Connect with us

Entertainment

የባሌ ተራሮች ብሔራዊ ፓርክ በስሜት ህዋሳት በሙሉ የሚጎበኙት፤ አንድ ፓርክ ሺ ተፈጥሮ

Published

on

የባሌ ተራሮች ብሔራዊ ፓርክ በስሜት ህዋሳት በሙሉ የሚጎበኙት፤ አንድ ፓርክ ሺ ተፈጥሮ

የባሌ ተራሮች ብሔራዊ ፓርክ በስሜት ህዋሳት በሙሉ የሚጎበኙት። አንድ ፓርክ ሺ ተፈጥሮ።

(ተጓዡ ጋዜጠኛ ሄኖክ ስዩም ወደ ባሌ ተጉዞ የባሌ ቆይታውን እየተረከልን ነው። ወደ አስደናቂው የባሌ ተራሮች ብሔራዊ ፖርክ ፕላቶ ወጥቷል። አንድ ፓርክ ሺህ ተፈጥሮ የሚባለው ብዝሃ ሕይወትን ሳናቴ ላይ ቆሞ እንዲህ ያስጎበኘናል፡፡ )
ሄኖክ ስዩም በድሬቲዩብ


data source: nasa  እንደ ስሙ ነው። የሚታየው ሺህ ነው። የማይቆጠር ሺህ። ሳነቴ አፋፉ ላይ ኾኜ የሰደድሁት ዐይኔ እንዲሁ አይመለስም። ተአምር ያያል። ባሌ ተራሮች ብሔራዊ ፓርክ ነኝ። በአፍሪቃ ግዙፉ እና ሰፊው የደጋ ጠረጴዛ ተንጣሏል። ባሌ ሁሉም የስሜት ህዋሳት የሚሰሩበት በሁሉም የስሜት ህዋሳት የሚጎበኝ ተፈጥሮ ነው።

ጦስኙ ይሸታል። የአስታው መዓዛ አለ። የኮሶው ዛፍ የሚተነፍሰው ሰው አፍንጫ የሚደርስበት አየር ተሞልቷል። በአፍንጫ የሚጎበኝ ፓርክ ነው። ደግሞም ይቀመሳል። ባሌ ተራሮች በምላስ እንደሚጎበኝ የምነግራችሁ የሪራን ጎመን እና ቂጣ ጠቅሼ አይደለም። የባሌን ቡና በወተትም አላነሳም። ቀይ ቀበሮዋን ከቀመሰችው ቀዝቃዛ የምንጭ ውሃ የቀመሰ ባሌባሌን ተራሮችን በምላሱ ይጎበኛል።

ደጋግሜ የባሌ ተራሮች ድንቅ ምድር መጥቻለሁ። ደጋግሜ ስለ ባሌ ተራሮች ብሔራዊ ፓርክ ጽፌአለሁ። አንዱም ከቀደመው ጋር የማይመስለው ሁልጊዜም ብመጣ ሁልጊዜም አዲስ ነገር ስለምመለከት ነው። ቢመጡ ቢመጡ አዲስ የኾነው ብሔራዊ ፓርክ ነኝ።

ደግሞ ባሌ ተራሮች ብሔራዊ ፓርክ በጆሮ እንደሚጎበኝ ስነግራችሁ እያደመጥሁ ነው። የጥዱ ውዝዋዜ ይሰማኛል። ከቱሉ ዲምቱ የሚጋልበው ነፋስ ጅብራ ሲያስደንስ የሚያሰማውን ድምፅ እሰማዋለሁ። ሀረና ደን ውስጥ የሚያዜሙ አእዋፍ ባሌ ተራሮች በጆሮ እንደሚጎበኝ ምስክሮቼ ናቸው።

ዳሰስሁት ምድሩ የሚዳበስ ነው። አፈሩ ውርጭ አዝሎ እጅ ያስፈለቅቃል። መስኩ ከመዳሰስ በላይ የሚንደባለሉበት ነው። ባሌ ተራሮች ብሔራዊ ፓርክ የስሜት ህዋሳትን ቁጥር ያበዛዋል። የስሜት ህዋሳችን ስድስትም ሰባትም ቢባል በሁሉም የሚጎበኝ ነው።

ቀይ ቀበሮ ራቷን ፍለጋ ላይ ናት። ራቴን ብላ ከማሰችው ጉድጓድ የወጣችው አይጥ የቀበሮ ራት ስትኾን አየሁ። እንዲህ በአንዱ ሌላውን የምታኖረው ተፈጥሮ ባሌን በተፈጥሮ ሚዛን ቀምራ ሺህ ነገር ታሳየኛለች። ዓይን አይደክመውም። ሰውነት እርጎ የኾነውን አየር ሲስብ ከዚህ ባልወጣን የሚል ልመና እያቀረበ ነበር።

ባሌ ክብራችን ብቻ አይደለም። ታሪኩ ውበት ነው ተብሎም አይደመደምም። ባሌ እስከሱማሊያ ያለ ህዝብ የተስፋው ሰማይ የውሃ ምንጮቹ ማማ ነው። ገብሱን ደጋው ምድር የሚቸረን ባሌ ተራሮች በጤና ሲኖር ነው። ጎመን በቂጣ አማረኝ። ጉዞ ወደ ሪራ…..

** የቪዲዮ ዘገባዎችና መዝናኛዎችን ለማግኘት www.diretube.com ይጉብኙ
** ኢትዮጵያን የተመለከቱ የተለያዩ አለም አቀፋዊና ሀገራዊ ዜናዎችን ለእንግሊዘኛ ለማንበብ www.ethio.news ይጉብኙ

Trending

By continuing to use the site, you agree to the use of cookies. more information

The cookie settings on this website are set to "allow cookies" to give you the best browsing experience possible. If you continue to use this website without changing your cookie settings or you click "Accept" below then you are consenting to this.

Close