Connect with us

Ethiopia

ጠቅላይ ሚኒስትር ዶክተር አብይ አህመድ የአሜሪካ ጉብኝታቸውን አስመልክቶ የሰጡት መግለጫ

Helen

Published

on

ጠቅላይ ሚኒስትር ዶክተር አብይ አህመድ

የኢፌዴሪ ጠቅላይ ሚኒስትር ዶክተር ዐብይ አህመድ መላው ኢትዮጵያውያን በጋራ በአንድ ሃገር ጥላ ስር በፍቅር መኖር እንዲችሉ ሁሉም ዜጋ ሃላፊነቱን ሊወጣ እንደሚገባ ገለጹ። ጠቅላይ ሚኒስትሩ የአሜሪካ ቆይታቸውን አጠናቀው ዛሬ አዲስ አበባ ገብተዋል።

በአሜሪካ የነበራቸውን ቆይታ አስመልክቶ በሰጡት ማብራሪያም፥ ኢትዮጵያውያን በጋራ በአንድ ሃገር ጥላ ስር በፍቅር ይኖሩ ዘንድ ሁሉም ዜጋ ሃላፊነቱን ሊወጣ እንደሚገባ ተናግረዋል። አንዱ ሌላውን ሳያጠቃ በብሄር እና በሃይማኖቱ ተቻችሎና ተከባብሮ ውስጡን በማሸነፍ ለሃገራዊ አንድነት በጋራ ሊሰራ እንደሚገባም ነው የተናገሩት።

አሁን ላይ የታየው የለውጥ ጅማሮ እንዲቀጥልም ሁሉም በጋራ ሊሰራ ይገባልም ነው ያሉት ጠቅላይ ሚኒስትር ዶክተር ዐብይ አህመድ።

በአሜሪካ በሶስት ከተሞች ያደረጉት ህዝባዊ ውይይት ውጤታማ እንደነበር ያነሱት ጠቅላይ ሚኒስትሩ፥ በአሜሪካ የሚኖሩ ኢትዮጵያውያን የነበረውን ልዩነት ለማፍረስ ያላቸውን ዝግጁነት ያሳዩበት እንደነበርም ገልጸዋል።

ዶክተር ዐብይ በሰጡት መግለጫ የነበረውን የልዩነትና የጥላቻ ግንብ በዋሽንግተን ዲሲ እና በሎስ አንጀለስ መፍረሱን አስታውሰው፥ በሚኔሶታ ፍርስራሹን የመጠራረግ ስራ መከናወኑን ጠቅሰዋል።

በህዝባዊ ውይይቱ የመጨረሻ ቀን ላይ የልዩነት በሩ ገና መከፈቱ መሆኑን ያነሱት ጠቅላይ ሚኒስትሩ፥ በቀጣይ ላለው ሂደት ስኬት በስፍራው የሚኖሩ የኦሮሞና አማራ ብሄር ተወላጆች ለሃገር አንድነት በጋራ እንዲሰሩም አደራ ብለዋል።

4ኛው የኢትዮጵያ ኦርቶዶክስ ተዋህዶ ቤተክርስቲያን ፓትርያርክ አቡነ መርቆሪዮስ ወደ ኢትዮጵያ ሲገቡም፥ የመጀመሪያውን የድልድይ ግንባታ ጡብ አስቀምጠዋልም ነው ያሉት።

በአሜሪካ የሚኖሩ ኢትዮጵውያን ሃገራቸውንና ወገናቸውን ናፍቀዋል ያሉት ጠቅላይ ሚኒስትሩ፥ የቻሉት በአዲሱ አመት እንዲመጡ መጋበዛቸውን ጠቅሰው ወደ ኢትዮጵያ ሲመጡም ገንዘባቸውን ሳይሆን ፍቅርና እንክብካቤ ሊደረግላቸው እንደሚገባ አጽንኦት ሰጥተዋል።

ከዚህ አንጻርም ኢትዮጵያውያኑ ወደ ሃገራቸው ሲመጡ ሆቴሎችን ጨምሮ ሃገር ውስጥ ያሉ የንግድ ተቋማት፥ በቅናሽ ዋጋ አገልግሎት በመስጠት ገንዘብን ሳይሆን ሰውን በማትረፍ እንዲሰሩም ጠይቀዋል።

ዶክተር ዐብይ በመግለጫቸው ለሁለት ተከፍላ የቆየችው የኢትዮጵያ ኦርቶዶክስ ተዋህዶ ቤተክርስቲያን አንድ መሆኗን ዛሬ ማሳየቷን ጠቁመው፥ ይህ አንድነት የሁሉም ኢትዮጵያዊ ደስታ መሆኑንም ገልጸዋል።

ከዚህ ጋር ተያይዞም የተለያየው የኤርትራ ኦርቶዶክስ ተዋህዶ ቤተክርስቲያን አንድ እንደሚሆን ያላቸውን ተስፋ ገልጸው፥ እኛም የኤርትራን ኦርቶዶክስ ተዋህዶ ቤተክርስቲያን የማሸማገል ስራን እንሰራለን ብለዋል።

በአሜሪካ ቆይታቸው ከግንቦት ሰባት አመራሮች ጋር ስኬታማ ውይይት በማድረግ፥ የድርጅቱ አመራሮቹ ወደ ሃገራቸው ገብተው ለማገልገል ማረጋገጫ መስጠታቸውን አንስተዋል።

ከዚህ ባለፈም ለረጅም ጊዜ በተቃዋሚነት ከሃገራቸው ርቀው የቆዩት ጃዋር መሀመድና ታማኝ በየነም በቅርቡ ወደ ሃገራቸው ገብተው በአንድነት ድልድይ ግንባታው ውስጥ እንደሚሳተፉም አስረድተዋል።

ታማኝ እና ጃዋር በቅርቡ ወደ ሃገራቸው የሚገቡ ሲሆን፥ መላው ኢትዮጵያዊም ወንድሞቹን በወንድማዊ ፍቅር መቀበል እንደሚገባው ጠቁመዋል።

ጠቅላይ ሚኒስትሩ በአሜሪካ በነበራቸው ቆይታ ኢትዮጵያውያኑ ላደረጉት ደማቅ አቀባበልና ላሳዩት ልባዊ ፍቅርም ምስናጋቸውን አቅርበዋል።

Trending

By continuing to use the site, you agree to the use of cookies. more information

The cookie settings on this website are set to "allow cookies" to give you the best browsing experience possible. If you continue to use this website without changing your cookie settings or you click "Accept" below then you are consenting to this.

Close