Connect with us

Business

የህንዱ ካራቱሪ ኩባንያ በኢትዮጵያ ዳግም እንዲሰማራ ጥያቄ ቀረበ

Published

on

የህንዱ ካራቱሪ ኩባንያ በኢትዮጵያ ዳግም እንዲሰማራ ጥያቄ ቀረበ

በጋምቤላ ክልል 100 ሺ ሄክታር መሬት ተረክቦ የነበረውና ከመንግሥት ጋር አለመግባባት ውስጥ ገብቶ የቆየው የህንዱ ካራቱሪ ኩባንያ ዳግም በኢትዮጵያ እንዲሰማራ ጥያቄ መቅረቡን የኢትዮጵያ ሆርቲካልቸርና ግብርና ኢንቨስትመንት ባለስልጣን አስታወቀ።

የኢትዮጵያ ሆርቲካልቸርና ግብርና ኢንቨስትመንት ባለስልጣን ዋና ሥራ አስፈጻሚ አቶ ያዕቆብ ያላ በተለይ ለአዲስ ዘመን ጋዜጣ እንደገለጹት፤ በጋምቤላ ክልል 100 ሺ ሄክታር መሬት ተሰጥቶት በሰፋፊ የግብርና ኢንቨስትመንት ላይ ተሰማርቶ የነበረው የህንዱ ካራቱሪ ኃላፊነቱ የተወሰነ የግል ኩባንያ የተወሰነውን መሬት ብቻ በማልማቱ ውሉ ተቋርጦ ቆይቷል። ሆኖም ከህንድ መንግሥት ጋር በተደረገ ውይይት ካራቱሪ ዳግም በኢትዮጵያ ሰባት ሺ ካሬ ሜትር መሬት ላይ ሊያለማ በሚችልበት ሁኔታ ውይይት ተደርጓል።

በህንድ የኢትዮጵያ ኤምባሲ፣ ከባለሃብቱ እና ከህንድ ከፍተኛ የሥራ ኃላፊዎች ጋር ምክክር መደረጉን የተናገሩት አቶ ያዕቆብ፤ ካራቱሪ በኢትዮጵያ ዳግም ወደ ሥራው እንዲመለስ የህንድ የሥራ ኃላፊዎች ለባለስልጣኑ ጥያቄ ማቅረባቸውን ገልፀዋል። የኢትዮጵያ መንግሥትም ሆነ ባለስልጣኑ የሚፈልጉት መሬቱ እንዲለማ ብቻ በመሆኑ፤ በባለሃብቱ ለምቷል ተብሎ የተያዘውን አምስት ሺ ሄክታር መሬት ብቻ ሳይሆን ኩባንያው አልምቻለሁ የሚለውን ሰባት ሺ ሄክታር መሬት ተረክቦ ማልማት ከፈለገ ወደ ሥራ መሰማራት እንደሚችል አስታውቀዋል።

እንደ አቶ ያዕቆብ ገለጻ፤ ኩባንያው ተጨማሪ መሬት ሳይጠይቅ ለውይይት በቀረበው መሬት ላይ ማልማት የሚፈልግ ከሆነም አዲስ ውል ተዘጋጅቶ ወደ ሥራ ይገባል። ባለስልጣኑ ለውጤታማነት እንዲያግዙ የባለሃብቱን አቅም ያገናዘበና ከመንግሥት ምን እንደሚጠበቅ አቅጣጫ የሚሰጥ አዲስ ደረጃውን የጠበቀ የሊዝ ውል ሰነድ ማዘጋጀቱንም ጠቁመዋል።

ኩባንያው ከሰባት ዓመታት በፊት በጋምቤላ ክልል 100 ሺ ሄክታር መሬት ተረክቦ በየዓመቱ 50 ሺ ሄክታሩን ለማልማት እና ውሉን ለሁለት ዓመታት ለመፈጸም ተስማምቶ ነበር። በተለያየ ጊዜ በተወሰደ መረጃ በአምስተኛው ዓመቱ ላይ አምስት ሺ ሄክታር ብቻ እንዳለማ ተረጋግጧል።

«መሬት ለአገሪቷ ልማት ወሳኝ በመሆኑ ጦሙን ማደር የለበትም» የሚሉት አቶ ያዕቆብ፤ ያለማው መሬት ለሌሎች ባለሃብቶች መተላለፍ ወይም ለሌሎች ተግባራት መዋል እንዳለበት ጠቁመዋል። ለተግባራዊነቱም ለካራቱሪ በተደጋጋሚ ጥሪ ተደርጎ ሊቀርብ ባለመቻሉ ከዛሬ ዓመት በፊት ውሉ እንዲቋረጥና ባለማው መሬት ብቻ እንዲቀር መደረጉን አስታውሰዋል።

ነገር ግን ካራቱሪ «ያለማሁት ሰባት ሺ ሄክታር ስለሚደርስ ሊሰጠኝ ይገባል» የሚል ክስ በተደጋጋሚ ሲያቀርብ ቆይቷል። የተባለውን ያህል መሬት ስለማልማቱ ማስረጃ ባለመቅረቡና በፍርድ ቤትም ለውሳኔ በቂ መረጃ ባለመኖሩ ጉዳዩ በህግ ተንጠልጥሎ እንደሚገኝ ተናግረዋል። | ጌትነት ተስፋማርያም

Trending

By continuing to use the site, you agree to the use of cookies. more information

The cookie settings on this website are set to "allow cookies" to give you the best browsing experience possible. If you continue to use this website without changing your cookie settings or you click "Accept" below then you are consenting to this.

Close