Connect with us

Art and Culture

እንኳን ለብርሃነ ትንሳኤው በሰላም አደረሳችሁ!

Published

on

እንኳን ለብርሃነ ትንሳኤው በሰላም አደረሳችሁ !

እንኳን ለብርሃነ ትንሳኤው በሰላም አደረሳችሁ!
“እንደተናገረ ተነሥቶአልና በዚህ የለም !”
(ኃይሌ ተስፋዬ በድሬቲዩብ)
።።።።።።።።።
ይህ ቃል በጌታ ተከታዮችና በአይሁድ ጠባቆች መካከል የገባ፥ የጌታ መልአክ የምስራች ቃል ንግግር ነው ። ቃሉ ለሐዋርያቱ ደስታንና ተስፋን ሲፈጥር፥ ለጠባቆቹ ደግሞ ድንጋጤንና ሀፍረትን ፈጥሮባቸዋል።

በሰንበት መጨረሻ ተብሎ በተጠቀሰው በእሁድ ማለዳ መግደላዊት ማርያምና ሌሎች ሴቶች የጌታን ሥጋ ሽቱ ለመቀባት ሽተው ወደ መቃብሩ በሄዱበት ጊዜ፥ የጌታ መልአክ ከሰማይ ስለወረደ ታላቅ የምድር መናወጥ ሆነ። መልአኩም፥ መቃብሩ ተዘግቶበት የነበረውን ታላቅ ድንጋይ አንከባሎ በላዩ ተቀመጠበት።

ይህ ሲሆን የአይሁድ ጠባቆች በፍርሃት እንደ በድን ሆነው ወደቁ። ሴቶቹን ግን መልአኩ እንዲህ አላቸው ፦ እናንተስ አትፍሩ የተሰቀለውን ኢየሱስን እንድትሹ አውቃለሁና፤ እንደተናገረ ተነሥቶአልና በዚህ የለም፤ የተኛበትን ስፍራ ኑና እዩ። ሲል መቃብሩ ባዶ መሆኑን ሲያረጋግጥላቸው እናያለን። ይህ የመልአኩ ምስክርነት አንደኛ፡ የኢየሱስ ሥጋ በመቃብር አለመበስበሱን ማሳየት ሲሆን፥ ሌላኛው ሐሳብ ደግሞ፥ ኢየሱስ በገሊላ በሕያው አካልነቱ መኖሩንና እርሱን እንዲያገኙት ጥቆማ መስጠትን ያመለክታል።

ይህ በእንዲህ እንዳለ ሌሎቹ ሴቶች ኢየሱስ ከሞት መነሳቱን ለደቀ መዛሙርቱ ለመንገር እየሮጡ ሄዱ። መንገድ ላይ እያሉ ኢየሱስ አገኛቸውና “ሰላም ለእናንተ ይሁን!” አላቸው። እነሱም እግሩ ላይ ወድቀው “ሰገዱለት።” ከዚያም ኢየሱስ “አትፍሩ! ሂዱና ወደ ገሊላ እንዲሄዱ ለወንድሞቼ ንገሯቸው፤ እዚያም ያዩኛል” አላቸው።

እውነት ነው፥ ቅዱስህን መበስበስን ያይ ዘንድ አትሰጠውም ተብሎ በልበ አምላክ ቅዱስ ዳዊት የተነገረው ቃል ተፈጸመ። እርሱን ሞት ይይዘው ዘንድ አልቻለምና። የክርስቶስ ትንሳኤ ሊዳፈን፣ ሞት እንኳን ሊረታው የማይችል ጽኑዕ ኀይል ነው። ትንሳኤውን ለማጨናገፍ የጨለማ አበጋዞች በአንድ አድመው ሊበረቱ ቢሞክሩም፥ የትንሳኤው ብርሃን ጨለማን እየገለጠ፣ የጨለማ ኀይላትንና ሊቃናትን እንዲሁም የጨለማን አሠራርን ሁሉ እየገለባበጠ ወደ ጥልቁ አውርዷል። ጨለማም በብርሃን፣ ሀሰትም በእውነት ተሸንፏል።

አዎን፥ ይህንን ጌታ ሞት ይይዘው ዘንድ አልቻለምና እንደ ቃሉ ተነሥቶአል! እርሱን ኀጢአት እንዳላሸነፈው፥ በሞት፣ በሲኦልና በገሃነምም ላይ እንዲሁ ነግሷል። በመሆኑም ሞቱና ትንሳኤው፦ የሐሰተኛ ጉባኤ ያፈረበት፣ አለማመን የራቀበት፣ሞት የደነገጠበት፣ ሲኦል ምርኮውን የተበዘበዘበት፣ አብዮት ጠባቂዎች እንደ ሙት የሆኑበት፣ መቃብር የተሸበረበት የድል ምልክታችን ነው።

ትንሳኤው፦ ከሞት ወደ ሕይወት የወጣንበት የድላችን አርማ ነው፣ ትንሳኤው ኢየሱስ የእግዚአብሔር ልጅ “ክርስቶስ” መሆኑ የተገለጠበት ሐቅ ነው፣ ትንሳኤው ለእኛ ለምዕመናን የመጽደቃችን ቁልፍ ሐሳብ ነው። ክብር ሁሉ ለትንሳኤው ጌታ ለኢየሱስ

ክርስቶስ ይሁን! አሜን!
ሥለዚህም እንዲህ እንላለን፦
ክርስቶስ ተንስአ እሙታን− በአብይ ኀይል ወስልጣን
አሰሮ ለሰይጣን − አግአዞ ለአዳም
ሰላም− እምይእዜሰ
ኮነ− ፍስሐ ወሰላም።

ለመላው የክርስትና እምነት ተከታዮች በሙሉ መልካም የትንሳኤ በዓል ይሁንላችሁ !
( ማቴዎስ 28፥ 1- 9 , የሐዋ ስራ 2 ፥ 24, የሐዋ 2፥ 25)

Trending

By continuing to use the site, you agree to the use of cookies. more information

The cookie settings on this website are set to "allow cookies" to give you the best browsing experience possible. If you continue to use this website without changing your cookie settings or you click "Accept" below then you are consenting to this.

Close