Connect with us

Ethiopia

ዘመነ መሣፍንት የተሸኘበት-መይሳው የነገሠበት ቀን

Helen

Published

on

ዘመነ መሳፍንት

ተጓዡ ጋዜጠኛ ሄኖክ ስዩም የዛሬውን ቀን በታሪካችን ምዕራፍ ዘመነ መሳፍንት የተሸኘበት ቀን ነው ይለናል፡፡ ዐፄ ቴዎድሮስ የነገሡበትን ዕለት ከዘመኑ ድባብ ጋር አስተሳስሮ እንዲህ ያካፍለናል፡፡ | ሄኖክ ስዩም በድሬቲዩብ

አንድ ሀገር ብዙ ቦታ ለብዙ መሳፍንት ሆና አንዱ ህዝብ ብዙው ቦታ ተከፍሎ እርስ በእርስ የሚተላለቅበት የጨለማ ዘመን ነበር፡፡ ይህንን ጨለማ የሚፈውሰው ብርሃን ቧሂት ተራራ አናት የካቲት ሦስት ቀን ፈነጠቀ፡፡ ራስ ዐሊን ተከትሎ የደጃች ውቤ ጦር በመይሳው ተፈታ፡፡

ለእግሩ ጫማ የማይሻው ንጉሥ ከእሱ ምቾት በላይ የደላትን ሀገር ለማየት ንጉሥ ሆነ፡፡ ከደጀን ስር፤ ጃን አሞራ ለንግሥና ሲመቱ ሲደግሱ በከረሙት ራስ ድግስ፤ ቋረኛው ስሜን እነግራችኋለሁ እንዳለው ስሙን ተናገረና ዐፄ ቴዎድሮስ ተባለ፡፡

ዳግማዊ ቴዎድሮስ ከሰለሞናዊው ሀረግ የሚመዘዝ ዘር ሳይኖረው ከአማቾቹ ቤት የጀመረውን የመሳፍንት ምርኮ በድፍን ሀገሩ እውን አድርጎ ጀግንነቱን አሳየ፡፡ ጭካኔአቸው ወደር የለውም፤ ጀግንነታቸው ግሩም ነው የሚባሉ ባላባቶች በሙሉ እግሩ ስር ወደቁ፡፡ እምቢ ያለም ያለ ሽሽት እጣ ፈንታ አልነበረውም፡፡

ደጃች ውቤን ሊቀቡ የመጡት አቡነ ሰላማ ያለ ማንገራገር ለመይሳው ዘውድ ደፉ፡፡ ይህ ዘውድ መይሳው አናት ላይ ሲጫን አንድን ሀገር ተቀራምቶ መግዛት ከኢትዮጵያ አናት ላይ ወረደ፡፡ ከዚያ በኋላ እርስ በእርስ የነበረው ትከሻ መለካካት የማን ሀገር ትንሽ ሆና ተባለና ታላቋ ብሪታኒያ ጋ ደረሰ፡ ደጃች ውቤ ታላቅ መስፍን ነበሩ፡፡ ባህር ድረስ የሚዘልቀው ግዛታቸው ከዓለም ጋር በቀላሉ ሲያስተዋውቃቸው ኖሯል፡፡

ዛሬ ወገራ ድረስ ይሰማል የሚባለውን የደረስጌ ደውል ያሰቀሉበት ቤት ለንግስና ያሰሩት የጎንደር ዘመንን ኪነ ህንጻ ጥበብ የተላበሰ ግንብ የደጃች ውቤን ንግስና ለማየት እንዳማረው ቀረ፡፡ ጣናን ጀልባ ሰርተው የደፈሩት፣ መሳሪያ ሽጡልን፣ ነፍጥ እርዱን የሚለውን ብሂል ጥለው መድፍ እንስራ ብለው የተነሱት ንጉሥ በየካቲት መጀመሪያ የኢትዮጵያ መሪ ሆኑ፡፡ ከዚያም አላረፉም፤ ሸዋ እጃቸው እስኪገባ፤ ተድላ ጓሉ እሺ እስከሚል፣ ወርቂት አምና እስክትቀበል አላረፉም፡፡

ዶክተር ብላንክን ጠቅሶ ጋዜጠኛው ጳውሎስ ኞኞ ሲጽፍ በጠዋት መነሳት የሚወዱ፣ ለአለባበሳቸው ብዙም ግድ የሌላቸው፤ ጫማ እንኳን የማይለብሱ ይላቸዋል፡፡ ባዶ እግር በምትሄድ የመሳፍንት ሀገር በእርግጥ ጫማ ቅንጡ ነው፡፡ የዛሬ 165 ዓመት የነገሡት መይሳው ከዚያ በኋላ በድፍን ኢትዮጵያ የጀግንነት ልክ ሆነው ስማቸው ከመቃብር በላይ ይኖራል፡፡

Trending

By continuing to use the site, you agree to the use of cookies. more information

The cookie settings on this website are set to "allow cookies" to give you the best browsing experience possible. If you continue to use this website without changing your cookie settings or you click "Accept" below then you are consenting to this.

Close