Connect with us

Art and Culture

መስከረም ሁለት፤ እኔም እንደ ግንቦት ሃያ አድርጎኝ ነበር የሚለው ታላቅ ቀን

Published

on

መስከረም ሁለት፤ እኔም እንደ ግንቦት ሃያ አድርጎኝ ነበር የሚለው ታላቅ ቀን፡፡

መስከረም ሁለት፤ እኔም እንደ ግንቦት ሃያ አድርጎኝ ነበር የሚለው ታላቅ ቀን፡፡ | ተጓዡ ጋዜጠኛ ሄኖክ ስዩም ዛሬን በትዝታ ወደ ትናንትና ሊወስደን ነው፡፡ ዛሬ መስከረም ሁለት ነው፡፡ ይህ ቀን በሀገራችን ወታደራዊ መንግስት ታሪክ ከቀናት ሁሉ የሚበልጠው ነበር፡፡ ሄኖክ ስዩም እንዲህ ያስታውሰዋል፡፡ | ሄኖክ ስዩም በድሬ ቲዩብ

ዛሬ መስከረም ሁለት ነው፡፡ በእርግጥ አሁን የአውደ ዓመቱ ማግስት ነው፡፡ ትናንት ግን እንዲህ አልነበረም፡፡ የአውደ አመት ዕለት ቅርጫ መዋል ሳይሹ ከተማ ሲያስውቡ የሚውሉ አብዬተኞች ምትክ የሌለው በዓላቸው ነበር፡፡

መስከረም ሁለት የአብዮት በዓል ነው፡፡ መስከረም እና አብዮት በሚል ሀገር ያጥለቀለቁ ስሞች ለትዝታ ቀርተው ቀኑ አዘቦት የሆነበት ዘመን ላይ ደርሰናል፡፡

መስቀል አደባባይ ስሙን ሳይቀር በአብዮቱ ተነጥቆ አብዮት አደባባይ ተብሎ የሚጠራ ስፍራ ነበር፡፡ ደመራ የሚበራው አብዮት አደባባይ ነው፡፡ አብዮትም የሚከበረው እዚሁ አብዮት አደባባይ፡፡

ይህ ቀን ከቀናቱ ሁሉ በላይ ስፍራ የሚሰጠው የአብዮቱ የልደትም የሰርግ ቀንም ነው፡፡ አብዮቱ ደግሞ በየዓመቱ የሚወለድ በየዓመቱ የሚዳር ቅንጡ ነበር፡፡

ዛሬ ሆኜ ሳስበው እንዲህ እላለሁ፡፡ ግንቦት ሃያ መስቀል አደባባይ ሲደምቅ፤ ቀን አንደበት ቢኖረው “እኛም እንዲህ አርጎን ነበር፡፡
ስሙ እና የቦታው ስም ተቀየረ እንጂ በመስቀል አደባባይ እንዲህ ሆኖ ያላለፈ ማን አለ?” ሲል የሚናገር አልያም በጦቢያ ወይም በሳተናው የሚጽፍ ይመስለኛል፡፡

ግንቦት ሃያ ምን ብሎ እንደሚመልስ መገመት አልችልም፡፡ ምናልባት እሱም ወይ በአዲስ ዘመን ወይ በእፎይታ ብዙ ይጽፍ ይሆናል፡፡ ግን ቀን አይናገርም፡፡ እናም እንናገርለታለን፡፡

የሰማይ ርችትና የአዲስ አበባን ሰው በማስተዋወቅ የመስከረም ሁለትን ያክል ባለ ውለታ ቀን የለም፡፡ ጎዳናዎችም ቢሆኑ መብራት በመብራት የመሆን አጀብ ያበዙት በዚህ ቀን ነው፡፡

የንጉሡ የዘውድ በዓል በታሪክ ብዙ ቢባልለትም አስረኛው የአብዮት በዓል ግን ሌላ ነበር፡፡ ዛሬ ሰፈራችሁ የምታይዋቸው ታላላቅ ሰዎች እንደ አሁኖቹ ታላላቅ ሰዎች ሁሉ ወደ አብዮት በዓሉ በሚጮህ ትራፊክ፣ በሚያርበደብድ ግርማ፣ በሚጋረፍ አጀብ የሚገቡ ናቸው፡፡

ይህንን ቀን ማንም ከአብዮት አደባባይ አይቀርም፡፡ የደርጉ ሹማምንት በሙሉ ከሱፍ በሚበልጥ ዋጋ የሚገዛውን ካኪ ለብሰው አብዮቱን ባለ ቀለም ያደርጉታል፡፡ ዛሬ ትዝታ እንኳን መሆን ያልቻለ ቀን መስከረም ሁለት ነው፡፡
ልጅን መስከረም ብሎ ልጣራ የሚል አባት አቤት የሚለው ልጅ አያገኝም፡፡ በወር ስም መጠራት ኋላ መቅረት ሆኗል፤ እውነት ይሁን ውሸት እንጇ እንጂ አንዱ ልጁን ህዳሴ ብሏታል የሚል ነገር ሰምቻለሁ፡፡

እውነት ከሆነ የመስከረም እና አብዮት የመባል ስም ማውጣት ባህሎች በህዳሴ ተተክተዋል ማለት ነው፡፡

የመስከረም መልካም ፍቅር ግን በልባችን ዛሬም አለ፡፡ ከመስከረም ሁለተኛዋን ቀን መርጦ በፍቅር የሚያብደው ልክፍት ሳይሆን ድፍን መስከረምን የሚሞሽረው መንፈስ ዛሬም ከእኛ ጋር ነው፡፡

ነገሥታት ያልፋሉ፡፡ ታሪክ እንደየዘመኑ ስፍራ ይዞ ስፍራውን ይለቃል፡፡ መስከረምና ኢትዮጵያውያን ግን በአበባ እንደደመቁ በቦታቸው ይኖራሉ፡፡ DIRETUBE

 

Trending

By continuing to use the site, you agree to the use of cookies. more information

The cookie settings on this website are set to "allow cookies" to give you the best browsing experience possible. If you continue to use this website without changing your cookie settings or you click "Accept" below then you are consenting to this.

Close