Connect with us

Ethiopia

የሕግ አስከባሪ አባላት የኃይል አጠቃቀምና የተጠያቂነት ሥርዓትን ረቂቅ አዋጅ ተዘጋጀ

Published

on

የሕግ አስከባሪ አባላት የኃይል አጠቃቀምና የተጠያቂነት ሥርዓትን ረቂቅ አዋጅ ተዘጋጀ

በህይወት የመኖር፣ የአካል ደህንነት እና የኢ-ሰብዓዊ አያያዝ ክልከላ መብቶች ለማስከበር የሕግ አስከባሪ የፖሊስ አባላትን የኃይል አጠቃቀም ተመጣጣኝነትን የሚመለከቱ የሕግ ድንጋጌዎች የማዳበር እና የተጠያቂነት ሥርዓት ለመዘርጋት የሚያስችል ረቂቅ ሕግ በኢ.ፌ.ዲ.ሪ ጠቅላይ ዐቃቤ ሕግ የሰብዓዊ መብት ድርጊት መርሃ ግብር ጽ/ቤት አስተባባሪነት መዘጋጀቱ ተሰማ፡፡

የተጠያቂነት ሥርዓቱን ለመዘርጋት መነሻ ቢጋር በጠቅላይ ዐቃቤ ሕግ የተዘጋጀ ሲሆን ከፌዴራል ፖሊስ ኮሚሽን፣ ከኢትዮጵያ ሰብዓዊ መብት ኮሚሽን የተውጣጡ ባለሙያዎች በፌዴራልና ክልሎች በሚገኙ ማረሚያ ቤቶችና ፖሊስ ጣቢያዎች የዳሰሳ ጥናት በማድረግ የሃይል አጠቃቀምና ተጠያቂነት ረቂቅ ሕግ አዘጋጅተዋል፡፡ የተዘጋጀው ረቂቅ ሕግም በቀድሞው የፌዴራል እና አርብቶ አደር ጉዳዮች ሚኒስቴር የአሁኑ ሰላም ሚኒስቴር በኩል የፖሊስን ተቋምንና ማረሚያ ቤቶችን ባካተተ መልኩ ውይይት ተደርጎበታል፡፡

የተዘጋጀው የኃይል አጠቃቀም እና የተጠያቂነት ሥርዓት በፌዴራል፣ በአዲስ አበባ እና በድሬዳዋ አስተዳደር ፖሊስ ተቋምና አባላቱን፣ የፌዴራል ማረሚያ ቤት አባላት እና በህገ መንግስቱ አንቀጽ 51/15 መሰረት ፖሊሳዊ ስራ ላይ የተሰማራን የሃገር መከላከያ አባልን አካቷል፡፡

የኃይል አጠቃቀም እና የተጠያቂነት ሥርዓት የመዘርጋት አላማው የፖሊስ አባላት የኃይል አጠቃቀምን የሚመለክቱ በስራ ላይ ያሉ ሕጎችን በመፈተሽ በተግባር የሚታዩ ችግሮች ላይ ጥናት በማካሄድ ከህገ መንግስቱና ከዓለም አቀፍ የሰብዓዊ መብት ህግ አንጻር የተስማማ ህጎችን በማርቀቅ ለተጠያቂነት የሚያግዝ ገለልተኛ አደረጃጀቶችን መፍጠር ሲሆን የረቂቅ አዋጁ ዝርዝር አላማም፡-

የፖሊስ ሰራዊቱ ህገ-መንግስቱንና ሌሎች ህጎችን በማክበርና በማስከበር በህዝቦች ተሳትፎ ወንጀልንና የወንጀል ስጋቶችን በመከላከልና ህገ-መንግስታዊ ስርዓቱን የመጠበቅ፤ የአገራችንን ሰላም፣ እድገትና ልማት የማረጋገጥ ኃላፊነቱን በተሻለ መልኩ ለመወጣት ይችል ዘንድ ዝርዝር የህግ ማዕቀፎችን ማበጀትና የአሰራር ስርዓቶችን ለመዘርጋት፣ ፖሊስ፣ የማረሚያ ቤት አባላትና ፖሊሳዊ ስራ ላይ የተሰማራን የሀገር መከላከያ አባላት የሰብዓዊ መብት ግንዛቤውን የማሳደግ ስራ እና የተጠያቂነት ስርዓቱን ለማጠናከር የሚረዳ ነው፡፡

በተጨማሪም የአካል ደህንነት መብትን ከማረጋገጥ አንጻር የፖሊስ ሃይል አጠቃቀም ምርመራ ሂደትና ከባድ ዲሲፒሊን ጉዳዮች እንዲሁም ሌሎች ወንጀሎች በአባላት ተፈፅመው ሲገኙ በገለልተኛ አደረጃጀቶች ቢጣራ ከፍተኛ ፋይዳ ያለውና ውጤታማ የሚያደርግ በመሆኑ ይህንን የሚመራና የሚቆጣጠር ተቋም ለማቅረብ ነው፡፡

የረቂቅ ህጎቹ ይዘት የሕግ አስከባሪ አባላት የኃይል አጠቃቀምና የተጠያቂነት ስርዓት ረቂቅ ህግ በአጭሩ የኃይል አጠቃቀም መሠረታዊ መርሆዎችን፣ ኃይል ጥቅም ላይ ስለሚውልባቸው ሁኔታዎች፣ ሃይል መጠቀም የተከለከለባቸው ሁኔታዎች፣ የጦር መሳሪያ ጥቅም ላይ ስለሚውልበት ሁኔታ፣ በወንጀል ምርመራ ሂደት ኃይል መጠቀም ስለመከልከሉ፣ ስለተጠያቂነት ስርዓት እና የተጎጂዎች መብቶችን እንዲሁም የህግ አስከባሪ ተቋማት ቁጥጥር ገለልተኛ ተቋም ስለሚቋቋምበት ሁኔታ አካቷል፡፡

በአሁኑ ጊዜ የሕግ አስከባሪ አባላት የኃይል አጠቃቀምና የተጠያቂነት ስርዓት እንዲሁም የገለልተኛ የሕግ አስከባሪ አባላት ቁጥጥር ተቋም ለማቋቋም የሚስችሉ ሁለት ረቂቅ ሕግ ተዘጋጅቷል፡፡ በተዘጋጀው ረቂቅ ሕግ የሚመለከታቸው ባለድርሻ አካላት አስተያየት ከሰጡበት በኋላ ለሚኒስትሮች ምክር ቤት ለማቅረብ ታቅዷል፡፡

(ምንጭ፡- የፌ/ጠቅላይ ዐቃቤ ሕግ)

Trending

By continuing to use the site, you agree to the use of cookies. more information

The cookie settings on this website are set to "allow cookies" to give you the best browsing experience possible. If you continue to use this website without changing your cookie settings or you click "Accept" below then you are consenting to this.

Close