Connect with us

Ethiopia

ለመምህራን በኪራይ የሚተላለፉ የ5 ሺህ ቤቶች ዕጣ ወጣ

FanaBC

Published

on

Housing for Teachers in Ethiopia

(ኤፍ.ቢ.ሲ) ለመምህራን በኪራይ የሚተላለፉ የ5 ሺህ የጋራ መኖሪያ ቤቶች ዕጣ ስነ ስርዓት በዛሬው እለት ተካሂዷል።

በአዲስ አበባ ከተማ አስተዳደር ማዘጋጃ ቤት አዳራሽ በተካሄደው ስነ ስርዓት ላይም ቤቶቹን በኪራይ የሚያገኙ መምህራን ተለይተው ታውቀዋል።

በእጣ ማውጣት ስነ ስርዓቱ ላይ የአዲስ አበባ ከተማ ከንቲባ ድሪባ ኩማን ጨምሮ የከተማ አስዳደሩ ከፍተኛ አመራሮች ፣ መምህራን፣ ተማሪዎች፣ እና የተለያዩ ጥሪ የተደረገላቸው እንግዶች ተገኝተዋል።

የአዲስ አበባ ከተማ አስተዳደር ከንቲባ ድሪባ ኩማ በስነ ስርዓቱ ላይ ባደረጉት ንግግርም፥ ለአንድ ሀገር ኢኮኖሚያዊ፣ ፖለቲካዊ፣ ማህበራዊ እድገት የመምህራን አስተዋጽኦ ከፍተኛ ነው።

የመምህራንን የኑሮ ደረጃ ማሻሻል በሀገሪቱ የትምህርት ጥራት ላይ ያለው አስተዋጽኦ ከፍተኛ ነው ሲሉም ከንቲባ ድሪባ ተናግረዋል።

ወደፊትም ከተማ አስተዳደሩ የመምህራንንም ሆነ በዝቅተኛ የኑሮ ደረጃ ላይ የሚገኙ የህብረተሰብ ክፍሎች የቤት ተጠቃሚ የማድረግ ስራ አጠናክሮ ይቀጥላል ብለዋል።

በዛሬው የእጣ ማውጣት ስነ ስርዓት ውስጥም ዕጣው ይገባቸዋል ተብለው ከተለዩ 16 ሺህ 798 መምህራን መካከል ቤቶቹን በዝቅተኛ ዋጋ የሚከራዩ 5 ሺህ መምህራን ተለይተዋል።

የወጣው ዕጣ አገልግሎትን መሰረት ያደረገ ሲሆን፥ ከ1 እስከ 5 ዓመት፣ ከ6 እስከ 15 እንዲሁም ከ16 ዓመትና ከዚያ በላይ በሚል በአገልግሎት ዘመናቸው ተመድበው ነው እጣው የወጣላቸው።

በዚህም መሰረት በመምህርነት ሙያ 16 ዓመት እና ከዚያ በላይ ያገለገሉ ሁሉም መምህራን ሙሉ በሙሉ እጣው ውስጥ በመካተት ቤት እንዲያገኙ መገረጉም ታውቋል።

ከዚህ በተጨማሪም በመምህርነት ሙያ በማገልገል ላይ እያሉ በጡረታ የሚሰናበቱ መምህራን ጡረታ እስከ ወጡበት ጊዜ የከፈሉት የቤት ኪራይ ተሰልቶ የቤቱ ባለቤት የሚሆኑበት ስርዓት መዘርጋቱም ተገልጿል።

በዛሬው እለትም 1 ሺህ 402 መምህራን ስቱዲዮ፣ 2 ሺህ 895 መምህራን ባለ አንድ መኝታ ቤት እና 703 መምህራን ባለሁለት መኝታ ቤት አግኝተዋል።

እጣ ለወጣላቸው መምህራን በኪራይ የሚተላለፉ የጋራ መኖሪያ ቤቶችን ኪራይ ዋጋም፥ ስቱዲዮ 353 ብር፣ ባለ 1 መኝታ ቤት 671 ብር እንዲሁም ባለ 2 መኝታ ቤት ደግሞ 871 ብር መሆኑም ተነግሯል።

ቤቶቹ መምህራኑ ባላቸው ቤተሰብ ብዛት ልክ የሚከራዩ ሲሆን፥ እስከ 2 ቤተሰብ ያላቸው መምህራን ስቱዲዮ ሲከራዩ፤ እስከ 3 ቤተሰብ ያላቸው ደግሞ ባለ 1 መኝታ ቤት መከራየት ይችላሉ።

5 እና ከዚያ በላይ ቤተሰብ ያለቸው መምህራን ደግሞ ባለ 2 መኝታ ቤት እንደሚከራዩም ተገልጿል።

በዕጣው የተካተቱት መምህራን፣ የትምህርት ቤት አመራሮች፣ የቴክኒክ እና ሙያ አሰልጣኞችን ጨምሮ ሱፐርቫይዘሮች ናቸው።

በበላይ ተስፋዬ

Trending

By continuing to use the site, you agree to the use of cookies. more information

The cookie settings on this website are set to "allow cookies" to give you the best browsing experience possible. If you continue to use this website without changing your cookie settings or you click "Accept" below then you are consenting to this.

Close