Connect with us

Ethiopia

የኢፌዴሪ ጠቅላይ ሚኒስትር ዶክተር አብይ አህመድ በሚሊንየም አዳራሽ ያደረጉት ንግግር

Helen

Published

on

በሚሊንየም አዳራሽ ያደረጉት ንግግር

ጠቅላይ ሚኒስትር ዶክተር አብይ አህመድ በሚሊኒየም አዳራሽ ለተለያዩ የህብረተሰብ ክፍሎች ንግግር አድርገዋል፡፡ 25 ሺ ሰዎች በታደሙት በዚህ ዝግጅት ላይ መንግስት የሃገሪቱን ሰላም ለማረጋገጥና የተቀዛቀዘውን ኢኮኖሚ ለማነቃቃት በትጋት እንደሚሰራ ነው ጠቅላይ ሚንስትሩ ያስታወቁት፡፡ ባለፉት አመታት ተፈጥሮ በነበረው ግጭት ሃገሪቱ ችግር ውስጥ ገብታ እንደነበር ያነሱት ጠቅላይ ሚኒስትሩ፥ ችግሩ በህዝቦች አብሮ የመኖርና የአንድነት ባህል መቀረፉን ጠቅሰዋል።

ዶክተር አብይ በንግግራቸው የሃገሪቱ ሃብት ህዝቦቿ ናቸው ያሉ ሲሆን በህዝቦች መካከል መቃቃር ተፈጥሮ የሃገሪቱ ኢኮኖሚያዊ እንቅስቃሴ እንዳይገታ ሁሉም በሃገራዊ ሃላፊነት ለሃገሩ ዘብ እንዲቆም ጥሪያቸውን አቅርበዋል። ለኢኮኖሚው እድገት እንቅፋት የሆነውን የውጭ ምንዛሪ እጥረት ለመቅረፍም ጠንካራ ስራዎች እንደሚሰሩ ነው ያስታወቁት፡፡ ለውጭ ምንዛሪ ብክነት ምክንያት እየሆኑ ባሉ ግዙፍ የመንግስት ፕሮጀክቶች ላይ ክትትል በማድረግ የሚታዩ ክፍተቶችን ለመቅረፍ የእርምት እርምጃ እንደሚወሰድም አስረድተዋል።

በአገልግሎት አሰጣጡ ላይ የሚታዩ ቅሬታዎችን ለመፍታት የአገልጋይነት መንፈስን የተላበሰና ሙስናና ብልሹ አሰራርን የሚጠየፍ ሰራተኛ ለመፍጠር ይሰራል ብለው ጠቅላይ ሚንስትሩ፡፡በተቋማት የሚደረገው ምደባ ዕውቀትና ክህሎትን መሰረት ያደረገ እንደሚሆን ጠቅሰው፥ በዚህም የመንግስት የማስፈጸም አቅም ይሻሻላል ብለዋል፡፡ በተንዛዛ ስብሰባ የሚባክን ጊዜና ሃብትን ለማስቀረትና የህዝቡን ጥያቄ መመለስ የሚያስችል በዘመናዊ ቴክኖሎጅ የታገዘ መንግስታዊ አሰራር እንዲኖር እንደሚደረግም ገልጸዋል።

ከትምህርት ጋር ተያይዞም የትምህርት ጥራት ላይ ያተኮረ ፍኖተ ካርታ በማዘጋጀት የትምህርት ጥራትን ለማሻሻል ጥረት እንደሚደረግም አውስተዋል። ዴሞክራሲያዊ ስርዓቱ እንዲጎለብት ተፎካካሪ የፖለቲካ ፓርቲዎች መጠናከር እንደሚኖርባቸው ጠቅሰው፥ ቀጣዩን ምርጫ ነጻ፣ ፍትሃዊና ታማኝ ለማድረግ መንግስት በቅንጅት እንደሚሰራ አስረድተዋል።የፍትህ ስርዓቱ ላይ ለውጥ የሚያመጡ የመፍትሄ እርምጃ እንደሚወሰድ ያነሱት ጠቅላይ ሚኒስትር ዶክተር አብይ፥ ስርዓቱ የህግ የበላይነት የሚረጋገጥበት፣ ከፖለቲካ ወገንተኝነት የፀዳና ህዝቡ ትክክለኛ ፍርድ የሚያገኝበት እንዲሆን እንደሚደረግ አስታውቀዋል። ከዚህ ባለፈም ለቅሬታ ምንጭ የሆኑ አንዳንድ ህጎች ላይ ማሻሻያ እንደሚኖር ጠቅሰዋል።

የፀጥታና የደህንነት ተቋማትም ከፖለቲካ ወገንተኝነት ነጻ ሆነው ህገ መንግስታዊ ስርዓቱን የሚጠብቁ እንዲሆኑ ይሰራል ሲሉም በመልዕክታቸው አንስተዋል። የሚዲያ ተቋማትም በሃገር ግንባታ፣ ሰላም እና ልማትን ከማረጋገጥ አኳያ እንዲሁም ከወጣቶች የስራ እድል ፈጠራ ጋር በተያያዘ ያለባቸውን ሃላፊነት ሊወጡ እንደሚገባም ጠቁመዋል።የሃይማኖት መሪዎችም ትውልድ በመቅረጽ፣ ሰርቆ የመክበር አካሄድን እና ሙስናን በማውገዝ፥ የኪነ ጥበብ ባለሙያዎች እሴቶችን በሚያጠናክሩ ጉዳዮች ላይ በማተኮር እንዲሁም መምህራን ትውልድን በመቅረጽ ላይ ትኩረት እንዲያደርጉም መልዕክታቸውን አስተላልፈዋል።

Trending

By continuing to use the site, you agree to the use of cookies. more information

The cookie settings on this website are set to "allow cookies" to give you the best browsing experience possible. If you continue to use this website without changing your cookie settings or you click "Accept" below then you are consenting to this.

Close