Connect with us

Ethiopia

ዳውድ ኢብሳ እና ኢሳያስ አፈወርቂ!

Published

on

ዳውድ ኢብሳ እና ኢሳያስ አፈወርቂ! | በኃይሉ ሚዴቅሳ ፍስኃጽዮን

ዳውድ ኢብሳ እና ኢሳያስ አፈወርቂ! | በኃይሉ ሚዴቅሳ ፍስኃጽዮን@DireTube

አቶ ኢሳያስ አፈወርቂን በደንብ የሚያውቋቸው ሐሰን አልቱራቢ ናቸው፡፡ አልቱራቢ ዝነኛ ፖለቲከኛ ነበሩ፡፡ በሱዳን ከአልበሽር ጋር መንግሥትን ፈንቅለው የጣሉ ብርቱ ሰው! የአፍረቃ ቀንድን ፖለቲካ እንደመዳፋቸው ያውቁታል፡፡ የአካባቢውን የፖለቲካ ሰዎች የደም ዓይነት ሳይቀር የሚያውቁ ሰው ነበሩ፡፡ እኒህ ሰው ከአንድ ዓመት በፊት ሞተዋል፡፡ ነፍሳቸውን ይማር፡፡

ሐሰን አልቱራቢ በደንብ ከሚያውቋቸው የአካባቢያችን ሰዎች መካከል ኢሳያስ አፈወርቂ አንዱ ናቸው፡፡ በእኒህ የሕግ፣ የፖለቲካና የእስልምና ምሁር አገላለጽ አቶ ኢሳያስ አፈወርቂ፣ ‹‹አጭበርባሪ›› ናቸው፡፡ አልቱራቢ እንደሚሉት አቶ ኢሳያስ አንዲት የሚታወቁበት ሕግ አለቻቸው፡፡ እርሷም ‹ወርረህ ተደራደር› የምትል ነች፡፡

አቶ ኢሳያስ አፈወርቂ የሌላ ሐገርን ግዛት ይወርሩና ‹‹ተወረርሁ›› ብለው፣ ኡኡታውን ያቀልጡታል፡፡ ከዚያም እንደራደር ብለው ሰላም ፈላጊ ይመስላሉ፡፡ የሰው ሀገር ዜጎችን እየጨፈጨፉ፣ ‹ዜጎችን ጨረሱብኝ› ብለው እሪሪሪ ይላሉ፡፡ ይህ ድርጊታቸው በሀኒሽ ደሴቶች ጦርነት ጊዜ በየመን፣ በራስ ዱመራ ወረራ ጊዜ በጅቡቲ፣ በባድመ ወረራ ጊዜ በኢትዮጵያ እንዲሁም በሱዳን ታይቷል፡፡ ይህንን ያሉት ሐሰን አል ቱራቢ ናቸው፡፡

ላለፉት ብዙ ዓመታት በአቶ ኢሳያስ ዕዝ ሥር የነበሩት የኦነጉ አለቃ ኦቦ ዳውድ ኢብሳም ከኢሳያስ የተማሩት ትምህርት ይህንን ሥልት ይመስለኛል፡፡ በአስመራ በነበራቸው ዘለግ ያለ ጊዜ ከመምህር ኢሳያስ የቀሰሙት ትምህርት ሰላማዊ መስሎ ጦረኛ መሆንን ነው፡፡

ለሰላማዊ ትግል በቦሌ የገቡት አቶ ዳውድ፣ በወለጋ ጦርነት ከፍተዋል፡፡ ‹‹በዓቢይ አሕመድ የሚመራው የኢሕአዴግ ሠራዊት ጦርነት ከፍቶብናል›› ሲሉም መግለጫ እየሰጡ ነው፡፡ በዚህ ንግግራቸው እንደምንረዳው ኦቦ ዳውድ ሰላም ፈላጊ፣ ዓቢይ አሕመድ ደግሞ ጦረኛ መሆናቸውን ነው፡፡

በሰላም ለመታገል ብለው አዲስ አበባ ከገቡ በኋላ ጉለሌ ተቀምጠው ሕዝብን እያታኮሱ፣ እርሳቸው ግን ሰላም ፈላጊ ነኝ፤ ጦርነቱ ያለው ከአራት ኪሎ ሰዎች ነው እያሉን ነው፡፡

እዚህ ጋር ኦዴፓ (ኦሕዴድ) ስህተት አልሰራም እያልሁ አይደለም፡፡ የአንበሳውን ድርሻ የሚወስደው መንግሥት ነው፡፡

መተማመኛ ሳይሰጥ የታጠቀን ኃይል አምጥቶ ሕዝብ ላይ የለቀቀው እራሱ መንግሥት ነው፡፡ የኦነግንና የሌሎች ፖለቲካ ድርጅቶችን መምጣት የስኬታቸው ጫፍ አድርገው ሲነግሩን የሰነበቱት ጠቅላይሚኒስትር ዓቢይም ድርጅቱ በሕዝብ ላይ ጦርነት ሲያውጅ ምንም ሳይተነፍሱ ሳምንታት አለፉ፡፡ የስምምነታቸውን ይዘት እና አፈፃፀምም ትንፍሽ ብለው አያውቁም፡፡
ይህ የመንግሥት ስህተት ነው!!

ግን ደግሞ ለሰላማዊ ትግል ነው የገባሁት ያሉን ኦቦ ዳውድ በጠብመንጃ እየወጉን ነው፡፡ እራሱን መከላከል የማይችል ሁሉ በወጣበት እየቀረ ነው፡፡ ይህ ስልት ‹ወርረህ ተደራደር› የሚል መርህ ባላቸው አቶ ኢሳያስ አፈወርቂ ደቀመዝሙር የሚከናወን ተግባርም ይመስላል፡፡

** የቪዲዮ ዘገባዎችና መዝናኛዎችን ለማግኘት www.diretube.com ይጉብኙ
** ኢትዮጵያን የተመለከቱ የተለያዩ አለም አቀፋዊና ሀገራዊ ዜናዎችን ለእንግሊዘኛ ለማንበብ www.ethio.news ይጉብኙ

Trending

By continuing to use the site, you agree to the use of cookies. more information

The cookie settings on this website are set to "allow cookies" to give you the best browsing experience possible. If you continue to use this website without changing your cookie settings or you click "Accept" below then you are consenting to this.

Close