Connect with us

Business

በህገወጥ መንገድ የገቡ 100ሺ ሞተር ሳይክሎች የስጋት ምንጭ ሆነዋል

Published

on

በህገወጥ መንገድ የገቡ 100ሺ ሞተር ሳይክሎች የስጋት ምንጭ ሆነዋል

በተለያዩ ወቅቶች በህገ ወጥ መንገድ ወደ ኢትዮጵያ የገቡ 100 ሺ የሚጠጉ ሞተር ሳይክሎች ለፀጥታው፣ ኢኮኖሚውና ለጤና ስጋት መሆናቸው ተገለፀ፡፡

የህዝብ ተወካዮች ምክርቤት የትራንስፖርት ጉዳዮች ቋሚ ኮሚቴ ትናንት የፌዴራል ትራንስፖርት ባለስልጣን የሩብ ዓመት እቅድ አፈፃፀምና ሪፖርት ባዳመጠበት ወቅት እንደተነገረው፤ በአሁኑ ወቅት በተለያዩ ወቅቶች ወደ አገሪቱ በህገ ወጥ መንገድ የገቡ ሞተር ሳይክሎች የስጋት ምንጭ ሆነዋል፡፡

ቋሚ ኮሚቴው፤ በኦሮሚያ እና ደቡብ ብሄር፣ ብሄረሰቦችና ህዝቦች ክልል በርካታ ህገ ወጥ ሞተር ሳይክሎች መኖራቸውን ጠቁሟል፡፡ የትራንስፖርት ባለስልጣኑም ከክልሎች እና ከገቢዎችና ጉሙሩክ ባለስልጣን ጋር በመሆን የተጣራ መረጃ ለመያዝ እሠራለሁ ማለቱን በማስታወስ፤ በሚፈለገው ደረጃ ለውጥ አለመምጣቱን ገልጿል፡፡ ተሽከርካሪዎቹ ሊብሬ የሌላቸውና በኮንትሮባንድ ወደ አገር ውስጥ የገቡ ከመሆናቸውም በተጨማሪ የሰው ሕይወትና ንብረት ላይ አደጋ ማድረሳቸው እንዳሳሰበው አመልክቷል፡፡

የፌዴራል ትራንስፖርት ባለስልጣን ዋና ዳይሬክተር አቶ ካሣሁን ኃይለማርያም በበኩላቸው፤ ድርጊቱ መኖሩን እንዲሁም አሳሳቢ እንደሆነ ገልፀዋል፡፡ በህገ ወጥ መንገድ ወደ አገር ውስጥ የገቡ ሞተር ሳይክሎች 100 ሺ እንደሚገመቱ እና በመላ አገሪቱ የተሰራጩ እንደሆኑም አስረድተዋል፡፡

አቶ ካሳሁን እንዳሉት፤ ችግሩን ለማስቆም በድንበር አካባቢ ጥብቅ ቁጥጥር ለማድረግ ከሚመለከታቸው አካላት ጋር ውይይት ተካሂዷል። ወደ አገር ውስጥ የገቡትም በብዛት አርሶ አደሩ እየተገለገለባቸው በመሆኑ ሕጋዊ የሚሆኑበት መንገድ ይዘረጋል፡፡ ይሁንና ዋነኛው አማራጭ ግን የሞተር ሳይክሎች መበራከት አያሌ ችግሮች የሚያስከትሉ በመሆናቸው ጠንካራ ህግ ያስፈልጋል።

በባለስልጣኑ የመንገድ ደህንነት የትራንስፖርት ዘርፍ ምክትል ዳይሬክተር አቶ ደረጀ ዮሐንስ በበኩላቸው፤ በኮንትሮባንድ የገቡ በርካታ ሞተር ሳይክሎች በሌላ ዓለም እየተከለከሉ ያሉና ለአየር ንብረት መበከል ትልቅ ድርሻ ያላቸው ናቸው፡፡ ከዚህም በተጨማሪ በአንዳንድ አካባቢዎች ለፀጥታ ሥጋት የሆኑ ተግባራት ይፈፀምባቸዋል፡፡

ሞተር ሳይክሎቹ ሁለትና ከዚያ በላይ ሰዎችን ይዘው የሚንቀሳቀሱና የትራንስፖርት አገልግሎት የሚሰጡ መሆናቸው ታውቋል፡፡ በዚህ ወቅትም አደጋ ለመከላከል የሚያስችል ‹‹ሄልሜት›› አይጠቀሙም፡፡ የትራፊክ አደጋ በመፍጠርም ትልቅ ኪሳራ እያደረሱ ነው፡፡ መንግሥትም በግብር ማግኘት የነበረበትን ጥቅም አሳጥተዋል። ከሚሰጡት ጥቅምም የላቀ ጉዳቱ ያመዘነ ነው፡፡ ጉዳዩ አሳሳቢ በመሆኑም ባለስልጣኑ እልባት ለመስጠት ይተጋል፡፡

ቋሚ ኮሚቴው በበኩሉ፤ እነዚህ በህገ ወጥ መንገድ ወደ አገር ውስጥ የገቡ ተሽከርካሪዎች በአፋጣኝ እልባት እንዲሰጣቸውና በቀጣይም መሰል ተግባራት እንዳይደገሙ ባለስልጣኑ ከሚመለከታቸው አካላት ጋር በመሆን ቁጥጥር ማድረግ እንዳለበት አሳስቧል፡፡ ethpress

Trending

By continuing to use the site, you agree to the use of cookies. more information

The cookie settings on this website are set to "allow cookies" to give you the best browsing experience possible. If you continue to use this website without changing your cookie settings or you click "Accept" below then you are consenting to this.

Close