Connect with us

Art and Culture

የትኛው ዘመን እቅፍ እንግባ፤

Published

on

የትኛው ዘመን እቅፍ እንግባ፤

የትኛው ዘመን እቅፍ እንግባ፤ | ሄኖክ ስዩም በድሬቲዩብ

አዲሱ ዘመን አፋፍ ላይ ክፍ ዘመንም ደጉ ዘመንም እጃቸውን ዘርግተዋል፡፡ አሮጌው ዘመን ብቻ ሳይሆን ጥላቻውም፣ መጨካከኑም፣ ዘረኝነቱም፣ እኔ አውቃለሁ ባይነቱም እንደ አለፈው ዘመን ይለፍልንና አዲስ ዘመን የእውነት አዲስ ይሁን፡፡ 

የራሳችን የቀን አቆጣጠር አለን፡፡ የራሳችንን አውደ አመት ከእኛ አልፎ የፈረንጅ ቀልብ ይስባል፤ ግና የራሳችን የዲሞክራሲ ባህል የለንም፡፡ ብዙ ቋንቋ ቢኖረንም በአንዱም አንደማመጥም፡፡ አባቶቻችን ገዳን ያህል የዲሞክራሲ እሴት ኖሯቸው እኛ በዲሞክራሲ ጥበብ ተንጋደናል፡፡ እከሌ ከእከሌ በሌለው ሁኔታ ታላቅ ታሪክ የተሸከምን ህዝቦች ብንኾንም እርስ በእርስ አንሸካከምም፤ አንዱን አንዱን ስለማሽቀንጠር የምናስብ ነን፡፡

ፕሮፌሰሩ እንዳሉት ታሪካችን ይጫነናል፡፡ ምኞታችን አውን እንዲሆን በግላችን መስዋዕትነት አንከፍልም፤ ያለቀለት ሀገር የምንፈልግና ባላለቀለት ሀገር የምንኖር ምስኪን ነን፡፡ ግን ደግሞ ከዓለም የሚለየን የዘመን ቀመር አለን፡፡ የሁሉም ዘመን ታሪካችን ግን መገዳደል ነበር፤ መጨካከን ነበር፡፡ አንዱ አንዱን የሚያሳድበት ነበር፡፡ ወረተኞችም ነን፡፡ ዘመኑን ተከትለን ስንነፍስ ስራችን እንዳይገነደስ እንኳ አንጠነቀቅም፡፡ ብዙ ዘመን ስንቀይር በአንዱም አልተቀየርንም፡፡

አሁንም ዘመን ለመቀየር ዋዜማ ላይ ነን፡፡ በግና ዶሮ ከመጨረስ ያለፈ ቂም ጨርስን ዘመን አንሻገርም፡፡ ለበዓል በጠመቅነው ጠላ በጣልነው ተጅ እንሰክራለን እንጂ ዘመን ስንዋጅ በፍቅር አንሰክርም፡፡ እናም አሁን አዲስ ዘመን አፋፍ ቆመን ከዚህ በፊት ያልነበረ አዲስ እድል እያየን ነው፡፡ ዘመን እጁን ዘርግቷል፡፡

ሁለት ዘመን፤ አንዱ የጥፋት ነው፡፡ አብልጠን የምንጠፋፋበት፣ አብልጠን ሞኝ የምንኾንበት፤ አንዱ ደግሞ የምህረት ነው፡፡ ወንድማማች እንደሆነን አስበን ፍቅር የምንገነባበት፣ እምነት የምናጠነክርበት፣ ጠንካራ ሀገር የምንፈጥርበት፡፡

እናም መልካም የዘመን እቅፍ ውስጥ እንግባ፤ አሮጌውን ዘመን ብቻ አንሸኘው፤ ትዕቢታችን ይሸኝ፣ የእኔ አውቃለሁ ባይነታችን ጨለማ ይገፈፍ፣ የዘረኝነት ወንዞች ይድረቁ፣ የዲሞክራሲ ጸሐይ ትውጣ፣ የቂም ጉም ይገፈፍ፣ እንደ ክረምቱ ዶፍ ደርሶ ሀገር ያጠፋው ጭካኔ ይቁም፡፡

አሮጌ መንፈስና አሮጌ ምኞት ከአሮጌው ዘመን ጋር አብሮ ይለፍ፡፡ ባለጊዜ የመሆን ረሃብ ይውጣ፤ ሁሉም ወንድሜ ነው የሚል የፍቅር ምንቸት ይግባ፡፡ አበባው የማይደርቅ እንዲኾን፣ ለምለሙ እንዳይጠወልግ፣ ተስፋችን ለትውልድ እንዲተርፍ እኔ የእኔን ልወጣ እንበል፡፡

** የቪዲዮ ዘገባዎችና መዝናኛዎችን ለማግኘት www.diretube.com ይጉብኙ
** የቴሌያዩ ኢትዮጵያን የተመለከቱ አለም አቀፋዊና ሀገራዊ ዜናዎችን ለእንግሊዘኛ ለማንበብ www.ethio.news ይጉብኙ

Trending

By continuing to use the site, you agree to the use of cookies. more information

The cookie settings on this website are set to "allow cookies" to give you the best browsing experience possible. If you continue to use this website without changing your cookie settings or you click "Accept" below then you are consenting to this.

Close