Connect with us

Ethiopia

ዐፄዎቹ ያሸነፉ ቀን ጎንደር የረገጠ እንግዳ ጥምቀት ዛሬ ይመስለዋል፤

Published

on

ዐፄዎቹ ያሸነፉ ቀን ጎንደር የረገጠ እንግዳ ጥምቀት ዛሬ ይመስለዋል፤

ዐፄዎቹ ያሸነፉ ቀን ጎንደር የረገጠ እንግዳ ጥምቀት ዛሬ ይመስለዋል፤
(ዛሬ የጎንደሩ ፋሲል ከነማ በሜዳው ከወላይታ ዴቻ ጋር ገጥሞ ነበር፡፡ ሁለት ለዜሮ በሆነ ውጤት ያሸነፈው እና በደጋፊዎቹ ዜማ ስሙ እየገነነ ከመጣው ፋሲል ከነማ ድል በኋላ በጎንደር ያለውን ድባብ ተጓዡ ጋዜጠኛ ሄኖክ ስዩም ከዚህ በፊት ባንክን ድል ሲያደርግ የተመለከተውን ድባብ እንዲህ ያስታውሰናል፡፡)
(ሔኖክ ስዮም በድሬትዩብ)


ለኳስ እንግዳ ነኝ፡፡ ግን ይሄንን አየሁ፡፡ ከገነት ተራራ አናት ከፍ ብሎ የሚመጣ የድል ዜማ የነገሥታቱን መዲና አንቀጥቅጧታል፡፡ የሚወዱት ክለብ ያሸነፈላቸው ነዋሪዎች ብቻ አይደሉም፤ ይልቁንስ ለሚወዱት ክለብ ድል በዜማ ግብን ያስቆጠሩ፣ በሆታ ኳስ የመቱ ደጋፊዎች እንጂ፤
ከሰዓታት በፊት ከተማዋ ጭልል ብላ ነበር፡፡ ከፈጭፋጪት እስከ ገንፎ ቁጭ፣ ከቡልኮ እስከ አዘዞ፤ ከዞብል ጎን ከዐፄ ፋሲለደስ ስታዲየም በሚመጣው አየር ሰንጣቂ ድምጽ ልባቸው ተሰርቋል፡፡ ባጃጆች የሉም፤ ታክሲዎች ቆመዋል፡፡ ሱቆች ተዘግተዋል፡፡ ሁሉም ዐፄዎቹን እየደገፈ ነበር፡፡

ጨዋታው አለቀ፡፡ በሜዳቸው ድል ያደረጉት ፋሲሎች ከስታዲየሙ ወጡ፡፡ ጎንደር ጠበበቻቸው፡፡ እንዲህ ያለ ትዕይንት ጎንደር ላይ ለማየት ወይ ለጥምቀት የሚካኤል ታቦት ሲሸኝ፣ አልያም ሎዛ ማርያም ስትገባ ወይም ደግሞ እንዲህ ፋሲል ከነማ አቻውን ድል ሲያደርግ ጎንደር መድረስ ግድ ነው፡፡

በነገሥታቱ ጃኖ የተበጀው የፋሲል ከነማ መለያ ከተማዋን ሌላ ምድር አስመስሏታል፡፡ እኔ ስደርስ ፋሲል ከነማ አሸንፎ ሆ ሲል አንድ ሆነ፡፡ ይሄን ዓይነት ዜማ ዘጠና ደቂቃ እያዜመ ሲደግፍ ከቆየ ደጋፊ የወጣ አይመስልም፡፡ የጎንደር ወጣቶች ከከተማቸው አድማስ እልፍ ብሎ ከገንደውሃ እስከ ጨጨሆ፣ ከድል ይብዛ እስከ አርባያ በሚሰማ የድል ዜማ የፋሲልን ስኬት ያጣጥሙታል፡፡

ዛሬም እንዲህ እየሆነ እንደሆነ እየሰማሁ ነው፡፡ ፋሲል ከነማ ወላይታ ዴቻን አሸንፏል፡፡ ይህቺ የአፍሪካ ካሚሎት ዛሬ ለፋሲል ደጋፊዎች ትጠባቸዋለች፡፡ በኢትዮጵያ እግር ኳስ ታሪክ ያለ ቢራ ገንዘብ በህዝብ ላብ ስፖርት ቡድን ከፍ ማለት እንደሚችል ያሳዩት ደጋፊዎች በየደቂቃው መረጃ የሚሰጥ የማያንቀላፋ የፌስ ቡክ ገጽ አላቸው፡፡ ምናልባትም በፌስ ቡክ እግር ኳስን በቀጥታ በማሰራጨት የመጀመሪያዎቹ ሳይሆኑ አይቀርም፡፡

ፋሲል ከነማ ድሉን ተከትሎ ደጋፊዎቹ የበዙለት ክለብ ሳይሆን ደጋፊዎቹ ለድል ያበቁት ግማሽ ምዕተ ዓመት በጎንደር ወጣቶች ልብ የኖረ፤ ወጣቶች እስከ ጉልምስና ጎልማሶች እስከ እርጅና በራፍ ሆ ያሉለት ነው፡፡ እናም እንደ ዛሬው ድል አድርጎ ያ ታሪካዊ ስታዲየም ተመልካቹን ሲተፋው ጎንደር በደስታ ሲቃ ትወጠራለች፡፡ ህዝብ ልብ የገባ ክለብ ከመሆን በላይ ዋንጫ የለም፡፡ በዚህ ከመዘንው በሀገራችን በየቀኑ ዋንጫ ከሚያነሱ በጣት የሚቆጠሩ ክለቦች አንዱ ፋሲል ከነማ ነው፡፡
DIRETUBE

Trending

By continuing to use the site, you agree to the use of cookies. more information

The cookie settings on this website are set to "allow cookies" to give you the best browsing experience possible. If you continue to use this website without changing your cookie settings or you click "Accept" below then you are consenting to this.

Close