የኦጋዴን ጋዝና ቤንዚን ፍለጋ ውጤት እያስገኘ ነው – ፖሊ ግሩፕ ኮርፖሬሽን

0
4402
የኦጋዴን ጋዝና ቤንዚን
ጠቅላይ ሚኒስትር ኃይለማርያም ደሳለኝ የፖሊ ግሩፕ ኮርፖሬሽን ከፍተኛ የሥራ ኃላፊዎችን ዛሬ በጽህፈት ቤታቸው ተቀብለው አነጋግረዋል።

አዲስ አበባ ታህሳስ 6/2009 የቻይናው ፖሊ ግሩፕ ኮርፖሬሽን በኢትዮጵያ ሶማሌ ክልል ኦጋዴን አካባቢ የሚያከናውነው የጋዝና የቤንዚን ፍለጋ ሥራ ውጤት እያስገኘ መሆኑን ገለጸ።

ጠቅላይ ሚኒስትር ኃይለማርያም ደሳለኝ የፖሊ ግሩፕ ኮርፖሬሽን ከፍተኛ የሥራ ኃላፊዎችን ዛሬ በጽህፈት ቤታቸው ተቀብለው አነጋግረዋል። የኮርፖሬሽኑ ምክትል ሊቀመንበር ቡ ዩሎንግ በዚሁ ጊዜ እንደገለጹት በኦጋዴን አካባቢ የጋዝና የቤንዚን ፍለጋ ሥራው ውጤት እያስገኘ ነው።

በ 3 ነጥብ 7 ቢሊዮን የአሜሪካ ዶላር ወጪ እየተከናወነ ያለው የፍለጋ ፕሮጀክት በእስካሁኑ ቁፋሮ ተስፋ ሰጪ እንደሆነም ተናግረዋል። በቀጣይም የፍለጋ ሥራው ይበልጥ ተጠናክሮ እንደሚቀጥል ነው ምክትል ሊቀመንበሩ የገለጹት።

ኮርፖሬሽኑ ከጋዝና ቤንዚን ፍለጋ ሥራ ባለፈ በማኑፋክቸሪንግ ዘርፍ ለኢትዮጵያ የቴክኖሎጂ ሽግግር እያስገኘ እንደሆነም ጠቅሰዋል።

ከኢትዮጵያ መንግሥት ለኮርፖሬሽኑ አስፈላጊ ድጋፍ እየተደረገ መሆኑን ተናግረው ”በገጠሪቱ ኢትዮጵያ 28 ሺህ አባወራዎችን ኤሌክትሪክ ተጠቃሚ ለማድረግም እየሰራን ነው” ብለዋል።

የኢትዮጵያን የልማት ዕቅዶች ማገዝ በሚያስችሉ እንደ ግብርና በመሳሰሉ ዘርፎች በስፋት መሳተፍ ደግሞ የኮርፖሬሽኑ የወደፊት ዕቅድ መሆኑን አመልክተዋል።

ጠቅላይ ሚኒስትር ኃይለማርያም ደሳለኝ በዚሁ ጊዜ ኮርፖሬሽኑ ከጀመራቸው የልማት ሥራዎች በተጫማሪ በአዳዲስ መስኮች ተሳትፎ እንዲያደርግ መጠየቃቸውን ውይይቱን የተከታተሉት የጠቅላይ ሚኒስትሩ ልዩ መልዕክተኛ አምባሳደር ብርሃነ ገብረክርስቶስ ገልጸዋል።

በመጪዎቹ አራት ዓመታት ውስጥ ሥራው እንደሚጠናቀቅ የሚጠበቀው ይኸው ፕሮጀክት ለአገሪቷ የውጭ ምንዛሪ እንደሚያስገኝ ተስፋ ተጥሎበታል።

እንደ አውሮፓውያን አቆጣጠር በ 2013 ኮርፖሬሽኑ ከኢትዮጵያ መንግሥት ጋር ባደረገው ስምምነት መሰረት በኦጋዴን በነዳጅ ፍለጋና ልማት ዘርፍ ተሰማርቶ እየተንቀሳቀሰ ይገኛል። ENA

READ  ዶ/ር ሙላቱ ተሾመ በኩባው የቀድሞ ፕሬዚዳንት ፊደል ካስትሮ ሞት የተሰማቸውን ጥልቅ ሀዘን ገለፁ

NO COMMENTS