Connect with us

Ethiopia

ሐሜተኞች ሆይ፤ ከጠቅላያችን ራስ ውረዱ?!

Published

on

ሐሜተኞች ሆይ፤ ከጠቅላያችን ራስ ውረዱ?!

ሐሜተኞች ሆይ፤ ከጠቅላያችን ራስ ውረዱ?! | ፍሬው አበበ በድሬቲዩብ

ጠ/ሚዐብይ አሕመድ ከዩናይትድ ስቴትስ አሜሪካ መልስ ለቀናት ከዓይን ሰወር ማለታቸው ለሐሜተኞች ትልቅ በርን ከፍቷል።

ከወሬው አንዱ “ከአሜሪካ መልስ በጠባቂያቸው የግድያ ሙከራ ተደርጎባቸው ለጥቂት ተረፉ” የሚለው የከባድ ሚዛን ወሬ ይገኝበታል። እናም ይህ ወሬ ከመጥፋታቸው ጋር ምን አገናኘው?

ምናልባት፤ ሐሜት አስፋፊዎቹ ጠቅላያችን ከድንጋጤ መውጣት አልቻሉም ሊሉን ፈልገው ይሆናል።
ምናልባት፤ የእናንተ ጠ/ሚ ቦቅቧቃ ነው ፣ ፈሪ ነው የሚል መልዕክት ማስፋፋት ፈልገው ይሆናል።

ማን ያውቃል!…ምናልባት፤ ላለፉት አራት ወራት የታየው የለውጥ መንፈስ ውሃ በላው፤ ምን ትሆኑ እያሉን ይሆናል።

ይህም ሆኖ ይህ የሐሰት ዜና ከጠቅላይ ሚኒስትሩም ሆነ ከጽ/ቤታቸው በይፋ ምላሽ የተሰጠበት አለመሆኑ ለሐሜተኞች ሌላ ዙር ዕድል የፈጠረ መስሏል። የዕለት ሥራቸውን ሲያከናውኑ በቴሌቭዥን መስኮት ስናያቸው “ታግተዋል!” የሚል ወሬ በፍጥነት አየሩን ሲሞላው እያስተዋልን ነው።

ወዳጄ ዳንኤል ክብረት ምስጋና ይግባውና ከሚኒሶታ እስከ አዲስ አበባ የነበረውን የጠቅላይ ሚኒስትሩና ቡድናቸው ጉዞ በጣፋጭ ብዕሩ ሲከትብልን እግረመንገድን የሚባለው ሐሜት ሐሰት መሆኑን የሚያረጋግጥ ፍንጭ ሰጥቶናል።

ወዳጄ ዳንኤል ይህን ለመጻፍ የበቃው ከጠ/ ሚኒስትሩ ጋር በአንድ አውሮኘላን ስለተጓዘ ብቻ አይደለም፣ ከጠ/ ሚኒስትር ዐብይ ጎን ተቀምጦ የመጓዝ ዕድልም ስላገኘ ነው።

ይህን የመስለ የዓይን እማኝ ሲገኝ ደግሞ ቃላት እየሰነጠቁ ሐሜቱን መልሶ ማራገብ የሚፈልጉ ሰዎች ማየቴ የአንዳንድ ሰዎች ጣራ የነካ የወሬ ሱስ ደረጃ ለብቻው በዓለም ድንቃድንቅ መዝገብ መስፈር አለበት የሚል ክፉ ሃሳብ ሽው ብሎኛል።

ጠቅላያችንም “ወሬኛም ያውራ፣ሐሜት ይደርድር..” እንዳለው ድምፃዊ ዝምታን መርጠዋል። ሐሜት በተናፈሰ ቁጥር እግር በእግር እየተከተሉ መልስ መስጠት ተገቢ አለመሆኑን ባምንበትም እንዲህ ዓይነቱ የወሬ ዘመቻ አንዳንድ ሹማምንት እንደሚያደርጉት፤ ብሥራት አብሳሪ ዜናን ብቻ እየለቀሙ በቲዊተር ገጽ በመልቀቅ የሚከሽፍ አይደለም።

ይህ የተቀናጀ የሐሰት ወሬ ዘመቻ የጠቅላይሚኒስትሩ ቢሮ ጠንካራ የሕዝብ ግንኙነት ክፍል በወጉ እንዳላደራጀ ጠቋሚ ሆኖ አልፏል።

ቢያንስ ጠንካራ የሕዝብ ግንኙነት መኖር ሕዝብ ለአላስፈላጊ ሐሜት እንዳይጋለጥ በረዳ ነበር፤ ሐሜተኞችም በሐሰት ወሬ የማሸበር ጠንካራ አቅም ማግኘት ባልቻሉ ነበር።

ለማንኛውም ሐሜተኞች ሆይ ከጠቅላያችን ራስ ውረዱ?!… እሳቸው አሁንም በመልካም ጤንነት ፣ ደህንነት ላይ መሆናቸውን አውቀናልና!

** የቪዲዮ ዘገባዎችና መዝናኛዎችን ለማግኘት www.diretube.com ይጉብኙ
** የቴሌያዩ ኢትዮጵያን የተመለከቱ አለም አቀፋዊና ሀገራዊ ዜናዎችን ለእንግሊዘኛ ለማንበብ www.ethio.news ይጉብኙ

Trending

By continuing to use the site, you agree to the use of cookies. more information

The cookie settings on this website are set to "allow cookies" to give you the best browsing experience possible. If you continue to use this website without changing your cookie settings or you click "Accept" below then you are consenting to this.

Close