Connect with us

Ethiopia

ምክትል ጠ/ሚኒስትሩ በግጭቶች ለደረሱ ጉዳቶች ተጠያቂው መንግሥት መሆኑን አመኑ

Published

on

ምክትል ጠ/ሚኒስትሩ በግጭቶች ለደረሱ ጉዳቶች ተጠያቂው መንግሥት መሆኑን አመኑ

የኢፌድሪ ምክትል ጠ/ሚ ደመቀ መኮንን እስካሁን እየደረሰ ባለው ጉዳትና የዜጎች አለመረጋጋት ዋናው ተጠያቂ መንግስት ነው አሉ።

“ችግሮች ሁሉ የአፈፃፀም ክፍተቶች ናቸው እያሉ ምክንያት መደርደር አያዋጣም” ያሉት አቶ ደመቀ አሁን ላይ ዜጎች ተከባብረው የሚኖሩባት ሃገር መገንባት ግድ ከሚልበት ደረጃ ላይ መደረሱን ተናግረዋል፡፡

ይህን ለማስተካከልና ለማረም አቅጣጫ መቀመጡንም ጠቅሰው የፀጥታ መዋቅሩ ተጠያቂነት ባለው መንገድ ዜጎችን ከስጋት ነፃ በሆነ መንገድ እንዲታደግም ክትትል ይደረጋል ብለዋል።

በኢትዮጵያ አንዳንድ አካባቢዎች የሚስተዋለውን የሰላም መደፍረስና የዜጎችን የደህንነት ስጋት በአጭርና በዘላቂነት ለማስተካከል መንግስት ቁርጠኛ አቋም ይዞ እየሰራ መሆኑን ምክትል ጠቅላይ ሚኒስትር ደመቀ መኮንን ጠቁመዋል።

የፖለቲካና የፀጥታ መዋቅሩን ያሳተፈ ሀገራዊና ክልላዊ ጉዳዮችን የሚገመግም ውይይት በትላንትናው ዕለት በባህር ዳር ከተማ ተካሂዷል፡፡

ምክትል ጠቅላይ ሚኒስትሩ ትላንት ማምሻውን በሰጡት መግለጫ እንዳስታወቁት በሃገሪቱ የለውጥ ጎዳና ጉዞ ብዙ ውጤቶች ማስመዝገብ ተችሏል፡፡

ሆኖም ከለውጡ ጋር በተያያዘ በሃገሪቱ አንዳንድ አካባቢዎች የዜጎች መፈናቀልና ጉዳት የእለት ከእለት ተግባር እየሆነ መጥቷል፡፡

” ባለፉት ወራትም በክልሉ እና በቤንሻንጉል ጉምዝ ክልል የተፈጠረው ክስተት ሁሉንም ያሳዘነ ነው” ብለዋል፡፡

በተለይም ዜጎች በነፃነት ለመኖር ታግለው ያመጡትን ለውጥ ተጠቃሚ ሆነው ሳይጠግቡ የተከሰተው የአለመረጋጋት ችግር የሁሉንም ኢትዮጵያዊ ልብ የሰበረ ነው፡፡

” በተለይም ኑሮን ለማሸነፍ ደፋ ቀና የሚሉ ዜጎች ባላወቁት፣ባለሳቡትና ባልገመቱት መንገድ ዘርን መሰረት ተደርጎ እየደረሰ ያለው ጉዳት ያማል” ብለዋል፡፡

” መንግስት ህግና ስርዓት እንዲከበር ካላደረገ የትኛውም ለውጥ ብናሞካሽና መፍትሄ ሰጠን ብለን ብናነሳ ህዝብን የሚያረካና የሚያረጋጋ አይደለም”ብለዋል፡፡

አሁን ላይ በየአካባቢው የሚስተዋለው የሰው ህይወት መጥፋት ፣ መፈናቀል፣ የአካል ጉዳትና የንብረት ውድመት ለማስቆም መንግስት በቁርጠኝነት እየሰራ መሆኑን አስታውቀዋል።

ከአጭር ጊዜ አኳያም የህግ የበላይነትን ማረጋገጥ የሚያስችል በየአካባቢ ችግር ሲከሰት ፈጥኖ የሚደርስ የፀጥታ መዋቅር በቅርበት ማስቀመጥ፣ ተገቢውን ክትትልና ድጋፍ ማድረግ የተቀመጠ አቅጣጫ ነው “ብለዋል፡፡

መተከል፣ ጃዊና አካባቢ የበለጠ እንዲረጋጋና መፈናቀል እንዳይኖር ተጨማሪ የፀጥታ ሃይል ይላካል፤ በሌሎች የፀጥታ ስጋት ባለባቸው አካባቢዎችም እንዲሁ፡፡

በብጥብጡ እጃቸውን ያስገቡ አመራርም ሆነ ሌሎች አካላት ተገቢውን የማጣራት ስራ በማከናወን መንግስት ጠንካራ እርምጃ ይወሰዳል፤ ይህን የሚያጣራ ግብረ ኃይልም መቋቋሙን አስታውቀዋል።

በዘላቂነት ደግሞ የኃይማኖት አባቶችን፣ የሃገር ሽማግሌዎችንና ሌለውን የህብረተሰብ ክፍል ያሳተፈ ውይይትና መግባባት መፍጠር በውይይቱ የተቀመጠ አቅጣጫ መሆኑን አቶ ደመቀ አስረድተዋል፡፡

በውይይቱ የመከላከያ ሰራዊት፣ የደህንነት፣ የአማራና የቤንሻንጉል ጉምዝ ክልል የፖለቲካና የፀጥታ አመራር አካላት ተሳትፈዋል፡፡
(ምንጭ – ኢዜአ)

Trending

By continuing to use the site, you agree to the use of cookies. more information

The cookie settings on this website are set to "allow cookies" to give you the best browsing experience possible. If you continue to use this website without changing your cookie settings or you click "Accept" below then you are consenting to this.

Close