Connect with us

Ethiopia

ፍቅርና ታሪክ ይዘው ከጸሐይ መውጫ የተነሱት የምስራቅ ልጆች አዳማ ገብተዋል

Published

on

ፍቅርና ታሪክ ይዘው ከጸሐይ መውጫ የተነሱት የምስራቅ ልጆች አዳማ ገብተዋል

ፍቅርና ታሪክ ይዘው ከጸሐይ መውጫ የተነሱት የምስራቅ ልጆች አዳማ ገብተዋል፡፡ የናዝሪት ልጆች እንደ አብረሃም እግር አጥበው አስተናግደዋቸዋል፡፡

ተጓዡ ጋዜጠኛ ሄኖክ ስዩም ከሐረር የተነሱት የጉዞ አድዋ ተጓዦች አዳማ ገብተዋል ይለናል፡፡ ተጓዦቹ በአዳማ የተደረገላቸውን አቀባበል ደማቅ ነበር፡፡ የናዝሪት ልጆች እንደ አብረሃም እግር አጥበው አስተናግደዋቸዋል ሲል እንዲህ ተርኮታል፡፡ | ሄኖክ ስዩም በድሬቲዮብ

ምሥራቅ የፀሐይ መውጫ ብቻ አይደለም፤ አብሮ መኖር ጀምበር መፍለቂያም ነው፡፡ አቦ ጠጣ የለውም ብለው የተነሱት የምስራቅ ልጆች ስምጥ ሸለቆን ሰንጥቀው ስምጥ ሸለቆዋ ጌጥ ደርሰዋል፡፡

አደም ሁሴን ጎዳና ላይ ባንዲራ ለብሶ በስስት ሲጠብቃቸው ሳይ የናዝሪት ልጅ ልቡን ከፍቶ እየጠበቃቸው መኾኑ ገባኝ፡፡ የጉዞ አድዋ ሰባ ሰገሎች ናቸው፡፡

በሰሜን የተወለደውን ድል ከአድዋ ተራሮች ግርጌ ሊዘክሩት ኢትዮጵያዊ ልብን ስጦታ ይዘው ከራስ መኮንን መነሻ ተነስተዋል፡፡

ለቀናት ተጉዘው አዳማ ሲደርሱ አዳማ ልቧን ከፍታ ጠበቀቻቸው፡፡ ጉዞ አድዋ ተራ ኩነት አይደለም፡፡ ሰፈራዊ እሳቤም አይደለም፡፡

አህጉር የሚሻገር ቀለም የሚያኮራ ሰውን የሚያከብር ፍልስፍና ዘካሪ ነው፡፡ ያሬድ ሹመቴን እና መሐመድ ካሳን ሳስብ በትውልዴ እኮራለሁ፡፡ የማፍርበት የበዛውን ያኽል የምኮራባቸው ወጣቶች ህመሜን ያሽሩታል፡፡

ያሬድ በየዓመቱ ከአዳዲስ ተጓዦች ጋር በተጓዘበት እየተጓዘ ለሁለት ወር ይንከራተታል፡፡ ያው ዘንድሮም ከሀረር የተነሳው ቡድን በየቀኑ ሰላም በገባልኝ እያለ አዳማ ገባልኝ ብሎ አብስሮናል፡፡ ወጣቶቹ ፍቅርና ታሪክ ይዘው የተነሱ ናቸው፡፡

ኢትዮጵያን መውደድ ኢትዮጵያውያንን ከአራቱም ጥግ አሰባስቦ ጥቁር ዛሬም ድረስ ታሪኬ ለሚለው የአድዋ ድል አብቅቷቸዋል፡፡ ይሄ ተረት አይደለም ታሪክ ነው፡፡

ለዚህ ነው ከፍቅር ጋር ታሪክ ይዘው ከጸሐይ መውጫ የተነሱት የሀረር ተጓዦች አድዋ ድረስ በእግር መሄድ የቆረጡት፡፡ ትናንትም በችግር ውስጥ ኾነን አብረን ነበርን፤ አብረን ተጉዘን አብረን ድል አድርገን አብሮ የሚኖር ታሪክ የተቀመጠልን ህዝቦች ነን፡፡ ዛሬም ከወጣቶቹ ጋር የብዙ ሰው ምናብ አብሮ ይጓዛል፡፡

አዳማ ደስ የሚል አቀባበል አድርጋለች፡፡ የናዝሪት ልጆች እንደ አብረሃም እግር አጥበው ተጓዦቹን ተቀብለዋል፡፡

ጉዞ አድዋ እውነተኛው የኢትዮጵያዊነት እሴትን እየተመለከተ የሚጓዝ የእውነተኛ ታሪካችን ዘካሪ ነው፡፡ እሁድ አዲስ አበባ የሀረር ተጓዦችን በክብር ትቀበላለች፡፡

እንደ አዳማ ወጣት ከንቲባዋ ኢንጅነር ታከለን ጨምሮ ብዙዎች የምስራቁን በር በር እያዩ እየጠበቁ ነው፡፡ ማክሰኞ አርባ ሁለት ወጣቶች ጉዞ አድዋን ከአዲስ አበባ ይጀምራሉ፡፡ የኢትዮጵያ አምላክ ሁላችሁንም በመግባት በመውጣታችሁ ይከተላችሁ፡፡

/ፎቶውን ለላካችሁልኝ ጉዞ አደዋዎች አመሰግናለሁ፡፡/

** የቪዲዮ ዘገባዎችና መዝናኛዎችን ለማግኘት www.diretube.com ይጉብኙ
** የተለያዩ ኢትዮጵያን የተመለከቱ አለም አቀፋዊና ሀገራዊ ዜናዎችን ለእንግሊዝኛ ለማንበብ www.ethio.news ይጉብኙ

Trending

By continuing to use the site, you agree to the use of cookies. more information

The cookie settings on this website are set to "allow cookies" to give you the best browsing experience possible. If you continue to use this website without changing your cookie settings or you click "Accept" below then you are consenting to this.

Close