Connect with us

Ethiopia

የኢህአዴግ ስራ አስፈጻሚ ኮሚቴ በመጪው ዕሁድ መጋቢት 2, 2010 ዓ.ም ስብሰባውን ይጀምራል

Helen

Published

on

የኢህአዴግ ስራ አስፈጻሚ ኮሚቴ

የኢህአዴግ ስራ አስፈፃሚ ኮሚቴ ስብሰባ የፊታችን እሁድ ይጀምራል፡፡ ኮሚቴው አራቱ የግንባሩ ብሄራዊ ድርጅቶች ከዚህ ቀደም አድርገውት በደረሱበት የግምገማ ውጤት ላይ ይወያያል፡፡ ስራ አስፈፃሚ ኮሚቴው በታህሳስ ወር ባካሄደው ስብሰባ ያስተላለፋቸው ውሳኔዎች በየብሔራዊ ድርጅቶቹ እንዴት እየተፈፀሙ እንዳሉም በጥልቀት ይፈትሻል ተብሏል፡፡ ስራ አስፈፃሚ ኮሚቴው ሀገሪቱ ያለችበትን ወቅታዊ ሁኔታ መነሻ በማድረግ ከዚህ ቀደም ያሳለፋቸው ውሳኔዎች ስላሉበት ደረጃ እንደሚገመግምና ለቀጣይም አቅጣጫዎችን እንደሚያስቀም የኢህአዴግ ፅህፈት ቤት ሀላፊ አቶ ሽፈራው ሽጉጤ ለጋዜጠኞች ተናግረዋል፡፡ ከዚህ በተጨማሪም ኮሚቴው በስብሰባው ባለፉት ስድስት ወራት በመላው ሀገሪቱ የተከናወኑ ስራዎችን እና ፀድቀው ወደ ስራ የገቡ እቅዶችን አፈፃፀም እንደሚገመግምም አንስተዋል።

በተጨማሪም የኢህአዴግ ሊቀመንበር አቶ ኃይለማርያም ደሳለኝ ያቀረቡትን ከሃላፊነት መልቀቂያ ጥያቄ ተከትሎ የተፈጠረውን የአመራር ጉድለት የማሟላት አጀንዳን ተወያይቶ ለምክር ቤቱ እንደሚያቀርብ አቶ ሽፈራው ገልፀዋል። በሌላ በኩል በኢህአዴግ ህገ ደንብ መሰረት የድርጅቱ ጉባዔ ከ2 ዓመት እስከ 2 አመት ከ6 ወር ባለው ጊዜ ውስጥ መካሄድ ሲገባው፤ በፀጥታና ወቅታዊ ጉዳዮች የተነሳ ባለመካሄዱ ምክር ቤቱ በህገ ደንቡ ላይ በተቀመጠለት ሃላፊነት መሰረት ጉባዔው የሚካሄድበትን ወቅት ይራዘም፤ አይራዘም በሚለው ላይ ውይይት ያካሂዳል ነው ያሉት።

የኢህአዴግ ስራ አስፈፃሚ ኮሚቴ ታህሳስ ላይ ባደረገው ውይይት ወቅታዊ ሁኔታዎችን ታሳቢ በማድረግ አስቸኳይ ጊዜ አዋጅ ተግባራዊ ሊሆን እንደሚችል በተባበረ ድምፅ ወስኖ እንደነበር ያስታወሱት አቶ ሽፈራው፥ ከስብሰባው በኋላ በምስራቅ አማራ አካባቢዎች እና ኋላም በኦሮሚያ ክልል አንዳንድ አካባቢዎች የፀጥታ ችግር በመነሳቱ አዋጁ ተግባር ላይ መዋሉን ገልፀዋል።

በአንድ በኩል የአስቸኳይ ጊዜ አዋጁን ተግባራዊ ማድረግና የሃገሪቱን የፀጥታ ችግር ማስተካከል በሌላ በኩል ደግሞ የብሔራዊ ድርጅቶች የተናጠል ጉባዔዎችን ማካሄድ ወቅታዊ ስራዎች ስለነበሩ የኢሕአዴግ ስራ አስፈጻሚና የምክር ቤቱ ስብሰባዎች እስካሁን አለመካሄዳቸውን አንስተዋል።

ከስራ አስፈፃሚ ኮሚቴው ስብሰባ መጠናቀቅ በኋላም የኢህአዴግ ምክር ቤት ስብሰባ እንደሚካሄድም አቶ ሽፈራው ገልፀዋል። በዚህ የምክር ቤቱ ስብሰባም የኢህአዴግ ሊቀመንበር እንደሚመረጥ ነው የጠቆሙት። በድርጅታዊ እንቅስቃሴ፣ ችግሮች እና መፍትሄዎች ላይም ምክር ቤቱ ተወያይቶ ውሳኔዎችን እንደሚያሳልፍ እና አቅጣጫዎችን እንደሚያስቀምጥ ይጠበቃል።

Trending

By continuing to use the site, you agree to the use of cookies. more information

The cookie settings on this website are set to "allow cookies" to give you the best browsing experience possible. If you continue to use this website without changing your cookie settings or you click "Accept" below then you are consenting to this.

Close