Connect with us

Ethiopia

የአንኮበሩ ሰው በጄኔቭ የፊታችን እሁድ ታህሳስ 7 2011 ይመረቃል

Published

on

የአንኮበሩ ሰው በጄኔቭ የፊታችን እሁድ ታህሳስ 7 2011 ይመረቃል

ኢንጂነር ተረፈ ራስወርቅ ከተወዳጅ ሚድያና ኮሚኒኬሽን ጋር በትብብር ጽፈው ያሳተሙት ‹‹የአንኮበሩ ሰው በጂኔኒቫ›› የተሰኘው ግለ-ታሪክ መጽሀፍ የፊታችን እሁድ ታህሳስ 7 2011 በደብረ-ብርሀን ዩኒቨርሲቲ ይመረቃል፡፡ ኢንጂነር ተረፈ ራስ ወርቅ አንኮበር ተወልደው አዲስ አበባ አድገው ምህንድስና አሜሪካን አገር ተምረው ከአርባ አመት በላይ ጄኔቫ ስዊዘርላንድ የኖሩና የሰሩ ናቸው፡፡

ኢንጂነሩ፤ በአለም አቀፋዊ ስራ ተሰማርተው ከ70 በላይ አገሮችን ተዘዋውረውና አይተው ወደ ትውልድ አገራቸው በመመለስ የሕይወትና የስራ ተሞክሯቸውን ነበር ጽፈው ለህትመት እንዲበቃ ያደረጉት፡፡ በ2006 መጽሀፉ እንዲታተም በመገፋፋትና የማስተባበሩን ስራ በማከናወን የሰራው የተወዳጅ ሚድያና ኮሚኒኬሽን ዋና ስራ አስፈጻሚ እዝራ እጅጉ ሲሆን የግራፊክስ ዲዛይኑን በብቃት ያከናወነው ደግሞ የኳንተም ባለቤት የሆነው ዘሪሁን አሰፋ ነው፡፡ ኢንጂነር ተረፈ የህይወት ታሪካቸውን ሲተርኩም ሆነ ብእር ከወረቀት አዋህደው ሲጽፉ ልዩ ብቃት እንደነበራቸው እዝራ እጅጉ ይናገራል፡፡

የመጽሐፉ አቀራረብ የግለ ሰቡን የኢንጂነርን ውልደት፤ እድገት፤ ትምህርት፤ ትዳር መመስረት እንዲሁም አንዳንድ ገጠመኞችን በማቅረብ ወዝ አግኝቷል።ከገጠመኞችም አንዱን ሲያነሱ ለአለም አቀፉ የቴሌኮሙኒኬሽን የዲሬክተርነት ቦታ ቀርበው እንዴት ምርጫው እንደከሸፈ ለማስተማር ያህል ጠቅሰው አልፈውታል። የደራሲው የኢንጂነር ተረፈ ውልደት ከካህን ቤተ ሰብ እንደመሆኑ ስለኢትዮጵያ ተዋህዶ ኦርቶዶክስ ቤተ ክርስቲያን ሰፋ ያለ ሀተታ ከማቅረብም በተጨማሪ እንደ አንድ ምዕመን ስለቤተክርስቲያኒቱ እድገትና ዓለም አቀፋዊ ተልእኮና መስፋፋት አስተያየታቸውን ዘርዘር አድርገው አቅርበዋል።

ደራሲው ኢንጂነር እምየ ምኒልክን አጥብቀው ከመውደዳቸው የተነሳ የመጽሐፉን መታሰቢያነት ለገናናው ንጉሠ ነገሥት ከማድረግም በላይ የቀድሞ ቤተ- መንግሥታቸውን እንደገና አሰርተው ‹‹የአንኮበር ቤተ መንግሥት ሎጅ.›› በማድረግ ለአለም አቀፍ ጎብኝዎች መዳረሻ እንዲሆን ማድረጋቸው ይታወቃል፡፡ ይህ መጽሀፍ የእንግሊዝኛ ክፍል ያለው ሲሆን የኢንጂነር ተረፈ ታሪክ ተመጥኖ የቀረበበት ነበር፡፡

ደራሲው በመጽሀፋቸው እድሜ ጠገብ የሆነውን የአለም ቴሌኮሙኒኬሽን ማህበር አወቃቀር እንዲለወጥ በተለይ ታዳጊ አገሮች ተሰሚነት እንዲያገኙ ትልቅ ትግል እንዳስፈለገና በመጨረሻም ስር ነቀል ለውጥ በመምጣቱ በምሳሌነት የቻይናን የኢንፎርሜሽን ቴክኖሎጂ ምጥቀት እንዴት እንደመጣ አብራርተዋል፡፡ ይህ መጽሀፍ የፊታችን እሁድ ከሰአት በደብረብርሀን ዩኒቨርሲቲ ሲመረቅ የዩኒቨርሲቲው ፕሬዚዳንትን ጨምሮ ሌሎች ጥሪ የተደረገላቸው እንግዶች ይገኛሉ፡፡ ‹‹የአንኮበሩ ሰው በጄኔቭ›› መጽሀፍ በ400 ገጽ ለንባብ የቀረበ ስራ ሲሆን በ200 ብርም እንደሚሸጥ ለማወቅ ተችሏል፡፡

Trending

By continuing to use the site, you agree to the use of cookies. more information

The cookie settings on this website are set to "allow cookies" to give you the best browsing experience possible. If you continue to use this website without changing your cookie settings or you click "Accept" below then you are consenting to this.

Close