳይም ጥፋቱን በማመኑ ለፈጸመው ወንጀል የ15 ዓመት ጽኑ ቅጣት ተወስኖበት ወደ ወኅኒ ያመራል፡፡ ይህ የሕግ ታራሚም የተሰወነበትን ቅጣቱን ፈጽሞ በሰላም ወደ ቤቱ ይገባል፡፡

ከማረሚያ ቤት ተሰናብቶ ወደ ቤቱ የገባውን ደመኛውን ያየ የሟች ወንድምም ያን ሰው ከወኅኒ በወጣ ማግሥት አንድ ማታ ላይ ወደ ቤቱ ሲገባ አድብቶ በጦር ደረቱን በመውጋት የወንድሙን ደም ይበቀላል፡፡ ገዳይም በፖሊስ ተይዞ ወደ ፍርድ ቤት ይቀርባል፡፡ ዳኛውም ለዚህ ወንጀለኛ አንድ ጥያቄ ያቀርቡለታል፤ እንዲህ ሲሉ፡- ‹‹ለወንድምህ ገዳይ ለሆነው ወንጀለኛ ሰው በሕግ አግባብ ተገቢው ቅጣት ተሰጥቶት፣ ቅጣቱን ፈጽሞ ነው ከማረሚያ ቤቱ የተሰናበተው፡፡ ታዲያ በሕግ የተጣለበትን ተገቢውን ቅጣቱን ፈጽሞ የወጣን ሰው ለምን በጦር ወግቶ እንደገደለው ይጠይቁታል፡፡››

ገዳይም ለዳኛው እንዲህ ሲል መልስ ይሰጣል፡፡ ‹‹እውነት ነው ሕጉ ለወንድሜ ገዳይ ተገቢውን ቅጣት ሰጥቶታል፡፡ ግና እንደ ባህላችን የእኔና የእርሱ ቤተሰብ ዕርቅ አላወረደም፤ አልታረቀንም፡፡ እንደ ኖረው ባሕላችን ደም አፍሰን የእኔና የእርሱ ቤተሰብ ዕርቀ-ሰላም ማውረድ ነበረበት፡፡ ስለዚህ የወንድሜን ገዳይ የገደልኩት ስላልታረቅንና አሁንም ጠበኞች ስለሆንን እንጂ የፍርድ ቤቱን ሕግ ላለማክበር ወይም ሕጉ ተገቢውን ቅጣት አልሰጠውም በሚል አይደለም፡፡›› ሲል ፈርጠም ብሎ ምላሽ ይሰጣል፡፡

የዚህን የአቶ አሰፋ ከሲቶ አስገራሚና አሳዛኛ ገጠመኝ ተከትለን ጥቂት የውይይት ሐሳቦችን ለማንሳት ወደድኹ፡፡ በአገራችን የዘመናት ታሪክ ሂደት ውስጥ በሕዝቦች መካከል የተፈጠሩ ግጭቶችና አለመግባባቶች አንዳንዴም እጅግ ደም አፋሳሽ ወደኾኑ እልቂቶች ለማምራት መንገድ የጀመሩ አለመግባባቶችንና ግጭቶችን ለመፍታት አሉን የምንላቸው ሃይማኖታዊና ባህላዊ የግጭት አፈታትና ዕርቀ-ሰላም የማውረድ መልካም የሆኑ እሴቶቻችን በእኛ ዘመን በሚገባ ተጠብቀው አሉ ወይ?

እነዚህ በዋጋ ሊተመኑ የማይችሉ መልካም እሴቶቻችንስ ፋይዳቸውስ በቅጡ ጠንቶ፣ ታውቆና ታምኖበት፣ በሚገባ ተጠብቀው ለትውልድ እንዲተላለፉ በማድረግ ረገድስ ምን ያህል እየሠራን ነው?! የሰላም፣ የፍቅርና የዕርቅ መዝገብ ናቸው የሚባሉት የሃይማኖት ተቋማት መሪዎችና የሀገር ሽማግሌዎችስ በዚህ ዘመን የሰላም መልእክተኛ የመሆን መንፈሳዊ ግዴታችውን እንዴት እየተወጡ ነው… የሚሉ ወቅታዊ ጥያቄዎችን ማንሳት ያስፈልገናል፡፡

በታሪካችን፣ በሃይማኖቶቻችንና በባህላችን ውስጥ ለዘመናት ተከብረው የዘለቁ፣ ዛሬ አገራችንም ሆነ ዓለም ለሚተዳደርበትና ለሚመራበት ዘመናዊው ሕግና የፍትሕ ሥርዓት መሠረት የሆኑ የአብሮነት፣ የሰላም፣ የዕርቅና የፍቅር እሴቶቻችንንስ ለገባንበት ቀውስ ምን ያህል መፍትሔ እየኾኑን ነው?! በማለት አብረን ጥቂት እንቆዝም እስቲ፡፡

እንደ ሕዝብ በሰላምና በወንድማማችነት መንፈስ አስተሳስረውን የቆዩት እጅጉን ልንኮራባቸውና ልንጠብቃቸው የሚገቡን የሰላምና የዕርቅ መሠረት የሆኑ ሃይማኖታዊና ባህላዊ እሴቶቻችን እጅጉን እየተናዱብን ስለመሆኑ በርካታ ማሳያዎችን መጠቅስ የሚቻል ይመስለኛል፡፡

በመግቢያዬ ላይ ያቀርብኩት የቀድሞው የፍትሕ ሚ/ሩ የአቶ አሰፋ ከሲቶ አሳዛኝ ገጠመኝም ከሰላምና ከዕርቅ፣ ከአብሮነት፣ ከማኅበራዊ ኑሮአችንና መስተጋብራችን ጋር ሃይማኖታዊና ባህላዊ የሆኑ ዘመናትን ያስቆጠሩ መልካም እሴቶቻችን አሁን እየተመራንበት ካለው ከዘመናዊው ሕግ ጋር ቢያንስ በመርሕ ደረጃ ተናበውና ተስማምተው መሥራት ካልተቻለ፣ ለሃይማኖቱና ለባህሉ ከፍተኛ ግምትና ቦታ በሚሰጥ እንደ አገራችን ኢትዮጵያ ባሉ ሕዝቦች መካከል ዘመናዊው ሕግ ብቻውን ፍትሕን፣ ዕርቅንና ሰላምን ያሰፍናል ማለት እምብዛም ሊያራምድን እንደማይችል ትልቅ ማሳያ ነው፡፡

ይህን ጽሑፍ እያዘጋጀሁ እያለሁ Minority Rights Group International የተባለ ዓለም አቀፍ ተቋም ከጥቂት ዓመት በፊት ያወጣውን ሪፖርት ስመለከት ነበር፡፡ የዚህ ተቋም ጥናት ሪፖርት እንደሚያሳየው በዓለማችን  በግጭትና በቀውስ ውስጥ ካሉ ከግማሽ በላይ የሚሆኑት አገራት ከሰሃራ በታች የሚገኙ የአፍሪካ አገራት እንደሆኑ በማተት፤ ሪፖርቱ በእነዚህ አገራት የሚነሡ ግጭቶችንና አለመግባባቶችን በሰላም ለመፍታት በአገር፣ በአኅጉርም ሆነ በዓለም አቀፍ ደረጃ እየተሞከሩ ያሉ የግጭት አፈታት ዘዴዎችና ዕርቀ-ሰላምን ለማውረድ እየተደረጉ ያሉ ጥረቶች በዋንኛነት ያጋጠማቸውን ተግዳሮት እንዲህ ገልጾታል፡፡

ግጭትና አለመግባባት በሰፈነባቸውና አንዳንዴም እነዚህ አለመግባባቶችና ግጭቶች ተባብሰው ወደ እርስ በርስ ጦርነት በሚያመሩባቸው ማኅበረሰቦች መካከል የቆየው ባህላዊውና ሃይማኖታዊው የግጭት አፈታት ዘዴዎች ተገቢው ትኩረት እንደተነፈጋቸው ያስረግጣል፡፡ በተጨማሪም ይህን ሊፈጽሙና ሊያስፈጽሙ የሚችሉ በማኅበረሰቡ መካከል የሚፈሩና የሚከበሩ የማኅበረሰቡ መሪዎችና ሽማግሌዎች በሚገባ ተሳታፊ እንዲሆኑ ለማድረግ አለመቻሉ ወይም ጭራሹኑ አለመፈለግ በተለያዩ ደረጃዎች መንግሥት፣ የፀጥታ ኃይሎች፣ የፍትሕ አካላትና ዓለም አቀፍ ተቋማት የግጭቶቹን ምንጭ ከሥሩ ለማድረቅና ለመፍታት እያደረጉት ያለው ሙከራ እምብዛም ስኬታማ እንዳልሆነ ነው ሪፖርቱ ይፋ ያደረገው፡፡

ይኸው ሪፖርት ለማሳያነት ከተጠቀመባቸው አገራት መካከል ኡጋንዳንና ሀገራችንን ኢትዮጵያን ይጠቅሳል፡፡ በሀገራችንም ሆነ በሌሎች የአፍሪካ ሀገራት የሚነሱ ግጭቶችን ለመፍታት መንግሥትም ሆነ ዓለም አቀፍ ተቋማት የእነዚህ ሕዝቦች ሃይማኖት፣ ታሪክ፣ ባህልና ትውፊት ባላማከለ መልኩ የሚወስዷቸው የመፍትሔ ዕርምጃዎች አቅመ ደካማና ዘላቂነት የሌላቸው ጊዜያዊ ብቻ እንደሆኑ ነው ሪፖርቱ ያሳየው፡፡

የማይኖርቲ ራይት ኢንተርናሽናል ሪፖርት በማጠቃለያውም፡- ‹‹Activists from both in Ethiopia and Uganda emphasized the need to rely on traditional community methods to help curb the violence and the loss of lives. … However the traditional methods have neglected with the development of governmental structures.›› በማለት በአፍሪካ ሀገራት በተደጋጋሚ የሚከሰቱትን አለመግባባቶችንና ግጭቶችን መፍትሔ ለመስጠት የቆየው ባህላዊው የግጭት አፈታት ዘዴ ያለውንና ሊጫወት የሚችለውን ጉልህ ሚና በማስመር፤ ይሁን እንጂ እነዚህ ባህላዊ የሆኑ የግጭት አፈታት ዘዴዎችም ከዘመናዊው አኗኗር ዘዴና ከመንግሥታዊ የፍትሕ ተቋማት መስፋፋት ጋር ተያይዞ የመፍትሔ አካላት የመሆን ፋይዳቸው እየተዘነጋ እንዳለ ነው የደመደመው፡፡

እንግዲህ በመግቢያዬ የጠቀስኩትን የአቶ አሰፋ ከሲቶን አሳዛኝ ገጠመኝና ‘‘የማኖሪቲ ራይት ኢንተርናሽናል’’ ሪፖርት መሠረት አድርገን ለሺ ዘመናት በአኩሪ ታሪክ፣ በገናና ሥልጣኔ ቀድሞ የታወቀ፣ ከዓለም በፊት በሃይማኖትና በሚያስቀና ባህል ጥላ ሥር የኖረው ሕዝባችን ግጭቶችንና አለመግባባቶችን በሰላማዊ መንገዶች በመፍታት ረገድ ያጋጠመውን ተግዳሮት ከቅርብ ጊዜ ታሪካችንንና አሁን ያለንበትን ነባራዊ ኹኔታ ባናበበ መልኩ ጥቂት ለመወያያ የሚሆኑ፣ የሚጠቅሙ አሳቦችን ለማንሳት ልሞክር፡፡

እንደሚታወቀው ከምንኮራበት ገናና የሥልጣኔ ታሪካችን ባልተናነሰ ሌላኛውን የታሪክ ምዕራፋችንን ገጽ ስንገልጸው በበርካታ ግጭቶች፣ አለመግባባቶችና የእርስ በርስ ጦርነትና እልቂቶች የደመቀ የደም፣ የእልቂት ታሪክ ነው ያለን፡፡ አለን የምንላቸውን ልዩነቶቻችንን በመግባባት በሰላም፣ በጨዋ ደንብ ቁጭ ብሎ በሰላማዊ መንገድ ተነጋግሮ፣ ተወያይቶ ለመፍታት ያለን ቁርጠኝነትና ከልብ የሆነ ትጋትና ቅንነት ትልቅ ጥያቄ ውስጥ የወደቀ ነው፤ ብል እምብዛም ያጋነንኩ አይመስለኝም፡፡

የቅርብ ጊዜ የትናንትና ታሪካችን የሚነግረን እውነታ ቢኖርም ከገጠር እስከ ከተማ፣ ከአፈ ነቢብ እስከ ምሁር፣ ከአለቃ እስከ ምንዝር ድረስ በረጋና በሰከነ መንፈስ መነጋገር፣ መወያየት የሚል የጨዋ ወግ ከመካከላችን ተሰዶብን፣ እርስ በርስ ለመስማማት ባለመቻላችንና ከእኔ በቀር በሚል ትእቢትና ጋግርት በከንቱ የፈሰሰው የወንድማማቾች ደም፣ በዚህ ጦስም መጠጊያ፣ መደበቂያ ሽተው በባዕድ ምድር ተሰደው ያሉ የብሶተኛ ወገኖቻችን ቁጥር፣ የወደመው የአገር ሀብትና ንብረት የትየለሌ እንደሆነ ነው ታሪካችን የሚነግረን፡፡

ለዘመናት የቆየው የአብሮነት፣ የአንድነት ታሪካችን በቂም በቀል፣ በቁርሾ ታሪክ ትርክት ዳግም ታድሶና ነፍስ ዘርቶ ዛሬም ድረስ እርስ በርሳቸው ለቂም የሚፈላለጉ የአገራችን ሕዝቦች በእኛው መካከል አሉ፡፡ ላለፉት ዓመታት የታዘብነው መራር የሆነ እውነታም ይኸው ነው፡፡ እንደ ሕዝብ በፍቅር፣ በአንድነትና በወንድማማችነት መንፈስ በሰላምና በአብሮነት መኖር እንችል ዘንድ በአገራችን ለዘመናት የኖሩት የግጭት አፈታትና ዕርቀ-ሰላም የማውረድ ሃይማኖታዊና ባህላዊ መልካም የሆኑ እሴቶቻችን ተጠናክረው ይቀጥሉ ዘንድ ትኩረት ሊቸራቸው ይገባል፡፡

እነዚህ መልካም እሴቶቻችን የአንድነታችን ውበት፣ ጌጥና ሽልማት ሆነው ይቀጥሉ ዘንድ፣ መንግሥት፣ ምሁራን፣ የታሪክ ተመራማራዎች፣ የግጭት አፈታት ዘዴ አጥኚዎች፣ በሰላም ጉዳይ ላይ የሚሰሩ ምሁራንና የሰላም አምባሳደሮች፣ የሃይማኖት አባቶችና አገር ሽማግሌዎች የበኩላቸውን ጉልህ ሚና ሊጫወቱ ይገባል፡፡

ሰላም!

 

Click to comment

More in ነፃ ሃሳብ

  • የአብን ዕጩ ግድያ የአብን ዕጩ ግድያ

    ነፃ ሃሳብ

    የአብን ዕጩ ግድያ

    By

    የአብን ዕጩ ግድያ በቤንሻንጉል ጉሙዝ ክልል በመተከል ዞን ወንበራ ወረዳ ለክልል ምክር ቤት እጩ የነበረው አባላችን በሪሁን አስፈራው ላይ በመተከል ዞን በለስ ልዩ ቦታው ካርባር ግድያ የተፈፀመበት መሆኑን እያሳወቅን ፓርቲያችን በአባላችን ግድያ የተሰማውን መሪር ሐዘን ይገልጻል። የአማራ ብሔራዊ ንቅናቄ(አብን) በቀጣይ ግንቦት 2013 ዓ.ም በሚደረገው አገራዊ ምርጫ ተሳታፊ ከመሆኑ ጋር ተያይዞ በሁሉም የአገራችን ክፍሎች በርካታ እጩ ተወዳዳሪዎችን ያስመዘገበ መሆኑ ይታወቃል። ይሁን እንጅ በተለያዩ የአገራችን ክፍሎች በመንግስት ካድሬዎች በአባላቶቻችን ላይ ተደጋጋሚ ዛቻ፣ እስር እና ድብደባ እየፈተፀመ ይገኛል። በተለይ በኦሮሚያ ክልል እና በቤንሻንጉል ጉሙዝ ክልሎች በስፋት እንዲሁም አልፎ አልፎ በአማራ ክልል የተለያዩ አካባቢዎች የአባላት ማጉላላት፣ እስር እና ድብደባ እየደረሰ ይገኛል ። በተደጋጋሚ ጊዜ ሰላማዊ ዜጎችን ከመጨፍጨፍ እስከ ጅምላ ማፈናቀል የዘለቀው የቤንሻንጉል ጉሙዝ ክልል ቀደም ብሎ የክልሉ ካድሬዎች የተወዳዳሪዎች ምዝገባ እንዳይሳካ ለማድረግ ብዙ ጥረት ያደረጉ ቢሆንም በምርጫ ቦርድ ትብብር ምዝገባው ሊከናወን ችሏል። ከዚያ በኋላም የምርጫ ተወዳዳሪ እጩዎቻችን ቅስቀሳ ላይ በነበሩበት ወቅት ያለመከሰስ መብታቸውን በጣሰ መልኩ አስሮ በማጉላላት እና በማስፈራራት እጩዎቻችን ላይ አላስፈላጊ ጫና ለማሳረፍ ሞክሯል።  ይህ ሁሉ አልበቃ ያለው ቤኒሻንጉል ጉሙዝ መንግስት የፀጥታ ሰወች ለክልል ምክር ቤት እጩ ተወዳዳሪያችን የነበረውን አቶ በሪሁን አስፈራው ከቻግኒ ወደ በለስ ጉዞ ላይ እያለ ልዩ ቦታው ካርባር ላይ ግድያ ፈፅሞበታል። አብን ግድያው ፖለቲካዊ መሰረት ያለውና ንቅናቄው በቤኒሻንጉል ጉምዝ ክልል የሚያደርገውን እንቅስቃሴ ለመገደብ ሆነ ተብሎ የተደረገ እንደሆነ ያምናል። ለዚህም የወንድማችንን ግድያ ጨምሮ በአሶሳ እና አካባቢው በተደጋጋሚ ጊዜ በእጩዎቻችንና አመራሮቻችን ላይ ሲፈፀሙ የነበሩ ምክንያት አልባ እስሮችና ወከባዎች ከበቂ በላይ አስረጂዎች ናቸው። በመላው ኢትዮጵያ በተለይም የግጭት ተጋላጭ በሆኑ አካባቢዎች ምርጫ ሲቃረብ መሰል ግድያዎች፣ ጭፍጨፋዎች፣ ማፈናቀሎችና ወከባወች እንደሚኖሩ ደጋግመን ለመንግስት ያሳሰብን ቢሆንም ከስሕተቱ መማር ያልፈለገው መንግስት ዛሬም ድረስ ዜጎች በጅምላ እና በተናጥል ሲገደሉ፣ ሲፈናቀሉ እና ኃብት ንብረታቸው ሲወድም በዝምታ እየተመለከተ ይገኛል። ፓርቲያችን አብን ይህ ጉዳይ ቀስ በቀስ አገር የሚያፈርስ አደገኛ ጉዳይ መሆኑን ይገነዘባል። ሰላማዊ እና ፍትኃዊ ምርጫ ይደረጋል የሚለውን የዜጎች ተስፋም ከወዲሁ ያጨለመ ነው የሚል ግምገማ ላይ ደርሰናል። አስቸኳይ የእርምት እርምጃ እንዲወሰድም አበክሮ የሚታገልበት ይሆናል። ስለሆነም አብን መንግስት በምርጫ እጩ አባላችን ላይ የተፈፀመውን ግድያ በአስቸኳይ እንዲመረምር እና ገዳዮችን ለፍርድ እንዲያቀርብ በአንክሮ እየጠየቀ፤ መሰል ነገሮች አፋጣኝ ምላሽ ተሰጥቶባቸው ለምርጫ እጩዎቻችን ተገቢው የጸጥታ ከለላ በመንግስት በኩል እንዲሰጥ እናስገነዝባለን። ይህ ሳይሆን ቀርቶ በእንዝላልነት ተጨማሪ ሕይወት ቢጠፋ እና አገራችን ወዳልተፈለገ ምዕራፍ ብትገባ ተጠያቂነቱ ሙሉ ለሙሉ መንግስት የሚወስድ መሆኑን ከወዲሁ አብክረን ማሳሰብ እንወዳለን። ለሰማዕቱ ወንድማችንና ጓዳችን አቶ በሪሁን አስፈራው ቤተሰቦችና ለመላው የንቅናቄያችን አባላትና ደጋፊወች መጽናናትን እንመኛለን። የአማራ ብሔራዊ ንቅናቄ(አብን)

  • ብዙ የሀገር ዋርካዎች እንዳቀረቀሩ አልፈዋል፡፡ ክቡር ጠቅላይ ሚኒስትር እናመሰግናለን ብለው እውቅና ስለሰጧቸው የጥበብ አንጋፋዎች እኛም እርስዎን እናመሰግናለን፤ ብዙ የሀገር ዋርካዎች እንዳቀረቀሩ አልፈዋል፡፡ ክቡር ጠቅላይ ሚኒስትር እናመሰግናለን ብለው እውቅና ስለሰጧቸው የጥበብ አንጋፋዎች እኛም እርስዎን እናመሰግናለን፤

    ነፃ ሃሳብ

    ብዙ የሀገር ዋርካዎች እንዳቀረቀሩ አልፈዋል፡፡ ክቡር ጠቅላይ ሚኒስትር እናመሰግናለን ብለው እውቅና ስለሰጧቸው የጥበብ አንጋፋዎች እኛም እርስዎን እናመሰግናለን፤

    By

    ብዙ የሀገር ዋርካዎች እንዳቀረቀሩ አልፈዋል፡፡ ክቡር ጠቅላይ ሚኒስትር እናመሰግናለን ብለው እውቅና ስለሰጧቸው የጥበብ አንጋፋዎች እኛም እርስዎን...

  • የሰባት ቁጥር ምስጢርና የይባቤ አዳነ አዲስ ሥራ፡፡ የሰባት ቁጥር ምስጢርና የይባቤ አዳነ አዲስ ሥራ፡፡

    ነፃ ሃሳብ

    የሰባት ቁጥር ምስጢርና የይባቤ አዳነ አዲስ ሥራ፡፡

    By

    የሰባት ቁጥር ምስጢርና የይባቤ አዳነ አዲስ ሥራ፡፡ ሰባት ቁጥርና ሕይወት፤ (አፈወርቅ ልሣኑ ~ ድሬቲዩብ) ሰባት ቁጥር...

  • ከኢትዮጵያ ሕዝብ ዕንባ ጠባቂ ተቋም ወቅታዊ ሀገራዊ ጉዳዮች አስመልክቶ የተሰጠ ጋዜጣዊ መግለጫ (Press Release) ከኢትዮጵያ ሕዝብ ዕንባ ጠባቂ ተቋም ወቅታዊ ሀገራዊ ጉዳዮች አስመልክቶ የተሰጠ ጋዜጣዊ መግለጫ (Press Release)

    ነፃ ሃሳብ

    ከኢትዮጵያ ሕዝብ ዕንባ ጠባቂ ተቋም ወቅታዊ ሀገራዊ ጉዳዮች አስመልክቶ የተሰጠ ጋዜጣዊ መግለጫ (Press Release)

    By

    ከኢትዮጵያ ሕዝብ ዕንባ ጠባቂ ተቋም ወቅታዊ ሀገራዊ ጉዳዮች አስመልክቶ የተሰጠ ጋዜጣዊ መግለጫ (Press Release) “መንግስት የህግ...

  • ፖለቲከኞቻችን፣ዲያስፖራው፣ ሚዲያዎቻችን እና ማኀበረሰብ አንቂዎቻችን ከምንጊዜውም በላይ ኢትዮጵያና ኢትዮጵያዊነት በእሳት የሚፈተኑበት ወቅት ነው፤ እናስተውል ታሪክ ሰሪ እንጂ የታሪክ ተወቃሽ አንሁን ፖለቲከኞቻችን፣ዲያስፖራው፣ ሚዲያዎቻችን እና ማኀበረሰብ አንቂዎቻችን ከምንጊዜውም በላይ ኢትዮጵያና ኢትዮጵያዊነት በእሳት የሚፈተኑበት ወቅት ነው፤ እናስተውል ታሪክ ሰሪ እንጂ የታሪክ ተወቃሽ አንሁን

    ነፃ ሃሳብ

    ፖለቲከኞቻችን፣ዲያስፖራው፣ ሚዲያዎቻችን  እና ማኀበረሰብ አንቂዎቻችን ከምንጊዜውም በላይ ኢትዮጵያና ኢትዮጵያዊነት በእሳት የሚፈተኑበት ወቅት ነው፤

    By

    ፖለቲከኞቻችን፣ዲያስፖራው፣ ሚዲያዎቻችን  እና ማኀበረሰብ አንቂዎቻችን ከምንጊዜውም በላይ ኢትዮጵያና ኢትዮጵያዊነት በእሳት የሚፈተኑበት ወቅት ነው፤ እናስተውል ታሪክ ሰሪ...

Trending

Advertisement News.et Ad
To Top