Connect with us

Art and Culture

የግእዝ ጉባኤን ወልቂጤ ታድሜአለሁ

Published

on

የግእዝ ጉባኤን ወልቂጤ ታድሜአለሁ

የግእዝ ጉባኤን ወልቂጤ ታድሜአለሁ | ተጓዡ ጋዜጠኛ ሄኖክ ስዩም ለአራተኛ ጊዜ የተዘጋጀው ሀገር አቀፍ የግእዝ ጉባኤ ላይ ታድሟል፡፡ ትናንት የተጀመረው ጉባኤ ዛሬም ቀጥሎ ይውላል፡፡ የትናንቱን ድባብ እንዲህ ያካፍለናል፡፡ |  ሄኖክ ስዩም በድሬቲዩብ

ወልቂጤ ነኝ፡፡ የጉራጌ ዞን መዲና አራተኛውን ሀገር አቀፍ የግእዝ ጉባኤ ታስተናግዳለች፡፡ በጠዋት ወልቂጤ ዩኒቨርሲቲ ቅጥር ግቢ ታድናል፡፡

ከተለያዩ አካባቢዎች የመጡት የጉባኤው ተሳታፊዎች ግእዝ ላይ በሀገር ደረጃ ሲመከር ሊታደሙ ብቻ ሳይሆን በሀሳባቸው ግእዝን የሚታደግ እውነት ሊያጋሩ ነው፡፡ ይዘንባል፡፡ የክረምቱ በራፍ ላይ ሆኖ የቀቤናን ገጠር መንደሮች፣ የጉራጌን ውብ ሰፈሮች እንደማየት መታደል የለም፤ በዚህ ወቅት እንሰት ብቻ ሳይሆን አካባቢውም አረንጓዴ ነው፡፡ ከወልቂጤ ተነስተን አስር ኪሎ ሜትሮችን በመጓዝ ጉብሬ ገብተናል፡፡

ጉብሬ ወልቂጤ ዩኒቨርሲቲ አዳራሽ ውስጥ ነን፡፡ የወልቂጤ ዩኒቨርሲቲ ምክትል ፕሬዚዳንት ዶክተር ሲሳይ ሸዋአማረ እንኳን ደህና መጣችሁ ብለው የዩኒቨርሲቲውን ፕሬዚዳንት ጋበዙ፤ ፕሬዚዳንቱ ፕሮፌሰር ደጀኔ አየለ ሸጋ ንግግር ነበር ያደረጉት፤ የዩኒቨርሲቲውን መሻት አስረግጠው ነገሩን፤ እንዲህ ያለው ጉባኤ ለዩኒቨርሲቲው ክብሩም ዓላማውም መሆኑን አስረዱን፡፡

የክብር እንግዳው እና የባህልና ቱሪዝም ሚኒስቴር መስሪያ ቤትን የወከሉት አቶ አብረሃም ጦሻ የብሔራዊ ቤተ መዛግብትና ቤተ መጻሕፍት ኤጀንሲ ዋና ዳይሬክተር ናቸው፡፡

ዳይሬክተሩ የግእዝን ፋይዳ፣ ለሀገር ያበረከተውን አስተዋጽኦ እና በዩኔስኮ ለመመዝገብ ስለበቁ የጽሑፍ ቅርሶቻችን ያተኮሩ ሀሳቦችን በመክፈቻ ንግግራቸው አቅርበዋል፡፡ የዩኒቨርሲቲ ምሁራን አሉ፡፡ ብፁእ አቡነ መልከጸዴቅ በእንግድነት ታድመዋል፡፡ የቋንቋ ሊቃውንት የዝግጅቱ ተሳታፊዎች ናቸው፡፡

ይህ ጉባኤ ለአራተኛ ጊዜ የተካሄደ ሲሆን የዝግጅቱ መጀመሪያ የሦስት አመታት ዝግጅቶች ፋይዳን የሚዳስስ ጥናት ነበር፡፡ በይኩኖአምላክ መዝገቡ የቀረበው የምዕላደ-ጉባኤ /keynote Speech/ ጉባኤውን በእጅጉ አነቃቅቶ የተለያዩ ጽሑፎች መቅረብ ጀመሩ፡፡

የደብረ ማርቆስ ዩኒቨርሲቲው ሊቀ ኅሩያን ተግባሩ አዳነ የግእዝ ታሪካዊ መረጃዎች በደቡብ እና በማዕከላዊ ኢትዮጵያ በገድለ ዜና ማርቆስ በሚል መነሻ ጥናታቸውን አቀረቡ፡፡

የግእዝ መምህሩ ዘርኣዳዊት ኣድሃና ግእዝ ወ ኢትዮጵያ በሚል ያቀረቡት ጽሑፍ ደግሞ ግእዝ ለኢትዮጵያ መለያነቱ ላይ ያተኮረ የብሔራዊ መገለጫችን መሆኑን አጽንኦት የሰጠ ነበር፡፡

ዶክተር ፍሬሕይወት ባዩ አባ አበክረዙን ገድልን ዐውደ-ንባባዊ ትንታኔ የተመለከተ ጥናት እንዲሁም በአቶ ጥበቡ አንተነህ ለግእዝ ሥነ-ጽሑፍ ሀብቶች በሚደረግ ጥበቃ ዙሪያ ያተኮረ ጥናት ቀርቧል፡፡

መድረኩን የመቐለ ዩኒቨርሲቲው ዶክተር ሀጎስ አብረሃ እና የወልቂጤ ዩኒቨርሲቲው ዶክተር ትግሉ ግዛ አወያይተውታል፡፡ የምሁር ኢየሱስ መገኛ፣ የምድረ ከብድ አቦ እና የኤነር አማኑኤል ምድር የግዕዝ ጉባኤን ሲያስተናግድ የዘመናት የግእዝ ትምህርት ማዕከላት የነበሩት የአብነት ትምህርት ቤቶች በዘጋቢ ፊልም ተወስተው ነው፡፡

የኢ.ፊ.ዲ.ሪ ባህልና ቱሪዝም ሚኒስቴር፡ የደቡብ ክልል ባህልና ቱሪዝም ቢሮ፡ ከኢትዮጵያ ብሔራዊ ቤተ መዛግብትና ቤተ መጽሐፍት ኤጀንሲና ከወልቂጤ ዪኒቨሲቲ ጋር በመተባበር የተዘጋጀው ጉባኤ ዛሬም ይቀጥላል፡፡ DireTube

Trending

By continuing to use the site, you agree to the use of cookies. more information

The cookie settings on this website are set to "allow cookies" to give you the best browsing experience possible. If you continue to use this website without changing your cookie settings or you click "Accept" below then you are consenting to this.

Close