Connect with us

Ethiopia

አምቦ የውበት ገንቦ-ጎዳናሽ ላይ በቆምሁ ጊዜ

Published

on

አምቦ የውበት ገንቦ-ጎዳናሽ ላይ በቆምሁ ጊዜ

አምቦ የውበት ገንቦ-ጎዳናሽ ላይ በቆምሁ ጊዜ |  ተጓዡ ጋዜጠኛ ሄኖክ ስዩም ወደ ምዕራብ ኢትዮጵያ ይዞን ሊጓዝ ነው፡፡ ታሪካዊቷ አምቦ ከተማን ጎዳናሽ ላይ በቆምሁ ጊዜ ሲል ትናንትና እና ዛሬዋን እንዲህ ይተርከዋል፡፡ አምቦ በእርግጥም የውበት ገንቦ ናት ይለናል፡፡ | ሄኖክ ስዩም በድሬቲዩብ

ጎዳናሽ ላይ በቆምሁ ጊዜ አብራክሽ ያፈራቸውን ጀግኖች አሰብሁ፤ በኢትዮጵያ ተራሮች ላይ በሀገር ፍቅር ስሜት የወደቁ ልጆችሽ የታላቋ ሀገር የታሪክ ጉልበት ናቸው፡፡ በእርግጥም የውበት ገንቦ ነሽ፡፡

ስለ ሀገራቸው አንገት በበርሃ የቀሩትን የአምቦ ጀግኖች ማን ዘርዝሮ ይጨርሳል? ጎዳናዎችሽ እንደ ወረቀት ይነበባሉ፡፡

የብርቱ ኢትዮጵያዊነት የሀገር ፍቅር ጽናት የነበራቸው፡፡ አደባባዮችሽ ላይ መቆም አብዮት በራፍ ላይ ሆኖ ትንትናን ማየት ነገን መመኘት ነው፡፡ ሃይስኩልሽን አሰብሁት፤ በዘመኑ የሀገር አውራ ነበር፡፡ ዘመን የማይተካቸውን ኢትዮጵያውያን ያፈራ መሀጸን፡፡

ትምህርት ቤትሽን አይቶ እንደ ባለቅኔው ሎሪት ያለውን ሰው የማያስታውስ ማነው? ዛሬ ቅዳሜ አይደለም፤ ቅዳሜ ገበያሽ ነው፡፡

ግን የቅዳሜን ያኽል በደመቀው አዘቦት ቀን በጎዳናሽ ላይ እያለፍሁ ነው፡፡ የውዳሴ ድምጼን ስሚኝ፤ ልክ የጉደርን ፏፏቴ ድምጽ እንደምታደምጪው፡፡

በሁሉቃ ፏፏቴ ድምጽ ዜማ እንደምትመሰጪው አምቦ እውነት እልሻለሁ፤ አንዳች የኢትዮጵያውነት መንፈስ በወጣልሽ እኩይ ስም አልፎ ይታየኛል፡፡

አምስት አመት ለወራሪ አልገዛም ያሉ ጀግኖች መውጫ መግቢያ ሆነሽ ከሰላሌ እስከ ወሊሶ ለዘለቀው ተጋድሎ የነጻነት መዲና የሆነሽበትን ዘመን እኮራበታለሁ፡፡ ጎዳናሽ ላይ ነኝ፡፡ ያን ጠበል ውሃሽን አየሁት፡፡ የትም ከስምሽ ጋር ኖሮ ስም ሆኖልሻል፡፡ የትም ድረስ ሲጠራ ትጠሪያለሽ፣ ስትጠሪ ይጠራል፡፡ ምድርሽ ቸር፣ ከርሱ ፈውስ ነው፡፡ አንቺን እንዲሁ ማለፍ አይቻለም፡፡ ብዙ ድንቅ ነገርሽን ማሰብ ግድ ነው፡፡

የሀገሬን ግብርና የቀየሩ ምሁራን ትናንትናቸው አምቦ ላይ የተበጀ ነበር፡፡ ግብርና ሳይንስ ሲሆን አምቦ የሳይንሱ አምባ ሆናለች የሚሉ ሕያው ምስክሮች እልፍ ናቸው፡፡ በወንጪ ውበት በአዋሽ ልግስና በምዕራብ ኢትዮጵያ አድማስ የታጀብሽ በር ነሽ፡፡ በዚህ በር መግባትና መውጣት ወደ እናት ሀገር ልብ መቅረብ ነው፡፡

ከሆንሸው አንዱም ሳይባል ካልሆንሽው ብዙ ቢባልም አንቺ የኢትዮጵያዊነት ጌጥ ነሽ፡፡ አብራክ ሀገር መውደድ ወልዶብሻል፡፡ እነ እከሌ ማለት የማይጨርሱትን መንገድ መጀመር ነው፡፡ እውነትም የውበት ገንቦ ነሽ፣ የእውነት ብቻ አይደለሽም፤ የሀገር ፍቅር፣ የኢትዮጵያዊነት፣ የጀግንነት ገንቦ፤ በጎዳናሽ ላይ ሆኜ እንዲህ አሰብሁ፡፡ DireTube

Trending

By continuing to use the site, you agree to the use of cookies. more information

The cookie settings on this website are set to "allow cookies" to give you the best browsing experience possible. If you continue to use this website without changing your cookie settings or you click "Accept" below then you are consenting to this.

Close