Connect with us

Ethiopia

በስድስት ወር አንድ ቢሊዮን ብር ከቱሪዝም

Binyam G-Kirstos

Published

on

በስድስት ወር አንድ ቢሊዮን ብር ከቱሪዝም

በስድስት ወር አንድ ቢሊዮን ብር ከቱሪዝም – ባለፉት ስድስት ወራት ኢትዮጵያን ከጎበኙ ቱሪስቶች ከአንድ ቢሊዮን ዶላር በላይ ገቢ መገኘቱን የባህልና ቱሪዝም ሚኒስቴር አስታወቀ።

የሚኒስቴሩ የሕዝብና ዓለም አቀፍ ግንኙነት ዳይሬክተር አቶ ገዛኸኝ አባተ ለኢትዮጵያ ዜና አገልግሎት እንደገፁት በዘንድሮው ግማሽ በጀት ዓመት 439 ሺህ 359 የውጭ አገራት ቱሪስቶች ኢትዮጵያን ጎብኝተዋል።

የጎብኚዎቹ የቆይታ ጊዜም በአማካኝ 16 ቀናት ሲሆን በቆይታቸው 1 ቢሊዮን 644 ሚሊዮን ዶላር ገቢ መገኘቱን ዳይሬክተሩ ተናግረዋል።

በዘርፉ የተኘው ገቢና የጎብኚዎች ቁጥር ከ2008 ዓመት ተመሳሳይ ወቅት ጋር ሲነፃፀር በዘንድሮ በጀት ዓመት በተወሰኑ የአገሪቱ አካባቢዎች ተከስቶ በነበረው ሁከት ምክንያት ወደ አገር ውስጥ የገቡ ጎብኚዎች ቁጥርና ገቢ ቅናሽ አሳይቷል።

በ2008 በጀት ዓመት ከ478 ሺህ 890 ጎብኚዎች 1 ቢሊዮን 789 ሚሊዮን 964 ሺህ 160 ዶላር ገቢ ተገኝቶ ነበር።

የዘንድሮው የቱሪዝም እንቅስቃሴ ካለፈው ዓመት ጋር ሲነፃፀር የጎብኚዎች ቁጥር በ39 ሺህ 531 ሲቀንስ ገቢውም በ145 ሚሊዮን ዶላር ዝቅ ብሏል።

እንደ አቶ ገዛኸኝ ገለፃ “ተፈጥሮ በነበረው ሁከት የአስቸኳይ ጊዜ አዋጅ ባይታወጅና የባህልና ቱሪዝም ኮማንድ ፖስት ተቋቁሞ ከአስጎብኚ ድርጅቶች፣ መገናኛ ብዙሃን፣ ዲፕሎማቶችና ሌሎች ባለድርሻ አካላት ጋር በቅንጅት ባይሰራ ከዘርፉ የሚገኘው ገቢ የበለጠ ይቀንስ ነበር”።

“ህብረተሰቡ ሰላም ወዳድና ጎብኚዎችን የማይተናኮል መሆኑን ለዓለም አቀፉ ማህበረሰብ ለማሳወቅ በተቀናጀ መንገድ በመሰራቱ ጎብኚዎች የያዙትን የጉዞ ፕሮግራም እንዳይሰርዙ፣ ኮንፈረንሶችም በተያዘላቸው ጊዜ እንዲካሄዱ ማድረግ ተችሏል” ነው ያሉት።

በተመሳሳይ በኮንፈረንስ ቱሪዝም ዘርፍ ባለፉት ስድስት ወራት ከ15 ሺህ 600 በላይ አህጉራዊና ዓለም አቀፍ ጉባኤዎች በአዲስ አበባና በክልል ከተሞች የተካሄዱ ሲሆን በቀሪ ጊዜያት ተመሳሳይ ጉባኤዎች እንደሚካሄዱ ይጠበቃል።

ጎብኚዎች የፈለጉትን በየቦታው በነፃነት በሰላም እንዲጎበኙና ቆይታቸውን አጠናቀው ወደ አገራቸው እንዲመለሱ ህብረተሰቡና የቱሪስት አገልግሎት ሰጪ ተቋማት ለነበራቸው ሚና ምስጋና አቅርበዋል።

በተጠናቀቀው የጥር ወር የአፍሪካ ህብረት የመሪዎች ጉባኤና ለጥምቀት በዓል ከፍተኛ ቁጥር ያላቸው እንግዶችና ጎብኚዎች መምጣታቸው፣ የኤርታሌ እሳተ ገሞራ አዲስ ክስተት፣ አዳዲስ የቱሪስት መዳረሻዎች እየሰፉ መምጣትና ሌሎች መልካም ሁኔታዎች በቀጣይ የጎብኚዎችን ቁጥር እንደሚጨምሩ ይጠበቃል።

በዚህም በበጀት አመቱ 1 ነጥብ 2 ሚሊዮን ጎብኚዎች ወደ አገር ውስጥ በመምጣት ከዘርፉ ከሶስት ቢሊዮን ዶላር በላይ ገቢ ለማግኘት የተያዘውን እቅድ ማሳካት እንደሚቻል አቶ ገዛኸኝ ተናግረዋል።

በሁለተኛው የዕድገትና ትራንስፎርሜሽን እቅድ መጨረሻ የጎብኚዎችን ቁጥር ከሁለት ሚሊዮን በላይ ለማድረስና ከስድስት ቢሊዮን ዶላር በላይ ከዘርፉ ገቢ ለማግኘት ዕቅድ ተይዟል ሲል የዘገበው ኢዜአ ነው።

Trending

By continuing to use the site, you agree to the use of cookies. more information

The cookie settings on this website are set to "allow cookies" to give you the best browsing experience possible. If you continue to use this website without changing your cookie settings or you click "Accept" below then you are consenting to this.

Close