Connect with us

Education

የነጭ ሣር ዝርያን ከጥፋት ለመታደግ ምርምር እያካሄደ መሆኑን የአ/ ምንጭ ዩኒቨርሲቲ አስታወቀ

Published

on

የነጭ ሣር ዝርያን ከጥፋት ለመታደግ ምርምር እያካሄደ መሆኑን የአ/ ምንጭ ዩኒቨርሲቲ አስታወቀ

በነጭ ሣር ብሔራዊ ፓርክ ህገወጥ ግጦሽን ተከትሎ በአረም መስፋፋት እየተመናመነ የመጣውን የነጭ ሣር ዝርያ ለመታደግ የሚያስችል ምርምር እያካሄደ መሆኑን አርባ ምንጭ ዩኒቨርሲቲ አስታወቀ።

የሣር ዝርያውን መመናመን ተከትሎም ከሣሩ ጋር ተፈጥሯዊ ቁርኝት ያላቸው የዱር እንስሳት ከፓርኩ እየሸሹ መሆኑ ተገልጿል።

የዩኒቨርሲቲው የምርምርና የማህበረሰብ አገልግሎት ምክትል ፕሬዚዳንት ዶክተር ስምኦን ሽብሩ ለኢዜአ እንደገለፁት ፓርኩ ስያሜውን ያገኘበት የነጭ ሣር ዝርያ በአካባቢያዊ ተጽዕኖ ምክንያት የመጥፋት አደጋ ተጋርጦበታል።

በፓርኩ ውስጥ የሚካሄድ ህገ ወጥ ግጦሽ ሳሩ ላይ ከሚያስከትለው ጉዳት በተጨማሪ የእንስሳትን ኮቴ ተከትሎ የፓርኩ ሜዳማ ስፍራ “ገርጌሮ” በተባለ አረም መሸፈኑ ለዝርያው መመናመን ተጨማሪ ምክንያት ሆኗል ” ብለዋል ።

አረሙ የአካባቢውን የኮትቻ አፈር ወደ ለምነት በመቀየር የሣሩን ስር ከአፈሩ በማላላትና በማላቀቅ እንዲሁም በቅጠሎቹ ጥላ ሳሩን ተፈጥራዊ ብርሃንና ሙቀት እንዳያገኝ በመሸፈን እያጠፋው መሆኑን አስረድተዋል ።

ዶክተር ስምኦን እንዳሉት የሣር ዝርያው መመናመን ከሣሩ ጋር ተፈጥሮአዊ ቁርኝት ያላቸው የዱር እንስሳት ከፓርኩ ሜዳማ ስፍራ ወደ ዳርቻ እንዲሸሹ አድርጓል።

የሳር ዝርያው እየተመናመነ መምጣት የፓርኩን ገጽታና ህልውና አደጋ ላይ እየጣለው መሆኑንም አመልክተዋል ።

የሳሩ ዝርያ ከጠፋ የትም ቦታ እንደማይገኝም የገለጹት ዶክተር ስምኦን፣ ” በፓርኩ ውስጥ ያሉ ሌሎች እንስሳትና እጽዋትን በማይጎዳ መልኩ አረሙን ማስወገድ ከተቻለ ሳሩ በፍጥነት ራሱን መተካት እንደሚችል በጥናት ተረጋግጧል” ብለዋል።

“ገርገሮ” የተሰኘውንና በአሁኑ ወቅት በፓርኩ የተስፋፋውን አረም ለማስወገድ ተጨማሪ ምርምር እየተካሄደ መሆኑንም ጠቁመዋል።

እንደ ዶክተር ስምኦን ገለጻ ዩኒቨርሲቲው ምርምሩን እያካሄደ ያለው የሣር ዝርያውን ከጥፋት ለመታደግ ሌሎች ባለድርሻ አካላት እያደረጉ ያለውን ጥረት ለማገዝ ነው ።

የነጭ ሣር ብሔራዊ ፓርክ ጽህፈት ቤት ኃላፊ አቶ አብርሐም ማሪዬ በበኩላቸው፣ ለሳሩ መመናመን ምክንያት የሆኑ ጉዳዮች በጥናት ከተረጋገጡ ወዲህ የፓርኩ ውስጥ ሜዳማ ሥፍራ ከቤት እንስሳት ንኪኪ ነጻ እንዲሆን መደረጉን ገልጸዋል።

“ይሁንና እስካሁን ድረስ ከፓርኩ ወሰን ማካለል ጋር ያለው ችግር ባለመፈታቱ ሜዳው አሁንም ከስጋት ነጻ አይደለም ” ብለዋል ።

በፓርኩ በ310 ሄክታር ሜዳማ ሥፍራ የሚሸፍነው የነጭ ሣር ዝርያ ለፓርኩ ዋነኛ ውበት ከመሆን ባለፈ የጎበኚዎችን ቀልብ እንደሚስብ የገለጹት አቶ አብርሐም፣ “የሣር ዝርያውን ከጥፋት ለመታደግ ከ10 ሚሊዮን ብር በላይ ያስፈልጋል” ብለዋል፡፡

አርባ ምንጭ ዩኒቨርሲቲ የሚያደርገውን የሙያ ድጋፍ በመጠቀም ገንዘቡን ማግኘት የሚያስችል ፕሮጀክት መቀረጹንና የትግበራ ሥራውን በቅርቡ ለመጀመር ዝግጅት መጠናቀቁንም አስታውቀዋል ።

 

Trending

By continuing to use the site, you agree to the use of cookies. more information

The cookie settings on this website are set to "allow cookies" to give you the best browsing experience possible. If you continue to use this website without changing your cookie settings or you click "Accept" below then you are consenting to this.

Close