የምርጫ ማግስት ጠብ ሰልችቶናል | ይልቁንስ በኮረጆዋ ጉዳይ ከአሁኑ ተደራደሩ

0
የምርጫ ማግስት ጠብ ሰልችቶናል
የሀገሪቱን ስምም ለመቀየር እኮ ኮረጆ የሞላ ድምጽ አግኝቶ መንግስት መሆን ያስፈልጋል፡፡ ኮረጆ ለመሙላት ደግሞ ኮረጆዋ ምን አይነት ትሁን የሚለው ወሳኝ ይመስለኛል፡፡

የምርጫ ማግስት ጠብ ሰልችቶናል፡፡ ይልቁንስ በኮረጆዋ ጉዳይ ከአሁኑ ተደራደሩ፡፡ ለመሆኑ ኢትዮጵያ ከሸራ ኮሮጆ የምትወጣው መቼ ይሆን?
ከስናፍቅሽ አዲስ@DireTube

ተቃዋሚዎችና ገዢው ፓርቲ ድርድር ላይ መሆናቸውን ሰምቻለሁ፡፡ ምን አገባሽ አትበሉኝ እንጂ ገዢው ፓርቲ ዳቦ ቆርሶ ተፎካካሪ ፓርቲዎች ብሎ ያወጣውን ስም አልወደድኩትም፡፡ ተቃዋሚ ናቸዋ፡፡

በተለያዩ ርዕሰ ጉዳዮች ላይ ድርድር እያደረጉ የሚገኙት ፓርቲዎች ብዙ አጀንዳ አንስተው መጣላቸውን ስሰማ የረሱትን ጉዳይ አስታወስኩ፡፡

የሀገሪቱን ስምም ለመቀየር እኮ ኮረጆ የሞላ ድምጽ አግኝቶ መንግስት መሆን ያስፈልጋል፡፡ ኮረጆ ለመሙላት ደግሞ ኮረጆዋ ምን አይነት ትሁን የሚለው ወሳኝ ይመስለኛል፡፡

ያው መንግስታችን ሲታማ የምንሰማው ነው፡፡ ኮረጆ አስቀድሞ ሞልቷል ይሉት ነበር በምርጫ ወቅት፤ እኔ እንኳን ሲሞላም ሲሞላም አላየሁም፡፡ እንዲህ ያለ ነገር መቆሚያው መቼ ይሆን ብዬ ሳስብ ግን አንድ ነገር መጣለኝ፡፡

ሱማሌ ላንድ ሳትቀር ድፍን ዓለም ሸራ ከመሰለ ዳፍንታም የማያሳይ ኮሮጆ ወጥቶ ለዕይታ ግልጽ ላስቲክ መሳይ የፕላስቲክ ኮሮጆ መጠቀም ጀምሯል፡፡ ሰሞኑን ኬኒያ ያያችሁት አይነት ማለት ነው፡፡

ይህ ኮሮጆ እንደመስታወት ፍንትው አድርጎ የሚያሳይ ነው፡፡ የእኛው ለሀሜት ያጋልጣል፡፡ ድፍን ብሎ ይመጣና ከውጤት በኋላ ገዢው ፓርቲ አስቀድሞ ድምጽ የተሰጠበት ወረቀት ጠቅጥቆታል ምናምን እናደምጣለን፡፡ ከዚህ ሁሉ ኮሮጆው እንደ ዓለም ቢሆንስ?

ባንወዳደር እንኳን ተፎካካሪዎቹ ቢያንስ እንዲህ ያለ ጥርጣሬን የሚፈጥሩ ቁሳቁሶች ከምርጫው ዓለም እንዲወገድ ስምምነት ላይ ቢደርሱልን ምርጫን ተከትሎ ከሚደመጥ አሉሽ አሉሽ ይገላግሉን ነበር፡፡

ይሄ ኮሮጆ በዓለም ላይ የዘመኑ ምርጫ እና ለተጠያቂነት እና ግልጽነት እጅግ ተመራጭ ኮሮጆ ነው፡፡ አስቀድሞ ኮሮጆው ተፈትሾ የታሸገ ነው የሚለው ሀሳብ እንደሁ ማን ላይ ሆነሽ ማንን ታሚያለሽ እየተባለ ተአማኒነት አጥቷል፡፡

READ  በጋምቤላ በህዝብ ማመላለሻ ተሽከርካሪ ላይ በደረሰ ጥቃት የአምስት ሰዎች ህይወት አለፈ

አንዳንዴ ምርጫ ባልኖረ እላለሁ፡፡ ሰላም የነበረ ሀገር ምርጫን ተከትሎ ፍዳውን ይበላል፡፡ መስታወት የሚደቀው፣ ጥይት የሚሰማው፣ አምባገነንነት ፈንቅሎ ሲወጣ የሚታየው በምርጫ ማግስት ነው፡፡

ጎመን በጤና የሚለው የፓርቲ መሪም ቢሆን በምርጫ ማግስት ድል ወይም ሞት ይዘምራል፡፡ ቀኝ እጃቸውን ሰጥተው የሚያገዳድሉት ያው የፈረደበትን ህዝብ በመሆኑ የምርጫ ማግስት ጠብ ያስፈራል፡፡

እናም ጠቡን ከሚቀንሱ ጉዳዮች አንዱ መሆን ከቻለ እስቲ አስቡትና እናንተ ድርድር ላይ ያላችሁ ተፎካካሪዎች ኮሮጆአችን በሚቀየርበት ጉዳይ ምከሩልን ቢያንስ አንዱን አቤቱታ ከማድመጥ እናርፋለንና፡፡ DIRETUBE

 

NO COMMENTS