Connect with us

Art and Culture

መላከፍ ያመጣብኝ ቅሌት…

Published

on

መላከፍ ያመጣብኝ ቅሌት…

መላከፍ ያመጣብኝ ቅሌት…| አሳዬ ደርቤ በድሬ ትዩብ

‹‹ስጋ›› እወዳለሁ፡፡ ገንዘብ ካልቸገረኝና ጾም ካልሆነብኝ በስተቀር ያለምንም ማሳለስ አመቱን ሙሉ በጥሬውም ሆነ ተቀቅሎ ብበላው አይሰለቸኝም፡፡ የስጋ አፍቃሪ ከመሆኔ የተነሳ የምገዛበት ገንዘብ ባይኖረኝ እንኳን ጮማ የሰቀለ ሉካንዳ-ቤት አይቼ ዝም ብሎ ማለፍ አይሆንልኝም፡፡ ቢያንስ ዋጋውን ጠይቄና ‹‹አይቀንስም?›› እያልኩ መጨቃጨቄ አይቀሬ ነው፡፡
አንዳንድ ጊዜ ሰው ቤት ውስጥ ገብቼ ልክ ቂጤ ወንበር እንደያዘ… ዐይኔ ሳሎናቸው ውስጥ የተሰቀለውን ፎቶና ጌጣጌጥ ችላ ብሎ ወደ ጓዳ በማምራት የተሰቀለ ቋንጣ ሲፈልግ አገኘዋለሁ፡፡

ይሄን አመሌን ለማስተካከል ብዙ ጥረት ያደረኩ ቢሆንም ቀበዝባዛ ዐይኔን የሞንዳላ ሴቶችን የኋላ ኪስና የሰው ቤት ቋንጣ እንዳይመለከት ማድረግ አልተሳካልኝም፡፡
.
ከዚሁ ጋር በተያያዘ ከወር በፊት ምን አጋጠመኝ መሰላችሁ!
ምሳዬን ለመብላት በማሰብ ከቢሮ ወጥቼ የስጋ አምሮቴን የምወጣበት ምግብ ቤት እያፈላለኩ እንዳለ መንገድ ላይ ከአንዲት ቆንጆ ጋር ተገጣጠምኩኝ፡፡

የኮረዳዋ ውበት ለረዥም ሰዓት ስክሪን ላይ በማተኮሬ ምክንያት ከመደፍረስም አልፎ የሚያቃጥለኝን የዐይኔን ህመም ለተወሰነ ቅጽበት እንዳስረሳኝ አስታውሳለሁ፡፡

እናም ይችን ኮረዳ መራመድ እስኪያቅታት ድረስ መመልከቴ አልበቃኝ ብሎ፣ አልፋኝ ልትሄድ ስትል ጥበብ ጠራችኝና……‹‹ምን ዓይነት መልክ ነው- አስደማሚ ውበት›› በማለት የጀመርኩትን ግጥም ‹‹ዝም ብለህ አትሄድም- ቅሌታም አሮጊት!›› በሚል ስንኝ… ቤት ደፍታልኝና አንገቴን አስደፍታኝ ገላምጣኝ ሄደች፡፡
.
የሰደበችኝ ስድብ በቅጽበት ውስጥ የስጋ አምሮቴን ብቻ ሳይሆን ወጣትነቴንም ያጠፋ ነበር፡፡
ልጂቱ ከዐይኔ ስትሰወር በአጠገቤ ቁሞ ወዳየሁት መኪና በማምራት ከስፖኪዮው ላይ ተለግቼ ላፍታ ያህል ትኩር ብዬ አሮጊት ያስባለኝን ፊቴን እያየሁ እንዳለ… ከሹፌሩ ቦታ ላይ መቀመጡን ልብ ያላልኩት ጥላ-ቢስ ሰውዬ ‹‹ዝም በላት አያ! ገና አንድ ፍሬ ልጅ ነህ!›› እያለ ይስቅብኝ ጀመር፡፡

READ  ‹‹ጦመኛውና ጦማሪው››

በወረደብኝ የስድብ ዶፍ በመበሳጨቴ የተነሳ ምሳዬን ሳልበላ ወደ ቢሮ በመመለስ ወንበሬ ላይ ቁጭ ብዬ የኖርኳቸውን ዓመታት ስቆጥራቸው ያገኘሁት ቁጥር ‹‹34›› የሚል ሆነ፡፡ ማቱሳላ በእዚህ እድሜ ላይ እያለ ጡት ከመጥባት ተላቆ ጡት ለማሸት አልደረሰም ነበር፡፡ ታዲያ ይሄ እድሜዬ እንዴት አሮጊት ሊያስብለለኝ ቻለ?

መልሱ ቀላል ነው፡፡ የያዝኩት ግንባር 34 አመት ብቻ ጸሐይና የሰው-ፊት የመታው አይመስልም፡፡ በዚያ ላይ ደግሞ ያለ ጊዜው የረገፈ ጸጉሬ………፡፡
.
ልክ ከቢሮ እንደወጣሁ በቀጥታ ወደ ኮስሞቲክስ ሱቅ በማምራት እንደነ ሰይፉ በእርጅና ሳይሆን በእንክብካቤ ጉድለት ያለ ጊዜው የተመለጠ ጸጉሬን እንደ አዲስ እንዲያበቅል የሚያደርግ ‹‹ዶክተር-ምንትስ›› የሚባል ውድ ክሬም ገዛሁ፡፡ በፌስቡክ እንዳየኋቸው‹‹Before & After›› የሚሉ ማስታወቂያዎች ከሆነ… ይሄን ቅባት ለሶስት ወር በመጠቀማቸው የተነሳ ከመላጣነት ወደ ፍሪዚነት የተቀየሩ ሰዎች ቁጥር ቀላል የሚባል አይደለም፡፡ ስለዚህ ጸጉሬን ድጋሜ የማፈረፍርበትን እድል ላገኝ እንጂ… እንኳን ሶስት ወር ቀርቶ ሶስት አመትም ብቀባው ሰለቸኝ አልልም›› እያልኩ በስጋ ፈንታ ቆስጣና ቃሪያ በፌስታል ቋጥሬ ወደ ቤቴ ገባሁ፡፡ (ስጋ-በል መሆኔማ እርጅናን አመጣብኝ አይዴል?)

ከዚያ በኋላ ባሉ ቀናቶች… ቀን ቀን ከዚያች ልጅ ስድብ በላይ የሚያቃጥል ቃሪያና ሰላጣ እየቆረጠምኩ… ማታ ማታ ቅባቴን እየተቀባሁ የቀድሞው ጸጉሬ ወደ በፊት ይዞታው ተመልሶ የማፈረፍርበትን ቀን ስጠብቅ ከረምኩኝ፡፡

ባለፈው ታዲያ ከጸጉሬ ማደግ ጋር ተያይዞ ወሩን ሙሉ የተቀባሁት ቅባት ያመጣውን ለውጥ ለማየት ተሸሽጌው ከከረምኩት መስታወት ፊት ብቀርብ… እንኳን አዲስ ጸጉር ሊበቅል ቀርቶ በፊት የነበረውም ሸበቶ ቀላቅሎ አገኘሁት፡፡ ከዚህ በተጨማሪ ደግሞ አመጋገቤን ከስጋ ወደ አትክልት በማዛወሬ የተነሳ አገጬና አንገቴ መሃከል የሟሸሸ ቆዳ ተንጠልጥሏል፡፡

READ  ህያው የጥበብ ጉዞ-ወደ አባይ ጣና ምድር፤ ከመሀል ዘጌ ጊዮርጊስ እስከ ውራ ኪዳነ ምህረት፤

እናም ከመስታወቱ ፊት ለፊት የማየውን ምስሌን ትኩር ብዬ ስመለከተው ከቆዬሁ በኋላ ‹‹እፈረፍረዋለሁ›› ያልኩትን ጸጉሬን ከጺሜ ጋር አዳብዬ ሙልጭ አድርጌ በመላጨት ባንዱ ስብሰባ የተሰጠኝን ‹‹ኪራይ ሰብሳቢነትን እንዋጋ!›› የሚል ኮፊያ ደፋሁበት፡፡ (በቀንድ ይሆን የምንዋጋው?)

በመጨረሻ ‹‹እንደ አሞራ›› ስጋ ፍለጋ ከቤቴ ከመውጣቴ በፊት መለስ ብዬ ገጽታዬን በመስታወቱ ስገመግመው ያች ቁሌታም ሳዱላ ‹‹ቅሌታም አሮጊት›› ያለችውን ሽማግሌ ለመሆን ከዘራ ብቻ ጎድሎኝ ነበረ፡፡(እምጵጽ) DIRETUBE

Art and Culture

ነይ የኔ ደመራ! | ሚካኤል አስጨናቂ

Published

on

ነይ የኔ ደመራ!

ሀበሻዎች ግን ጥሩ ብርቃሞች እኮ ነን ! ስልክ ሲገባ ፥ መኪና ሲገባ ፥ ጢያራ ሲገባ ፥ ወፍጮ ሲገባ ፥ ለሁሉም አጀብ አጀብ ብለናል።

ስልክን የሰይጣን ድምጥ የሚያስተጋባ እርኩስ እቃ ፥ መኪናን ነፍስ ያላት ቆርቆሮ (ቁርጥ ግልገል መሳይ ) ፥ ወፍጮን ደግሞ የእህል ሰላቢ አድርገን ቆጥረንም እናውቅ ነበር።
ያኔ ደግሞ ፍርኖ ዱቄት ሀገራችን የገባ ጊዜ ልጆቻችንን ሁሉ ሳይቀር ፉርኖ ብለን በዱቄት ስያሜም ጠርተን እናውቃለን (እዚህ ጋር እየሳኩኝ መሆኑ ይታወቅልኝ ) ፥
ይህም ሁሉ ሆኖ እኔን ግን ክፍት ያለኝ ነገር ቢኖር ገኒዬን ከኔ ለመንጠቅ የሚሯሯጠው ያ ትዕቢተኛ የሰፈራችን ልጅ ስሙ መብራቱ ቦጋለ ሆኖ መቅረቱ ነው! እንደምን ቢሉ አንድም ያኔ ድሮ ገና መብራት ተኸተማችን የገባ ጊዜ አባቱ ከኩራዝ መላቀቅ ብርቅ ሆኖባቸው ስም ጥለውበት ፥ ሌላው ደግሞ አንድዬ የሰው መዛበቻ ሁን ሲለው!
.
በመሰረቱ የመብራቱ ፀባይ ለያዥና ለገናዥ የሚያስቸግር ፥ እንደስሙ ብርሀናማ ሳይሆን ጨለምተኛና የደንቃራ ስራን የሚያዘወትር በምስለት ደረጃ ለኔ የጋኔንን ያህል የሚፀልምብኝ ልጅ ነው። በሰፈሩ ሁሉም ሰው ሰላም አውርዶ ከቤቱ ባይወጣ ቢቀር እንኳ ሌላ ሰፈር ሆነ ብሎ ሄዶ ነገርና ጠብ ይፈልጋል! አዎን ፥ ከሲጃራ ከጫትና ከሴስ ሱስ የማይተናነስ ደባል ሱስ ያየሁት በመብራቱ ነው።

እንደው ባባቱ ዘመን አንድም ብልህና ትንቢተኛ ሰው ጠፋ እንጂ ለዚህ ልጅ ቤተሰቦቹ ስያሜ ሲሰጡት መብራቱን አጠፋ፥ ብርሀን ንሳቸው ፥ ፀሊሙ ጋረደው ቢሆን እንደሚመረጥ ሰው መጠቆም ነበረበት እላለሁ!
.
ለነገሩ እኔ ስለሰው ምን አገባኝ? ከዚህ ሁሉ የስም ጋጋታና ውጣ ውረድ ይልቅ ይህን ልጅ ኤልፓ ብለው ሁሉን ገላጭ ስያሜ እንደሰጠሁት አስባለሁ ፥ ምህ እንደምን አላችሁኝ ልበል? ኤልፓ በያንዳንዱ ቀናቶች ብቻ ሳይሆን በዓልን እንኳ መታገስ አቅቶት ብርሀን ሲነሳን ስላየሁ ብዬ እመልስላቹሀለሁ!

READ  የሰው ሁሉ ባል…

ይህም የሆነው በአዲሱ ዓመት መግቢያ ቀናችን መስከረም አንድ ዕለት ነው ፥ መቼም በተለምዶው መሰረት እንኳ ለልደታ የቃዠ ልጅ ወሩን ሙሉ ይባንናል እንደሚባለው ሁሉ መስከረም አንድ ብርሀንን የነሳ ድርጅትም ዓመቱን ሙሉ የጨለማ ዝርጋታ ልማዱን አጧጡፎ ቢቀጥለውስ? የሚል ስጋትን ያጭርብኛል! ይሄ በቀን መባቻ መረገም እኮ ክፉ ነገር ነው!
.
ደመራዬ ገኒ ፥ የከተራ በዓልን ልታከብር ነጠላዋን መስቀልያ አጣፍታ ትታየኛለች ! ህዝብ ከተሰበሰበበት አደባባይ መሀከል ቆማ ከዝማሬው ፥ ከደመራው መንቦልቦል ጋር አብራ ብርሀን እየሰጠች የምትዘምር ይመስለኛል! ጉልላት ዓይኖቿ በሚንቀለቀለው የእሳት ብርሀን ዳሰስ ተደርገው ስስ ጨለማ መልሶ ሲጋርዳቸው የሚታየው ትዕይንት ልብን ያነሆልላል!

ገኒን ላገኛት ይገባል ፥ ከጓደኞቿ ለይቻት የያዝኩላትን ስጦታ ብሰጣት እወዳለሁ ! የደመራውን ነበልባል በእኔ እቅፍ ውስጥ ሆና እያየች ልዩ ትዝታን ከልባችን ማህደር ቋጥረን እናስቀር ዘንድ እፈልጋለሁ ፤ ውዴ አንገትህ ስር ግብት ሲሉ ልክ እንደ ደመራው ወላፈን ገላህ ደስ የሚል ሙቀትን ይለግሳል እንድትለኝ እሻለሁ !

የኔ ፍቅር ከከናፍርሽ ድንበር ተላቀው የሚወጡት ቃላቶችሽ ደግሞ ለኔ ወላፈኔ ናቸው ብዬ በስሱ ጉንጮቻን እስማት ዘንድ ነው ምኞቴ!
መብራቱ ግን አለ ! ከስሙ ግብር ጋር ሆድና ጀርባ ሆኖ ፍቅራችንን በጉልበት ሊያደበዝዝ የሚተጋው የክፋት ውላጅ!
.
ገኒዬ መጣች ፥ ንፋሱ ነጠላዋን ያርገበግበዋል ፤ ግንባሯ ላይ የተነሰነችው ፀጉር ሰያፍ ተቀምጣ ከንፋሱ ጋር አብራ ትጫወታለች ፤ ሀጫ በረዶ በመሰሉት ጥርሶቿ ከነበልባሉ ጭስ ጋር አብረው የሚግተለተሉ ይመስላሉ!

ገኒ ደስታዬ ነች ፥ ገኒ ለኔ ስራዬን ማንቂያ ብርሀኔ ነች ፥ በርሷ ውስጥ ተፈጥሮን አያለሁ ፥ በርሷ ውስጥ ነገዬን እተነብያለሁ !
የትንቢቴና ሰናይ ተስፋን የምቋጥርባት ዕንቁዬ ደግሞ ማንንም ሳትሰማ ተንደርድራ ልታቅፈኝ እየሮጠች ነው! እፎይ እየመጣች እኮ ነው።
.
“አይሆንም ገነት ! አይኔ እያየ በገዛ መንደሬ ፥ እንደልቤ በምፈነጭበት መንደሬ ላይ ሆነሽ ለዛ መናኛ ደስታን ልትሰጪ አትቺዪም” ኤልፓ ነበር ስሙን ቄስ ይጥራውና እሱንማ አፌን ሞልቼ አባቱ ባወጣለት ስም አልጠራውም።

READ  ፍላጎትና አቅርቦቱ የተራራቀው የቤት ልማት ፕሮግራም

ውዴ ፍርሀት ሲሸብባት አየሁ ፥ ያን እብሪተኛ ንቆ መምጣት ለሷም ለኔም ትልቅ ዋጋ እንደሚያስከፍለን ተረድታዋለች መሰለኝ ……….
ገኒ በመጀመርያ ሩጫዋ ዝግ አለ ፥ ከዛ እንደመራመድም ሞከረች ……….. ያ ተንከሲስ በእጁ በትር ይዞ በድፍርስ አይኖቹ እያቁረጠረጠባት ነው! ……………… የኔ ፍቅር ይባስ ብላ ባለችበት ተገትራ ቀረች !

አይ ኤልፓ ፥ አንድዬ በደልህን ይይልህ ! በያንዳንዱ መሰናክሎች ውስጥ እድገቴን ፥ተስፋዬን እና ነገን ማያዬን እያኮሰስከው መሆኑ የማይገባህ ግዑዝ ነህ! አልኩኝ በሆዴ!
ገኒዬ ከሩቅ ታየኛለች ፥ ከእሳቱ ወላፈን ጋር እየፈካች ፥ ከሚግተለተለው ጢስ ጋር እየበነነች………………………………
.
ተፈፀመ!! DIRETUBE

Continue Reading

Art and Culture

በአዲስ አበባ ሁለት የነገሥታት መታሰቢያ ሐውልቶችና ሦስት ጥንታዊ ቤቶች እድሳት ሊጀመር ነው

Published

on

በአዲስ አበባ ሁለት የነገሥታት መታሰቢያ ሐውልቶችና ሦስት ጥንታዊ ቤቶች እድሳት ሊጀመር ነው

በአዲስ አበባ የሚገኙ ሁለት የነገሥታት ሐውልቶችና ሦስት ጥንታዊ ቤቶች እድሳት ሊደረግላቸው መሆኑን የባህልና ቱሪዝም ቢሮ አስታወቀ።

መንግስት ለሐውልቶቹና ለጥንታዊ ቤቶች እድሳት 30 ሚሊዮን ብር በጀት መድቧል፡፡

የቢሮው የኮሙኒኬሽን ዳይሬክተር አቶ ወርቁ መንገሻ እንደሚሉት በመዲናዋ ያሉ ታሪካዊ፣ባሕላዊና ተፈጥሯዊ ቅርሶችን እያደሰ፣ እያስተዋወቀና አዳዲስ የመስህብ ቦታዎችን በማስፋት ላይ ነው።

የአጼ ምኒልክና የአጼ ቴዎድሮስ ሃውልቶች በተጀመረው በጀት ዓመት እድሳታቸው እንደሚደረግላቸው ዳይሬክተሩ ገልጸዋል።

የአዲስ አበባ የመጀመሪያው ከንቲባ ቢትወደድ ወልደ ጻድቅ ጎሹ መኖሪያ ቤት፣የሼክ ኦጄሌ አል ሀሰን ቤተ መንግሥትና በአሁኑ ጊዜ የአራዳ ፍርድ ቤት ሆኖ የሚያገለግለው የቀድሞው የአዲስ አበባ ማዘጋጃ ቤትም እድሳት ከሚደረግላቸው ጥንታዊ ቤቶች መካከል ተጠቃሽ ናቸው።

ሁለቱ የነገሥታት ሐውልቶች 6 ሚሊዮን ብር ለእድሳት የተመደበላቸው ሲሆን፤ ሦስቱን ጥንታዊ ቤቶች ለማደስ ደግሞ 24 ሚሊዮን ብር በጀት እንደተያዘላቸውም ተናግረዋል።

 ሐውልቶቹ የተቀመጡት አደባባይ ላይ በመሆኑ ለጎብኚዎች የማይመቹ ቢሆንም የትራፊክ እንቅስቃሴውን በማያውክ መልኩ እንዲጎበኙ ይደረጋልም ብለዋል።

በቢሮው በ2007 ዓ.ም. ጀምሮ እድሳት ሊያደረግላቸው ከመረጣቸው ሐውልቶች መካከል የአቡነ ጴጥሮስ፣ የስድስት ኪሎ ሰማዕታትና የሚያዝያ 27 የድል መታሰቢያ ሐውልቶች የተጠገኑ ቢሆንም የአጼ ቴዎድሮስ ሴባስቶፖል መታሰቢያና የአጼ ሚኒልክ ሐውልቶች እስካሁን አልተጠገኑም።

ዝርዝር ጥናቱ ጊዜ መፈለጉንና የባቡር ግንባታው ለዕድሳቱ መዘግየት እንደምክንያት ጠቅሰውታል።

ታሪካዊ ቅርሶችንና ሐውልቶችን ይዘታቸው ሳይቀየር ማደስ የሚችል የባለሙያ እጥረትም ሌላው ለሐውልቶቹ ዕድሳት መዘግየት ምክንያት ነው። ena

READ  የኢሊሊ ሆቴል ባለቤት አቶ ገምሹ በየነ ተሰውረዋል
Continue Reading

Art and Culture

የድሬ ቲዩብ መረጃ አዘል ጥያቄ – የኢሬቻ በዓል

Published

on

የድሬ ቲዩብ መረጃ አዘል ጥያቄ - የኢሬቻ በዓል

በየዓመቱ መስከረም 21 የሚከበረው የኢሬቻ በዓል በሠላም እንዲከናወን አባገዳዎች ባቀረቡት ጥያቄ መሠረት የዘንድሮው በዓል በታጠቀ ሀይል እንደማይታጀብ፣ የፓለቲካ ፓርቲዎች ሰንደቅ ዓላማ በስፍራው ላይ እንደማይኖር ስምምነት ላይ ተደርሷል።

ይህ ስምምነት ተገቢነቱን እንዴት ያዩታል?
ሠላምና መረጋጋት እንዳይጠፋ ከሕዝቡስ ምን ይጠበቃል ይላሉ?
እንደተለመደው መልሳችን ጨዋነት አይለየው | ድሬቲዩብ

READ  ‹‹ጦሱን ይዞ ይሂድ!››
Continue Reading

Trending

news.et Mobile App!

It's Faster!

By continuing to use the site, you agree to the use of cookies. more information

The cookie settings on this website are set to "allow cookies" to give you the best browsing experience possible. If you continue to use this website without changing your cookie settings or you click "Accept" below then you are consenting to this.

Close