Connect with us

Politics

ከንቲባ አልባ የክልል ከተማ!

Published

on

ከንቲባ አልባ የክልል ከተማ! | ከበኃይሉ ሚዴቅሳ ፍስሐጽዮን

ከንቲባ አልባ የክልል ከተማ! | ከበኃይሉ ሚዴቅሳ ፍስሐጽዮን

የአዲስ አበባ ከንቲባ ነገር ሰሞነኛ አጀንዳ ሆኗል፡፡ ከንቲባውን ለመምረጥ አስራ አምስት ቀን ቀድሞ ሕግ እንዲሻሻል መደረጉን ያዩ ሰዎች፣ ከዓመታት በፊት ጠዋት ሰዎችን ለማሰር ማታ ሕጎችን ያወጣ ከነበረው ኢሕአዴግ ጋር ሲያመሳስሉት ነበር፡፡

ከዚያ በኋላ ባሉት ጊዜያት በምክትል ከንቲባ ማዕረግ የከንቲባ ሥራ እየከወኑ ያሉት ኢንጂነር ታከለ ኡማ፣ ሕዝቡን ለማነቃቃት እየጣሩ ነው፡፡ ሥራቸውን እታች ድረስ ወርደው ለመሥራት እየጣሩ ቢሆንም ከትችት አላመለጡም፡፡ የሥራቸውን ግምገማ ከዓመቱ መጨረሻ ላይ የምናየው ይሆናል፡፡

ይህ ሁሉ ሆኖ ግን የአዲስ አበባን ጉዳይ አጀንዳ አድርጎ መደራጀትም ማደራጀትም የሚፈልግ ኃይል አለመኖሩ አስተዛዛቢ ነው፡፡ በጎጥ የተሰባሰበ ኤሊት የበረታበት የኢትዮጵያ ፖለቲካ አዲስ አበባን የሚጠቀምባት ለመዶለት ነው፡፡ የምናምን ብሔር ነፃ አውጭ እየተባለ የተሰባሰበ ኤሊት አዲስ አበባን አጀንዳው ማድረግ አይፈልግም፡፡

አዲስ አበባ በስሟ የሚደራጅ የፖለቲካ ኃይል እንዲኖራት ከፈለገች ጎጠኛና ዘረኛ ልትሆን ይገባል እያሉ ነው፡፡ ከሰሞኑ በማኅበራዊ ድረገፆች የሚደረገው ክርክርም እከሌ ብሔሩ እንዲህ ነውና አዲስ አበባን ሊመራ አይገባውም የሚል ነው፡፡ በእውነቱ ይህ አስተሳሰብ ለአዲስ አበባ ይመጥናት ይሆን? ባለፉት ዓመታት አገር በብሔርና በዘር ሲናጥ፣ እርሷ የደላው መስላ ዝም ብላ የከረመችው አዲስ አበባ ከዚህ ዘረኛ ፖለቲካ የለሁበትም ማለቷ አይደለምን?

የአዲስ አበባን ጉዳይ የዋና ከተማ ፖለቲካ ብንለው ይሻላል፡፡ የዚች ከተማ ጉዳይ ያገባኛል ሳይሆን ይቺ ከተማ ትገባኛለች ባይ ማየት ከጀመርን ቆይተናል፡፡ አስብላታለሁ ሳይሆን ለኔ የብሔር አጀንዳ ማራገቢያ ትሁን የሚል ኃይል አለ፡፡

ኦዴፓ የምመራው ክልል ርዕሰ መዲና አዲስ አበባ ነች ይላል፡፡ አብን የተሰኘው ንቅናቄም አዲስ አበባ የአማራ ነው ብሏል፡፡ አዲስ አበቦች አዲስ አበባ የአዲስ አበቤዎች ነች እያሉ ነው፡፡ ሁለተኛ እና ሶስተኛ ላይ ያለውን እንተወውና ወደ መጀመሪያው እናተኩር፡፡

የኢትዮጵያ ዘጠኙም ክልሎች የክልል ዋና ከተማ አላቸው፡ ለነዚህ ከተሞቻቸው በክልልና በከተማ ምክርቤቶቻቸው በጀት ይይዛሉ፤ ከንቲባም ይመርጣሉ፡፡ ከነዚህ ክልሎች አንዱ ግን በጀትም አይዝም ከንቲባም አይመድብም፡፡ ተጠግቶ እንደኖረ ደባል እንኳ በረንዳ አያጸዳም፡፡

ነገሩን ላብራራው፡፡

ኦሮሚያ ልክ እንደሌሎች ክልሎች የክልሌ ዋና ከተማ ፊንፊኔ/አዲስ አበባ ነው ይላል፡፡ ግን ኦሮሚያ ዋና ከተማዬ ናት ለሚላት ፊኒፊኔ ከንቲባ መድቦ ያውቃል? በጀት ይዞ ያውቃል? መልሱ አያውቅም ነው፡፡

የአዲስ አበባ ሕዝብ በሚከፍለው ግብርና ታክስ የክልሉ መንግሥት አገልግሎት የሚሰጥባቸው መንገዶችና ሌሎች መሠረተ-ልማቶች ይሠራሉ፤ የከተማው ሕዝብ የኦሮሚያ ክልል መንግሥት አገልግሎት ሰጪዎችና ተገልጋዮች የሚጠቀሙባቸውን መሠረተ-ልማቶች አይገነባም፡፡ ይህንን የሚያስደርግ አስገዳጅ ሕግ የለም፡፡

አንድ ክልል መዲናዬ ናት ለሚላት ከተማ ምንም ካላደረገ፣ ከንቲባ ካልሾመ፣ በጀት ካልመደበ…መዲናነቷ ምኑ ላይ ነው?

(ከአዘጋጁ፡- ይህ ጹሑፍ የጸሐፊውን እንጂ የድሬቲዩብን ኤዲቶሪያል አቋም አይወክልም)

Trending

By continuing to use the site, you agree to the use of cookies. more information

The cookie settings on this website are set to "allow cookies" to give you the best browsing experience possible. If you continue to use this website without changing your cookie settings or you click "Accept" below then you are consenting to this.

Close