Connect with us

Art and Culture

ህዝበ ሙስሊሙ 1ሺህ439ኛውን የረመዳን ጾም ነገይጀምራል

Helen

Published

on

ህዝበ ሙስሊሙ በበቂ ዝግጅትና መንፈሳዊ ጽናት ከፍ ባለ ጉጉት የሚጠብቀው ወር ፤ በእስላማዊ የሂጅራ አቆጣጠር ዘጠነኛው ወር – ረመዳን፡፡ የኢትዮጵያ እስልምና ጉዳዮች ጠቅላይ ምክር ቤት ፕሬዚዳንት ሼህ መሃመድ አሚን ጀማል ታላቁና በናፍቆት የሚጠበቀው የረመዳን ጾም ቀን በጸሎት ሌሊት ደግሞ በኢባዳ ነብስ የሚጸዳበት ነው ብለዋል። ሙስሊሙ ማህበረሰብም ይህን ቅዱስ እና ታላቅ የጾም ወቅት፥ ሰደቃ በማብዛት፣ የታመሙትን በመጠየቅና ከተቸገረው ጎን በመሆን ሀይማኖታዊ ግዴታውን እንዲወጣም ጥሪ አቅርበዋል።

የረመዳን ፆም ህዝበ ሙስሊሙ ለአገሪቱ ሰላም፣ እድገት ብልፅግናና አንድነት ተግቶ የሚጸልይበት ወቅት መሆን እንዳለበትም ጠቅላይ ሚኒስትር ዶክተር አብይ አህመድ ገልጸዋል፡፡ የረመዳን ፆም በማስመልከት ጠቅላይ ሚኒስትሩ ለመላው የእስልምና እምነት ተከታዮች ‘የእንኳን አደረሳችሁ’ መልዕክታቸውን አስተላልፈዋል፡፡ የረመዳን ፆም ለኢትዮጵያ ሰላም እና እድገት፣ አንድነትና ብልጽግና ተግተን የምንጸልይበት ወር እንዲሆንም ተመኝተዋል።

“ጾሙ ወደ ውስጣችን የምንመለከትበት ከራሳችን ጋር ታርቀን ከፈጣሪ ጋር የምንገናኝበት ወቅት በመሆኑ ለአገርና ህዝብ የሚበጅ ሀሳብና በተጨባጭ ወደ መሬት የሚወርድ ተግባር እንድንከውንበት እድል ይሰጠናል” ብለዋል። ህዝበ ሙስሊሙ ህዝቡ በሰላም ተዋዶ በፍቅር ተዋህዶ የመኖር የዘመናት ታሪኩ ዛሬም ነገም ወደ ፊትም አብሮት ይዘልቅ ዘንድ እንደ ሁል ጊዜው በጸሎቱ እንዲማፀን ጥሪ አቅርበዋል።

የረመዳን ወር የተለየ እንደሆነ የገለጹት ጠቅላይ ሚኒስትሩ “ከሰላም፣ ከፍቅር፣ ከመረዳዳት፣ ከአንድነት፣ ከእዝነት ከመስጠት እና ከሌሎች በርካታ መንፈሳዊ ትሩፋቶች ጋር የተዛመደ ወር ከመሆኑ ጋር ስለሚሰናሰል የረመዳን ታላቅነት እና ይዞልን የሚመጣውም በረከት ብዙ ነው፡፡” ብለዋል።

ከዚህ ጋር በተያያዘ ዜና ታላቁን የረመዳን የጾም ወር በይቅር ባይነት ፣ በፍቅርና በሰላም ለማሳለፍ መዘጋጀታቸውን በጅማ ከተማ የእስልምና ኃይማኖት ተከታዮች መግለጻቸውም ተነግሯል፡፡ 1 ሺህ 439ኛውን የረመዳን ጾም በተለያዩ የህይወት አጋጣሚዎች የተቀያየሙ ሰዎች ይቅር እንዲባበሉ በማግባባትና አብሮነትን የሚያጠናክሩ የኃይማኖቱን እሴቶች አክብረው እንደሚያሳልፉ የኃይማኖቱ ተከታዮች ለኢዜአ ተናግረዋል።

በከተማዋ ከሚኖሩ የኃይማኖቱ ተከታዮች መካከል ሼህ አህመድ ሼህ ሀሰን እንዳሉት ጾሙን የሚያሳልፉት ለሰው ልጆች ሁሉ ደግ ደጉን በመስራት ነው፡፡ “ በታላቁ የረመዳን ወር ከቤተሰቦቻችን ጀምረን ለሁሉም የሰው ልጅ መልካም ስራ የመስራት ተግባራችንን አጠንክረን መቀጠል አለብን “ብለዋል ። የእስልምና ኃይማኖት ለሰላም የሚሰጠው ዋጋ ከፍተኛ መሆኑን በመገንዘብ ለአካባቢያቸው ሰላም መጠበቅ ህዝበ ሙስሊሙ በተለየ መልኩ በኃላፊነት መንቀሳቀስ እንደሚጠበቅበትም ጠቁመዋል።

ፋና ቴሌቭዥን የረመዳን ወር መግባትን ተከትሎ ጾሙን በምን አግባብ እንደሚያሳልፉ የሀይማኖቱን ተከታዮች ጠየቆ ነበር፡፡ የእስልምና ጉዳዮች ጠቅላይ ምክር ቤት ፕሬዝዳንት በሼህ ሙሀመድ አሚን ጀማል የመልካም ጾም ምኞትንም አካቷል፡፡ እንድትመለከቱት እንጋብዛለን፡፡

Trending

By continuing to use the site, you agree to the use of cookies. more information

The cookie settings on this website are set to "allow cookies" to give you the best browsing experience possible. If you continue to use this website without changing your cookie settings or you click "Accept" below then you are consenting to this.

Close