Connect with us

Ethiopia

ለካስ ቤተመንግሥቱ በተደራጁ ሌቦች ሲመዘበር ነበርን?

Published

on

ለካስ ቤተመንግሥቱ በተደራጁ ሌቦች ሲመዘበር ነበርን?

ለካስ ቤተመንግሥቱ በተደራጁ ሌቦች ሲመዘበር ነበርን? | በጫሊ በላይነህ

አንዳንድ ነገር ለሰሚው ግራ ነው፡፡ ብሔራዊ ቤተመንግሥት እንደማንኛውም የመንግሥት መ/ቤት ዓመታዊ በጀት የሚሰፈርለት ተቋም ነው፡፡ ዓመታዊ በጀቱ ደግሞ እያንዳንዱ ወጪ ተዘርዝሮ ቀርቦ በገንዘብና ኢኮኖሚ ልማት ሚኒስቴር ተመርምሮና ተደግፎ ለፓርላማው ቀርቦ የሚጸድቅ ነው፡፡

ይህም ሆኖ የቤተመንግሥቱ ተቀጣሪ ሳይሆኑ፣ በይፋ የተፈቀደ ጥቅማጥቅም ሳይኖራቸው በስልክና የኢንተርኔት አገልግሎቶችን ጨምሮ ለግለሰቦች በሚውሉ መስተንግዶዎች ምክንያት በየዓመቱ ከ11 ሚሊየን ብር በላይ ለግል ጥቅም ሲውል መቆየቱ እንደዋዛ ይፋ ሆኗል፡፡ የስልክና የኢንተርኔት መስመሮቹ ብቻ ብዛታቸው 300 ሲሆን ለዚህ ብቻ ወጪው በዓመት 5 ሚሊየን ብር ገደማ መሆኑም ተነግሯል፡፡ የገንዘቡም መጠን ሆነ የአገልግሎቱ ጉድለት ከሁለት አስርት ዓመታት በላይ የቆየ ሲሆን፥ ይህም ወደ ገንዘብ ሲለወጥ በ100 ሚሊየን ብር የሚገመት ነው ተብሏል፡፡ ያው ቤተመንግሥቱ በግልጽ ለማያውቃቸው ግለሰቦች የዓመት ቀለብ ሲሰፍር ኖሯል፡፡

ይህ ምን ማለት ነው? እንዴት ነው ግለሰቦች የአንድን ግዙፍ ተቋም ገንዘብና ሐብት ሊምነሸንሹበት የቻሉት? ሰዎቹ እነማን ናቸው? የቤተመንግሥትንስ በጀት ለምን መጠቀም ፈለጉ? በየዓመቱ 11 ሚሊየን ብር ለግለሰቦች ጥቅም ሲውል የቤተመንግሥቱ አስተዳደር የማንን ጎፈሬ ያበጥር ነበር? መልስ የሚያሻቸው አንገብጋቢ ጥያቄዎች ናቸው፡፡

እንደፋና ዘገባ ይህ ዓይነቱ ዓይን ያወጣ ምዝበራ ለ 20 ዓመታት ያለከልካይ የቆየ ነው፡፡ የቀድሞ ፕሬዚደንቶች ዶ/ር ነጋሶ ጊዳዳ እና የመቶ አለቃ ግርማ ወ/ጊዮርጊስ በሥልጣን ላይ እያሉ ይህ ምዝበራ ነበር፡፡ የቀድሞ ፕሬዚደንቶቻችን ይህን አያውቁም ነበርን? መረጃ አልነበራቸውምን?

ፕሬዚደንት ሳህለወርቅ ዘውዴ በተሾሙ ማግስት ይህን የአደባባይ ምዝበራ ለማስቆም የቻሉት መረጃው ስለነበራቸው ነው፡፡ በየዓመቱ 11 ሚሊየን ብር ለግለሰቦች ሲውል እንደአሰራር ችግር ቀለል አድርጎ ማለፍ ይቻላልን?

ሌላው አፍን በእጅ የሚያስድነው፤ በችግሮቹ ተሳታፊ ናቸው የተባሉ 31 ግለሰቦች ላይ እገዳ ተጥሏል መባሉ ነው፡፡ ይህ ለእኔ የዓመቱ ታላቅ ስላቅ ነው፡፡ የመንግሥትን ገንዘብ ባልተፈቀደ ተግባር ላይ ማዋል እኔ እስከማውቀው ድረስ ግልጽ ወንጀል ነው፡፡ ግልጽ ምዝበራ ነው፡፡ የወንጀል ተጠርጣሪዎች ደግሞ በፍርድ ቤት ክስ ይመሰረትባቸዋል እንጂ በእገዳ ብቻ አይታለፉም፡፡

ክብርት ፕሬዚደንት ሳህለወርቅ ዘውዴ ሆይ ለወሰዱት ቁርጠኛ እርምጃ እናደንቅዎታለን፡፡ የወንጀል ተባባሪ ባለመሆንዎ እናከብርዎታለን፡፡ አሁንም እባክዎ በነካ እጅዎ ይህንን የምዝበራ መረብ ታሪክ ገላልጠው ይንገሩን!..የወንጀል ተጠርጣሪዎቹንም ሕግ ፊት ይገትሩልን!..አበቃሁ፡፡

** የቪዲዮ ዘገባዎችና መዝናኛዎችን ለማግኘት www.diretube.com ይጉብኙ
** ኢትዮ ጵያን የተመለከቱ የተለያዩ አለም አቀፋዊና ሀገራዊ ዜናዎችን ለእንግሊዘኛ ለማንበብ www.ethio.news ይጉብኙ

Trending

By continuing to use the site, you agree to the use of cookies. more information

The cookie settings on this website are set to "allow cookies" to give you the best browsing experience possible. If you continue to use this website without changing your cookie settings or you click "Accept" below then you are consenting to this.

Close