Connect with us

Art and Culture

ዘመን ባለፈ ቁጥር ዘመን የሚናፍቀው ደራሲ ስብሐት ገብረ እግዚአብሔር

Published

on

ሚያዚያ 27 የታላቁ ደረሲ የልደት ቀን፡፡ ዘመን ባለፈ ቁጥር ዘመን የሚናፍቀው ደራሲ ስብሐት ገብረ እግዚአብሔር
ከሄኖክ ስዩም /ተጓዡ ጋዜጠኛ/ በድሬ ቲዩብ

ኢትዮጵያውያን ስራ ዘግተው የልደቱን ቀን የሚዘክሩለት ደራሲ ነው፡፡ ልደቱ የኢትዮጵያ የድል ልደት ሲከበር አብሮ ይከበራል፡፡ ስበሐት ገብረ እግዚአብሔር የተወለደው ሚያዚያ 27 ቀን ነው፡፡ ዓመቱን አስራ ዘጠኝ ካያ ስምንትም ካያ ዘጠኝም ይሉታል፡፡ ለቁጥር ግድ ከሌለው ደራሲ እንቅጯን ተናገር የሚለው ስለሌለ የተወለደበት ዓመት በቅንፍ በተቀመጠ ሁለት ምርጫ ይገለጻል፡፡

የተወደለው ርባ ገረድ ነው፡፡ የተወለደባትን መንደር አውቃታለሁ እዚያ ተወልዶ አዲስ አበባን እንዳሻው የኖረባት አራዳ ነው፡፡ አዲስ አበባን እንደ ስብሐት ካለው ጨላጣ ውጪ ከማን ጋር ልናመሳስላት እንችል ይኾን?

በቁሙ ተረት የኾነው ሰውዬ ደራሲ ብቻ አይደለም፡፡ የተናገረው እንደ ወንዝ ከቀዬ ቀዬ እየፈሰሰ ከየሰው የልብ ማሳ ስንቱን ያለማ ነው፡፡ ያጠፋም አለ የሚሉ አሉ፡፡ ከባህላችን ያፈነገጠ ሰው ነው ለሚሉት ባህላችን መሸከም የማይችለውን ለሰው መኾን አሳይቶ አልፏል፡፡ ባህላችን አበላሸ ሲሉት ባህላችን በሆነ ብለን በምንመኘው ለጋስነት ባዶ እስኪሆን መስጠትን አስተምሯል፡፡

ፈጣሪን ይደፍራል ሲሉት ፈጣሪ ትውልድን ሲማጽን የኖረውን ነዋይ ናቁ ብሂል በአደባባይ እውን አድርጎ ፈጣሪን የሚያከብሩ ለሀብት ሲንገበገቡ ሃብትን ንቋት አልፏል፡፡ ስብሐት የበቃ ጸሐፊ ነው፡፡ በቋንቋው በሀሳቡ በፍልስፍናውና በእውቀቱ የማይታማ የበቃ ጸሐፊ፤
ዘነበ ወላ የታላቁን ሰው ግለ ታሪክ ጥሩ አድርጎ አስቀምጦልናል፡፡ ብዙ ዘመናት ሲያልፉ እንደ ደርሳን ብዙ የሚነገርለት የጽሑፍ ማስረጃ ይኾናል፡፡ አለማየሁ ገላጋይ ሕይወቱና ክህሎቱን ዳስሶ ሰርቶልናል፡፡ ብዙ ሰዎች በስራዎቹ ዙሪያ ብዙ ምርምር ብዙ ጥናት አድረገው ብዙ ሲሉን ኖረዋል፡፡ ሳስበው ስብሐት ወደፊት የሚባለው የሚበልጥ ይመስለኛል፡፡

የስብሐት መልካም ቀን የሚመጣው አረጋውያኑ የአዲስ አበባ ዩኒቨርሲቲ የሥነ-ጽሑፍ ምሁራን ስብሐት ወደ ሄደበት ሲሄዱ አዲሱ ትውልድ መካነ አእምሮን ሲረከብ ያኔ ሥራዎቹ ብዙ የሚያነጋግሩ የትምህርቱ ዓለም ቋንቋዎች ይኾናሉ፡፡

ስብሐት ንግግሮቹና ሳቁ ብዙዎቹ ዘንድ የአሁን ያህል ተከስተው ብዙ ዘመን የኖሩ ናቸው፡፡ በዘነበ ቋንቋ ልንገራችሁ፤ ዘነበ እንዲህ ይላል፡፡ “አሳሳቁ ከልብ ነው፡፡ ፍንድቅ ብሎ ሲንከተከት አይኖቹ በእንባ ይሞላሉ፡፡ ለሚያየው ሰው በደስታ የሰራ አካላቱ እንዲዝናና የማድረግ ኃይል አለው፡፡”

ስብሐት ደራሲ ብቻ አይደለም፡፡ የንባብ ባህል ወጣቱ ላይ ሲያስፋፋ የኖረ መምህርም ነበር፡፡ ስብሐት ሰጪ ብቻ አልነበረም፡፡ ወጣቶች ያላቸውን እንዲሰጡ የሚያነሳሳ ብዙ ጸሐፍት እንዲፈጠሩ ያደረገም ነበር፡፡

ስብሐት በየጥጉ ቆምው እንዲህ ነው የሚሉት ሰው አይደለም፡፡ እዚህ ሆነው እንዲህ ነው ሲሉት ማዶ ሌላ ሆኖ የኖረ ይህቺን ዓለም ንቆ በከተማ መካከል እንደ መናኝ የተመላለሰ፤ ችግርን ሀብት ባለመፈለግና ጥሪት ባለማጠራቀም ድል ያደረገ ሰው ነበር፡፡ ይህ ሰው ሚያዚያ 27 ቀን ተወለደ፡፡

Trending

By continuing to use the site, you agree to the use of cookies. more information

The cookie settings on this website are set to "allow cookies" to give you the best browsing experience possible. If you continue to use this website without changing your cookie settings or you click "Accept" below then you are consenting to this.

Close