Connect with us

Business

‹‹የአሰብ ወደብ ስራ›› በሲዲ ተተርኮ ሊቀርብ ነው

Published

on

‹‹የአሰብ ወደብ ስራ›› በሲዲ ተተርኮ ሊቀርብ ነው

ከዛሬ 61 አመት ቀደም ብሎ በአሰብ የወደብ ፕሮጀክት ላይ በዋና መሀንዲስነት ያገለገሉት አቶ በየነ ወልደገብርኤል ወደቡ እንዴት እንደተሰራ የሚያስረዳ ባለ 33 ገጽ ያልታተመ ጽሁፍ ጽፈው ነበር፡፡ ይህ ጽሁፋቸው በቅርቡ ወደ ኦድዮ ሲዲ ተቀይሮ በትረካ መልክ ሊቀርብ እንደሆነ ተሰምቷል፡፡ የዚህን ኦድዮ ሲዲ ሙሉ ወጪ በመቻል ያሳተመው ተወዳጅ ሚድያና ኮሚኒኬሽን ሲሆን ካሁን ቀደም የ13 የሀገር ባለውለታዎችን ታሪክ በሲዲ ማሳተሙ ይታወቃል፡፡

የድርጅቱ መስራችና ኤክስኪዩቲቭ ፕሮዲዩሰር እዝራ እጅጉ ይህ ባለ 1 ሰአት በሲዲ የሚወጣ ታሪክ ብዙ ያልተነገሩ እውነታዎችን ይዟል፡፡ይህን በአቶ በየነ ወልደገብርኤል የተጻፈ ታሪክ ጣዕም ባለው ድምጻቸው ተርከው ያቀረቡት በተባበሩት መንግስታት በእርሻ ባለሙያነት ለአመታት ያገለገሉት ዶክተር ጌታቸው ተድላ ናቸው፡፡ ዋና መሀንዲስ በየነ ወልደገብርኤል በአሁኑ ሰአት የ88 አመት አዛውንት ሲሆኑ የአሰብ ወደብ ስራ ኢትዮጵያውያን ባለሙያዎች ከውጭ ሀገር ባለሙያዎች ጋር በጋራ በመስራት የሚታዩ ውጤቶችን ማስገኘቱን በትረካው ውስጥ ይናገራሉ፡፡ እንግሊዝ ሀገር የምህንድስና ትምህርታቸውን የተከታተሉት አቶ በየነ እንዴት የአሰብ ወደብን በዋና መሀንዲስነት ለማገልገል እንደተመረጡ በጽሁፋቸው ውስጥ ያስረዳሉ፡፡

በህዳር ወር 1954 የአሰብ ወደብ ፕሮጀክት በንጉሰ-ነገስቱ በድምቀት የተመረቀ መሆኑን ታሪክ የሚነግረን ሲሆን የታቀደለትን ያህል ጊዜ ሳይቆይ ከተመደበለት በጀት ባነሰ መጠናቀቁ ይታወቃል፡፡ አቶ በየነ ወልደገብርኤል ይህን ‹‹የአሰብ ወደብ ስራ›› የተሰኘውን ጽሁፍ ሲጽፉም ሆነ በሲዲ እንዲቀርብ ሲፈቅዱ በዋናነት ለወጣት ሲቪል መሀንዲሶች ጠቀሜታው የጎላ ይሆናል ብለው በማሰብ ነበር፡፡ በጥር 1950 የወደቡን አጠቃላይ የጥናት ስራ ያከናወነውና ውሉን ያዘጋጀው ብሎም አጠቃላይ ሁሉን ነገር ጨርሶ ቁልፍ ያስረከበው የዩጎዝላቭ የወደብ ስራ ተቋራጭ ኩባንያ የሆነው ፖምግራድ ነበር፡፡

ይህ ኦድዮ ሲዲ በ4 አመት ወደቡ ሲሰራ የታለፉ ሂደቶችንና የተገኙ ለውጦችን የሚዳስስ ሲሆን በኦድዮ ትረካው ውስጥም የመሀንዲሱ የበየነ ወልደገብርኤል ቃለ -መጠይቅ በመጠኑ ተካቶበታል፡፡ ይህ በ60 ደቂቃ የሚቀርብ ትረካ በመኪና እየሄዱ ወይም በሞባይል ጭነው ሊያዳምጡት እንዲችል ሁኖ የቀረበ ነው፡፡ ለዚህ ትረካ የሳውንድ ትራክ ወይም የማጀቢያ ሙዚቃ የሰራለት ታዋቂው ሙዚቀኛ ረዳት ፕሮፌሰር አክሊሉ ዘውዴ ነው፡፡ ይህ ትረካ በፓፓራዚ የማስታወቂያ ድርጅት አማካይነት የቀረጻ ስራው የተከናወነለት ሲሆን የስራው ዋና አማካሪ ደግሞ ገነት ደምሴ ናት፡፡

ተወዳጅ የሚድያና የኮሚኒኬሽን ማእከል ይህን በሲዲ የቀረበ ስራ በሲዲ አሳትሞ ለገበያ የሚያቀርብ ሲሆን ወጣት የምህንድስና ተማሪዎችም ጋር እንዲዳረስ ያደርጋል፡፡ ተወዳጅ ሚድያ ከዚህ ቀደም ማለትም ከ1 ወር በፊት በህዳር 15 2011 ‹‹የኤርትራ ጉዳይ..›› የተሰኘውን መጽሀፍ በዲቪዲ አሳትሞ ማስመረቁ ይታወሳል፡፡ ድርጅቱ ከአሁን በኋላም የ3 የሀገር ባለውለታዎችን ታሪክ በዲቪዲ አሳትሞ የሚያስመርቅ ሲሆን በተለይ መጽሀፎችን ወደ ድምጽ መቀየር የሚለው ሀሳብ ላይ አጽንኦት ሰጥቶ እንደሚቀጥልበት ለማወቅ ተችሏል፡፡

Trending

By continuing to use the site, you agree to the use of cookies. more information

The cookie settings on this website are set to "allow cookies" to give you the best browsing experience possible. If you continue to use this website without changing your cookie settings or you click "Accept" below then you are consenting to this.

Close