Connect with us

Business

የሚድሮክ ለገደምቢ የወርቅ ማምረቻ እገዳ እንዲነሳ የተሰጠ ውሳኔ አለመኖሩን ሚኒስቴሩ አስታወቀ

Published

on

የሚድሮክ ለገደምቢ የወርቅ ማምረቻ እገዳ እንዲነሳ የተሰጠ ውሳኔ አለመኖሩን ሚኒስቴሩ አስታወቀ

የማዕድንና ነዳጅ ሚኒስቴር የሚድሮክ ለገደምቢ የወርቅ ማምረቻ ኩባንያን የፈቃድ ዕገዳ እንደተነሳና የተቋሙ ከፍተኛ አመራሮች በዝግ ስብሰባ ገልፀዋል ተብሎ የሚነገረው ዘገባ ሐሰት እንደሆነ ማሳወቅ መሆኑን አስታወቀ፡፡

የኩባንያውን ፈቃድ ለማደስ ተጀመረው ጥናት አለመጠናቀቁን ጠቆመው ሚኒስቴሩ እስካሁን የተወሰነ ነገር የለም ብሏል፡፡ (የመግለጫው ሙሉ ቃል እነሆ)

……..

የማዕድንና ነዳጅ ሚኒስቴር የሚድሮክ ለገደምቢ የወርቅ ማምረቻ ኩባንያን ፈቃድ ከአካባቢው ህዝብ በቀረበ ጥያቄና አቤቱታ ምክንያት ከግንቦት 1 ቀን 2010 ዓ.ም ጀምሮ ማገዱ ይታወቃል፡፡ በሃገራችን የማዕድናት ፍለጋና ልማት ላይ ከተሰማሩ ኩባንያዎች መካከል አንዱ የሚድሮክ ለገደምቢ ኩባንያ ሲሆን ከአካባቢው ህብረተሰብ የአካባቢ ብክለትና በሰውና እንስሳት ላይ የጤና ጉዳት ደርሶብናል የሚል ቅሬታ በመቅረቡ የተሰጠው የፈቃድ ዕድሳት ለጊዜው በማገድና የቀረበውን አቤቱታ መነሻ በማድረግ የአካባቢ ተፅዕኖ ግምገማ በአገር ውስጥና በውጭ ሃገር የተለያዩ ሙያተኞችን እንዲሁም የህብረተሰብ ክፍሎች ባካተተ መልኩ ሰፊና ጥልቅ ጥናት እየተካሄደ የቆየ ሲሆን በአጭር ጊዜ ውስጥም ይጠናቀቃል፡፡ ይህ ጥናት መጠናቀቅም ለአካባቢው ማህበረሰብ፣ ለኩባንያውና ለሚኒስቴር መስሪያቤታችን ቀጣይ መከናወን የሚገባቸው ተግባራት እጅግ ጠቃሚ ይሆናል፡፡

የዚህ ጥናት ውጤት ገና በመሆኑ በሚኒስቴር መስሪያ ቤታችን በኩል እስካሁን የተወሰነ ነገር ባይኖርም ባለፉት ጥቂት ቀናት በአንዳንድ ሚዲያዎች የኩባንያው የፈቃድ ዕገዳ እንደተነሳና የተቋሙ ከፍተኛ አመራሮች በዝግ ስብሰባ ገልፀዋል ተብሎ የሚነገረው ዘገባ ሐሰት እንደሆነ ማሳወቅ እንወዳለን፡፡

ከመጋቢት 09 –10 2011 ዓ.ም የተካሄደው በተቋማችን የተዘጋጁትን ረቂቅ የማዕድንና ነዳጅ ፖሊሲዎች ከማዕድን ስራዎች ምክር ቤት በማቅረብ ግብዓት ለማሰባሰብ የተደረገና ለሚዲያዎች ዝግ ያልነበረ ብቻ ሳይሆን ሁሉንም ሚዲያዎች በይፋዊ ደብዳቤዎችና በሚኒስቴር መስሪያቤታችን የማህበራዊ ገፅ አድራሻዎቻችን ጥሪ ያደረግንና በርካታ የቴሌቪን ጣቢያዎች፣ጋዜጦች እና ማህበራዊ ሚዲያ ዘጋቢዎች የተገኙበት መድረክ ሲሆን የሚድሮክ ኩባንያ ጉዳይ እንደ አጀንዳ ያልቀረበና የሚካሄደው ጥናት ባለመጠናቀቁ ያልተወያየንበት ነበር፡፡

በማዕድን ኩባያዎችና በህብረተሰቡ መካከል ጤናማና የትብብር ግንኙነት እንዲፈጠር የማዕድን ኩባያዎች ለማዕድናት ፍለጋና ልማት በክልሎችም ይሁን በፌደራል ደረጃ ፈቃድ ሲወስዱ ከሚፈርሟቸው ስምምነቶችና ማሟላት ከሚጠበቅባቸው ግዴታዎችና መካከል የአካባቢና ማህበረሰብ በማይጎዳና ተጠቃሚነታቸውን ባረጋገጠ መልኩ ስራቸውን እንዲያከናውኑ የሚያስገድድ ስምምነት ይገኝበታል፡፡ ይህ ስምምነት በተግባር ላይ እንዲውልና ልማቱ ህግን መሰረት ባደረገ መልኩ እንዲከናወንም ሚኒስቴር መስሪያ ቤታችን ክትትልና ቁጥጥር ያደርጋል፡፡

ሚኒስቴር መስሪያ ቤታችን የዜጎቻችን ደህንነትና ጤና የሚጎዱ አሰራሮችን በሚመለከት ለድርድር የማያቀርብ መሆኑን እየገለፅን በሂደት ላይ ያለው ጥናት ሲጠናቀቅ ውጤቱን ለህዝብ ይፋ የምናደርግና ከሁሉም ባለድርሻ አካላት ጋር መክረን ውሳኔ የምንሰጥበት ጉዳይ እንጅ የየትኛውንም ወገን ፍላጎት ለሟሟላት ሲባል ከጥናቱና የአካባቢው ማህበረሰብ ፍላጎት የሚቃረን ውሳኔ የማናሳልፍ መሆኑን በአፅንኦት እንገልፃለን፡፡ ህብረተሰቡም ከመሰል የፈጠራ ዘገባዎች ራሱን እንዲጠብቅ እንጠይቃለን፡፡

የማዕድንና ነዳጅ ሚኒስቴር

Trending

By continuing to use the site, you agree to the use of cookies. more information

The cookie settings on this website are set to "allow cookies" to give you the best browsing experience possible. If you continue to use this website without changing your cookie settings or you click "Accept" below then you are consenting to this.

Close