Connect with us

Education

ቀን የጣለው መስከረም ሁለት፤| የዛሬው ቀን በታሪካችን ምዕራፍ፤

Published

on

ቀን የጣለው መስከረም ሁለት

ቀን የጣለው መስከረም ሁለት፤| የዛሬው ቀን በታሪካችን ምዕራፍ፤
(ሔኖክ ስዮም በድሬትዩብ)
(ከ፪፻፰ በድጋሜ የተለጠፈ)
——
ዛሬ ተራ ቀን ሆነ፡፡
ዛሬ ግን መስከረም ሁለት ቀን ነበር፡፡ በነበር ከቀሩ ባለታሪክ ቀኖች አንዱ መጨረሻው ይኽው የአዲስ ዓመት ማግስት ሆኖ ቀረ፡፡ በዘመኑ መስከረም ሁለት ማግስት አልነበረም፡፡ ይልቁንም መስከረም አንድ ዋዜማ ነበር፡፡

ሀገር ዳሷን ጥላ ሽር ጉድ የምትልበት ቀን መስከረም ሁለት እንዳልነበር ዛሬ ይህ ቀን የአዲሱ ዓመት ድባብ ሲነጋ የሚያንዣብብበት ሆነና አረፈው፡፡ መስከረም ሁለት ባለ አደባባይ ነው፡፡

መስከረም ሁለት ሰው ጎዳና የሚሞላበት የፌሽታ ቀን ነው፡፡ መስከረም ሁለት ሰማያዊ ለባሽ ኮሚኒስቶች ከፍ ካለው ስፋራ ቆመው ግራ እጃቸውን ወደ ሰማይ የወረወሩበት የደስታ ቀን ነው፡፡ ዛሬ አዘቦት ሆኗል፡፡ ተራውን ለነ ግንቦት ሃያ የሰጠ መጻተኛ ቀን፤ በዚህ ሰዓት በዚያ ዘመን ራዲዮ ስለ ድል ያወራል፡፡ ጥላሁን ገሰሰ ይለያል ዘንድሮ ይላል፡፡ ከያኒያን አብዮቱን በአብዮት አደባባይ ያደምቃሉ፡፡

የመጨረሻው ንጉስ መጨረሻ የሌለው ሐጢአት ይተነተናል፡፡ ቀኑ መስከረም ሁለት ነው፡፡ ሰዎች ማልደው ከየቤታቸው ወጥተው አብዮት አደባባይ ቆመዋል፡፡ አ.ኢ.ሴ.ማ.ዎች፣ መ.ኢ.ገ.ማ.ዎች፣ አ.ኢ.ወ.ማ.ዎች፣ ኢ.ሰ.ፓ.ዎች በዚህ ዘመን ብዙዎች አብዮት ተባሉ፡፡ መስከረም ከሰላሳው ቀን መገለጫነት ተገድቦ የመስከረም ሁለት መለያ የወል ስም ሆነ፡፡

ዛሬ አብዮት አደባባይ ቦታው እንጂ ስሙ የለም፡፡ ዛሬ ይሄ ግዙፍ የሀገሪቱ ጎዳና ደመራ ሲበራ ብቻ የሚደምቅ ስፍራ ሆኗል፡፡ ዛሬ መስከረም ሁለተኛው ቀን የበዓል ማግስት ብቻ ሆኖ በሌላ ትውልድ በአንጎቨር ሳቢያ እስከ ረፋድ የሚተኛበት ቀን ሆኖ አርፏል፡፡ ትናንትና በዚህ ቀን ማንም አይተኛም፤ መስከረም ሁለት በዘመኑ ማልዶ የሚቀሰቅስ የክት ቀን ነበር፡፡ ቀን ቀንን ጣለው፤ መስከረም ሁለት ከደመቀው ክቡሩ ወርዶ የዘመን መለወጫው ማግስት ሆነ፡፡

 

የአብዮት ዘፈኖች ከቴሌቭዥን መስኮት ጠፍተው የቢራ ፋብሪካዎች የአዲስ ዓመት መልካም ምኞት አጥለቀለቁን፤ የቀን እንጂ የሰው ጅግና የለውም ይሉት ብሂል መስከረም ሁለት ላይ ሰራ፡፡ እናቶች ለአብዮቱ በዓል የሀገር ልብሳቸውን አጥበው እንዳልተኮሱ ቆሸሸ ብለው የሚያወልቁበት ቀን ሆኖ አረፈው፡፡ ይህው ቀን ቀንን ሲጥል፡፡

ይህው መስከረም ሁለት እንኳን ነበር ሲሆን፡፡ በርግጥ የመስከረም ሁለተኛ ቀን ከብዙ የመስከረም ሁለት ቀኖች የሚለይበት ዘመንም ነበረው፡፡ ሀገሪቱ አስረኛውን የአብዮት በዓል ስታክብር፤ አቤት ያ መስከረም ሁለት፡፡ ምናልባት የመስከረም ሁለተኛ ቀን ሞገስ ተሟጦ ያለቀው ያን ቀን ተንጠፍጥፎ አልቆ ይሆን? ያኔ ሰማይ ምሽት ብርሃን ተፋ፣ ያኔ የጠረቤዛ ጨርቆች በውስኪ ራሱ፤ ያኔ ኢትዮጵያ ቀን ዘላ መስከረም ሁለት አዲሱን ዓመት ተቀበለች፡፡

ዛሬ መስከረም ሁለት ተራ ቀን ነው፡፡ ልናስበው ስንሻ ልንዘክረው ስንሞክር እንኳን አምጠን ነው፡፡ ግብሩም ክቡሩም ከዓይነ ህሊናችን ጠፍቷል፡፡ ስንተርከው የሚያደምጠን ትውልድ ርግጥ ከመስረም አንድ በልጦ ብሎ ሊጠይቀን ይችላል፡፡ መስከረም ሁለት ዛሬ ተራ ቀን ነው፡፡ ምናልባት የጥንት ጋዜጦች፣ የትዝታ እስረኞች፣ የአብዮት እሳቶች፣ የእሳቱ አመዶች በትዝታው ካልከነፉ የቀን ክፍ ሌላና ተራ ቀን አድርጎታል፡፡ ከአስራ አራት ዓመታት በላይ ግን የቀን አውራ ነበር፡፡

የዛሬው ቀን በታሪካችን ምዕራፍ፤ DIRETUBE

Trending

By continuing to use the site, you agree to the use of cookies. more information

The cookie settings on this website are set to "allow cookies" to give you the best browsing experience possible. If you continue to use this website without changing your cookie settings or you click "Accept" below then you are consenting to this.

Close