Connect with us

Art and Culture

“ዕውቀት ያራቅቃል – እምነት ይለውጣል”

Published

on

“ዕውቀት ያራቅቃል – እምነት ይለውጣል”

“ዕውቀት ያራቅቃል – እምነት ይለውጣል” | መላኩ አላምረው@DireTube)

ምድርም ሰማይም በስሜታውያን አይወረሱም።
ምድር ለአእምሯውያን ናት፤ ሰማይ ደግሞ ለመንፈሳውያን።

ብቻ አንተ ስሜታዊ አትሁን እንጅ ያሰብኸው ይሳካል። ያመንኸው ይሆናል። ግን ከስሜታዊ ውሳኔና እርምጃ ተጠበቅ። ከቻልህ ስሜትህንም አእምሮህንም ለመንፈስህ አስገዛ። ቢያንስ ግን አእምሯዊ ሁን። ሳታስብና የነገሩን ግራ-ቀኝ፣ ፊት_ኋላ ሳትመረምር አትወስን።

ሁሉንም ማሸነፍ ትፈልጋለህ? ከስሜታዊው ባሕርይህ ተለይተህ ከአእምሯዊነትህም ከፍ ብለህ መንፈሳዊነትህን ተላበስ። መንፈሳዊነት በእምነት ይወረሳል እንጅ በአእምሮ አይገዛም። እምነት የሁሉ ነገር ቁልፍ ነው።

የዓለም ልዩ ክስተቶች የተመስጦ ውጤቶች ናቸው። የመንፈስ ተመስጦ። የመንፈስ ተመስጦ ወደ ልዩ መገለጥ ይወስዳል። ሥጋዊም አእምሮ ከሚመረምረውም በላይ ከፍ ያለ ግኝት የመንፈስ ተመስጦና መገለጥ ውጤት ናቸው። የመንፈስ ተመስጦ ያለ ጽኑ እምነት አይመጣም። ጽኑ እምነትም በልዩ ተመስጦ ካልታገዘ ልዩ መገለጥን አያሳይም።

የአእምሮ መመርመር ጥበብን ይገልጣል። ዓለም የምትሸነፈው በአእምሯውያን ነው። የዓለም ምሥጢር የሚገለጠው ለሚያስቡና ለሚመረምሩ ነው። ዓለም የምትወረሰው ሐሳቦችብ/ምርምሮችን በሚተገብሩ ነው። ይህ የአእምሮን አቅም ይጠይቃል።
ከምድር ባሻገር ያለው ልዩ ዓለም ግን ከአእምሯዊነትም በላይ መንፈሳዊነትን ይጠይቃል።

የሰው ልጅ ልዩ ባሕርይ መንፈሳዊነቱ ነው። ይህ ባሕርይው “እምነት” የተባለን ትልቅ ሀብት ያጎናጽፈዋል። እምነቱ አእምሮውን ያጸነዋል። ያበረታዋል። ከእንቅፋቶች ያሻግረዋል። እምነት የሌለው ተስፍል የለውም። ያለ ተስፋ ውሎ ማደርም አይቻልም። ይህ ሁሉ ግን… ለስሜትልውያን አይሆንም። ስሜታዊነት የማይካድ ተፈጥሮ ቢሆንም… አእምሮንና መንፈስን ይገዛ ዘንድ ከፈቀድንለት ግን ያጠፋናል። ስሜት በአግባቡ መመራት አለበት። በአእምሮና በመንፈስ መታዘዝ ይኖርበታል።

“ዕውቀት ያራቅቃል እምነት ይለውጣል”
የአበው ድንቅ አባባል ነው።

በዓለም ላይ የምናያቸው ነገሮች ሁሉ የእምነት ውጤቶች ናቸው… ከፍጹም እምነት ያልሆነ ተግባር ለውጤት አይበቃም። በዓለም ጥበብ እይታ እምነት ሞኝነት ነው። ነገር ግን ነገሮችን የሚለውጠው እምነት ነው። ሳይንስም በእምነት ላይ የተመሠረተ እውነት ነው። በማይጨበጥ ዓለም ውስጥ ከእምነት ያልሆነ ምን ሕይወት አለ? በዓለም ጠቢብነትን በመሻት ከመወዛገብ ሞኝነት የተባለን እምነት መርጦ መለወጥን እንምረጥ… ለዚህ ሀሳብ ለመገዛትም እምነት ግድ ይላል….መጽሐፈ መክብብ 1፡ 17 “ጥበብንና ዕብደትን አውቅ ዘንድ ልቤን ሰጠሁ፣ ይህም ነፋስን እንደመከተል መሆኑን አስተዋልኩ” ይላል።

1ኛ ቆሮ. 2፡14 ላይም ይህ ተጽፏል..”ለፍጥረታዊ ሰው የእግዚአብሔር መንፈስ ነገር ሞኝነት ነውና አይቀበለውም፤ በመንፈስም የሚመረመር ስለሆነ ሊያውቀው አይችልም” ። ስለዚህ ለብዙ የዓለም ጥበብ ከምንደክም ይልቅ ጥቂት እምነት ቢኖረን እንለወጣለን። DireTube

Trending

By continuing to use the site, you agree to the use of cookies. more information

The cookie settings on this website are set to "allow cookies" to give you the best browsing experience possible. If you continue to use this website without changing your cookie settings or you click "Accept" below then you are consenting to this.

Close