Connect with us

Art and Culture

ለሚሠሩ ሰዎች | በዲያቆን ዳንኤል ክብረት

Published

on

ለሚሠሩ ሰዎች | በዲያቆን ዳንኤል ክብረት

በምትሠሩት ሥራ ሐናና ቀያፋን እንለውጣለን፣ ይሁዳን እናሰልፋለን፣ ጲላጦስን ቆራጥ እናደርጋለን አይሁድን በበጎ ሥራችን እናሳምናለን ብላችሁ አስባችሁ ከሆነ ተሳስታችኋል፡፡ ሐናና ቀያፋ የዕውቀት፣ ይሁዳ የተሳትፎ፣ አይሁድ የተጠቃሚነት ችር የላባቸውም፡፡ ሶፍት ዌራቸው ግን ክፋት ስለሆነ ወተት ይጠቁርባቸዋል፤ ማር ይመርባቸዋል፣ መሬት ይርቅባቸዋል፤ ሰማይ ይቀርብባቸዋል፤ ጥጋብ ያስርባቸዋል፤ ርሐብ ያጠግባቸዋል፡፡ እነርሱን ከቻላችሁ ርሷቸው፤ ካልቻላችሁ ናቋቸው፡፡

ከአልጋ ቁራኝነት ያነሣችሁት መጻጉእ፣ ከውግረት ያዳናችኋት ሴት ታመሰግነናለች ብላችሁ አትጠብቁ፡፡ ሥራችሁን ለክስ፣ መልካምነታችሁን ለወቀሳ ያቀርቡታል፡፡ እነርሱ ራሳቸው እንኳን የተደረገላቸው ነገር ቢረዱት፤ ሕዝቡን ተከትለው በጩኸቱም ተውጠው ይጠፋሉ እንጂ ጸንተው አይቆሙም፡፡ ከዳኑት ከእነርሱ ይልቅ አልዳናችሁም የሚላቸው ሰው ይሰሙታል፡፡ ተታላችሁ ነው ሲባሉ ያምኑታል፡፡

በጥብርያዶስ ባሕር ለድጋፍ የተሰለፈ ሕዝብ በፕራይቶሪዮን አደባባይ ለተቃውሞ እንደሚሰለፍ ከረሳችሁት ትሞኛላችሁ፡፡ የድጋፍ ሰልፉን የመሩት ተቃውሞውንም ይመሩታል፡፡ የምስጋና ግጥም የጻፉት የውግዘቱን መፈክር ያሰሙታል፡፡ የምስጋናና የጥላቻ መለኪያቸው አንድ ነው፡፡ ሲያመሰግኑ ከልካችሁ በላይ እንደሄዱት ሁሉ ሲጠሉም ከልካችሁ በላይ ይሄዳሉ፡፡ መለኪያቸው ተመሳሳይ ስለሆነ ነው፡፡

ስትጀምሩ እናንተ ከመርሕ ጋር ጀምሩ፡፡ ስትኖሩ ከመርሐችሁ ጋር ኑሩ፡፡ በመጨረሻም ከመርሐችሁ ጋር ትቀራላችሁ፡፡ ሌሎቹ እንደ ገበያውና እንደ አየሩ ሁኔታ የሚመጡ የሚሄዱ ናቸው፡፡ ሆዳቸው ከናንተ ጋር ከገጠመ ሰዎች ይልቅ መርሐቸው ከናንተ ጋር የገጠመ ሰዎች ዘላቂ ናቸው፡፡ ሆድ እንጂ አእምሮ ወገን የለውም፡፡ የሆድ ወገንተኝነትም በጥጋብ ጊዜ ብቻ ነው፡፡ ሲጠግብ ወገን የመሰለው ሲራብ ፊቱን ወደሚያጠግበው ያዞራል፡፡ የወደቅክ፣ ያልተሳካልህ፣ የተሸነፍክና የደከምክ ከመሰለው አላውቀውም፣ ተገድጄ ነው፣ መስሎኝ ነው፣ ተሸውጄ ነው ባዩ ብዙ ነው፡፡ ከተሳካልህ፣ ካሸነፍክ፣ ከከበርክና ከተሸለምክ ግን ነበርኩበት፣ ዋናው እኔ ነኝ፣ መሪው ፊታውራሪው እኔ ነበርኩ፣ ዐውቀዋለሁ፣ እወደዋለሁ፣ እቀርበዋለሁ ባዩ ብዙ ነው፡፡

በታሪክ ውስጥ ሰዎች በዘመናቸው ካሳመኗቸው ሰዎች ይልቅ ካለፉ በኋላ ያሳመኗቸው ይበዛሉ፡፡ በሕይወት ዘመናቸው ካገኙት ተቀባይነት ይልቅ ካለፉ በኋላ ያገኙት ተቀባይነት ይበልጣል፡፡ በሕይወት ዘመናቸው ከተመሰገኑት ይልቅ ካለፉ በኋላ የተመሰገኑት ይበልጣል፡፡ እናም የሥራችሁን ውጤት በዛሬ ብቻ አትለኩት፡፡

Trending

By continuing to use the site, you agree to the use of cookies. more information

The cookie settings on this website are set to "allow cookies" to give you the best browsing experience possible. If you continue to use this website without changing your cookie settings or you click "Accept" below then you are consenting to this.

Close