Connect with us

Ethiopia

ዜጎችን ከዓለም አቀፍ የሽብር ድርጅቶች የሚጠብቅ የፀረ ሽብር ህግ እንደሚያስፈልጋት ተፎካካሪ የፖለቲካ ፓርቲዎች አስታወቁ

Published

on

የሽብር ድርጅቶች

ኢትዮጵያ ዜጎቿን ከዓለም አቀፍ የሽብር ድርጅቶች የሚጠብቅ የፀረ ሽብር ህግ እንደሚያስፈልጋት የተለያዩ ተፎካካሪ የፖለቲካ ፓርቲዎች አስታወቁ። ፋና ብሮድካስቲንግ ኮርፖሬት ያነጋገራቸው የመኢአድ፣ የኢዴፓ እና የገዳ ስርዓት አራማጅ ፓርቲ መሪዎች በስራ ላይ ያለው የፀረ ሽብር ህግ በመርህም ሆነ በአፈጻጸም በርካታ ክፍተቶች ያሉበት ነው ብለዋል።

የፌደራል ጠቅላይ አቃቢ ህግ እና ተፎካካሪ ፓርቲዎች በፀረ ሽብር ህጉ ዙሪያ በመምከር ላይ ይገኛሉ። በውይይቱ ላይም የአዲስ አበባ ዩኒቨርስቲ የህግ ምሁር የሆኑት ዶክተር ወንደሰን ደምሴ በመድረኩ ላይ በህጉ ይዘት ዙሪያ ጥናታቸውን አቅርበዋል፡፡

የህግ ምሁሩ የኢትዮጵያ የጸረ ሽብር ህግ ስለሽብር ጥልቅ ትርጉም የለውም የትርጓሜ ክፍተትም ይታይበታል ብለዋል፡፡ በጥቅሉ በመድረኩ የተለያዩ የጸረ ሽብር ህጉ አንቀጾች ተነስተው ውይይት ተደርጎባቸዋል፡፡ በዚህም አንቀጽ ሦስት ላይ የእንግሊዝኛው ትርጉም አሻሚና ለሌላ ትርጉም ይጋብዛል ተብሏል፡፡ ማቀድ፣ ማሴር፣ ማነሳሳት እና ሌሎቹንም ወንጀል አድርጎ የሚደነግገው አንቀጽ አራትም በውይይቱ የአዋጁ ክፍተት ሆነው ከተነሱት መካከል ይገኝበታል፡፡

የተጠርጣሪዎችን መረጃ በተመለከተ የሚዳስሰው አንቀጽ 14 ለብሄራዊ መረጃና ደህንነት አገልግሎት የተጠርጣሪዎችን መረጃ የመጥለፍ ህጋዊ መብት የሰጠ ሲሆን፥ ይህም የፍትህ ስርዓቱን የሚቃረን መሆኑ በመድረኩ ተነስቷል፡፡

እንዲሁም በጸረ ሽብር ህጉ አንቀጽ 19 የተጠቀሰው ያለፍርድ ቤት ትዕዛዝ ዜጎች እንዲያዙ የሚደነግገው አንቀጽም ክፍተት እንዳለበት ተገልጿል፡፡ በተጨማሪም በጸረ ሽብር ህጉ የሰሚ ሰሚ ማስረጃዎች ተቀባይነት ማግኘታቸው የአዋጁ ክፍተቶች ናቸው ተብለው ከተጠቀሱት መካከል ናቸው፡፡

በመድረኩ በህጉ ህልውና ዙሪያ የተለያዩ አስተያየቶች የተነሱ ሲሆን፥ አንዳንዶቹ በአዲስ ህግ መተካት እንዳለበት ሲያነሱ ሌሎች ደግሞ መሻሻል ያለባቸው አንቀጾች ተስተካክለው መቀጠል አለበት ብለዋል፡፡

Trending

By continuing to use the site, you agree to the use of cookies. more information

The cookie settings on this website are set to "allow cookies" to give you the best browsing experience possible. If you continue to use this website without changing your cookie settings or you click "Accept" below then you are consenting to this.

Close